بۇگىن ل.گۋميلەۆ اتىنداعى ەۇۋ-ءدىڭ عىلىمي كىتاپحاناسىنداعى اقسەلەۋ سەيدىمبەك اتىنداعى زالدا جۋرناليست-پۋبليتسيست, ساياساتتانۋشى, قوعام قايراتكەرى, ەسىمى ەلگە ءمالىم قالامگەر, ءبىر جىل بۇرىن دۇنيەدەن وتكەن كەنجەبولات جولدىبايدىڭ «اركىمنىڭ جولى – ءارتۇرلى ساپار» اتتى كىتابىنىڭ تۇساۋكەسەر ءراسىمى ءوتتى.
باس رەداكتورلار كلۋبى مەن ەۇۋ-ءدىڭ جۋرناليستيكا جانە ساياساتتانۋ فاكۋلتەتى بىرلەسىپ وتكىزگەن سالتاناتتى جيىنعا مارقۇمنىڭ تۋعان-تۋىستارى, ۇلىتاۋ, قاراعاندى, اتىراۋ وبلىستارىنان ارنايى كەلگەن مارتەبەلى مەيماندار, قر پارلامەنتى دەپۋتاتتارى, باس رەداكتورلار كلۋبىنىڭ مۇشەلەرى – وتاندىق باق باسشىلارى, جازۋشىلار, عالىمدار, ۋنيۆەرسيتەتتىڭ وقىتۋشىلارى مەن ستۋدەنتتەرى قاتىستى.
جاڭا كىتاپتىڭ تۇساۋى كەسىلگەن سوڭ, جينالعان جۇرت كەنجەبولات اعانىڭ مىنەز-قۇلىعى, بولمىس-ءبىتىمى, ادامدىق قالپى, قوعامداعى ورنى مەن ۇستانىمى, قازاق جۋرناليستيكاسى مەن ساياساتتانۋ عىلىمىنا سىڭىرگەن ەڭبەگى جونىندە وي-پىكىرلەرىمەن, جىلى ەستەلىكتەرىمەن ءبولىستى. مىنبەدەن سويلەگەن جانداردىڭ بارلىعى مارقۇمنىڭ رۋحاني مۇراسىنىڭ جوقتاۋشىسى, ارتىندا قالعان باي دۇنيەسىن قاعازعا ءتۇسىرىپ, 467 بەتتى قۇرايتىن كەرەمەت كىتاپ ەتىپ قۇراستىرعان ومىرلىك قوساعى توكەن قورعانبەكوۆاعا العىستارىن جاۋدىردى. توكەن اپانىڭ ءوزى كىتاپتى وتباسىنىڭ قاراجاتىنا شىعارسا دا 50 داناسىن ەۇۋ-ءدىڭ كىتاپحاناسىنا, تاعى ءبىر 50 داناسىن ۇلتتىق اكادەميالىق كىتاپحانانىڭ قورىنا سىيعا تارتقانىن ايتتى.
«فوليانت» باسپاسىنان 500 دانامەن جارىققا شىققان جيناقتا كەنجەبولات جولدىبايدىڭ سوڭعى جىلدارى وتاندىق باسپاسوزدە قازاق جانە ورىس تىلدەرىندە جاريالانعان ماقالالارى, سۇحباتتارى, وي-تولعامدارى توپتاستىرىلعان. بەس بولىمنەن تۇراتىن كىتاپتان وقىرمان اۆتوردىڭ قوعامنىڭ, ەلدىڭ دامۋى تۋرالى وي-تۇجىرىمدارىن, وزەكتى تاقىرىپتارعا ارنالعان سۇحباتتارىن, شەتەل ساپارى تۋرالى جازبالارىن, ك.جولدىبايدىڭ قازاق قوعامىنداعى تۇلعالار تۋرالى پايىم-تولعانىستارىن جانە ك.جولدىباي جايىنداعى ارىپتەستەرىنىڭ, جەرلەستەرىنىڭ, قالامداس جاناشىرلارىنىڭ ەستەلىكتەرىن وقي الادى.
