استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن «قارا شاڭىراق» قوعامدىق بىرلەستىگىنىڭ ۇيىمداستىرۋىمەن ەلوردادا جاس وتباسىلار اراسىنداعى «قازاعىمنىڭ داستۇرلەرى-اي» اتتى قالالىق سايىسىنىڭ ۇزدىكتەرى انىقتالدى.
قالالىق سايىس استانا قالاسىنىڭ جانە وعان ىرگەلەس اۋىلداردىڭ اۋماعىندا تۇراتىن, شاڭىراق كوتەرگەندەرىنە 1-5 جىل ارالىعىنداعى جاس وتباسىلاردىڭ اراسىندا وتكىزىلدى. وعان قاتىسۋعا 30-عا جۋىق وتباسىدان ءوتىنىم تۇسكەن. بايقاۋ شارتىنا سايكەس 9 وتباسى ىرىكتەپ الىندى. بايقاۋ ءبىر شاڭىراق استىندا بەرەكەلى ءومىر ءسۇرۋدىڭ ماڭىزىن ارتتىرۋ, قازاق حaلقىنىڭ سaلت-داستۇرلەرىن, ادەت-عۇرىپتaرىن زامانعا ساي جاڭعىرتىپ, جاستار ارaسىندا ناسيحaتتاۋ, وتباسى ينستيتۋتىنىڭ مارتەبەسىن كوتەرۋ, ىرگەسىن نىعايتۋ, ءداستۇرلى وتبaسىلىق قۇندىلىقتaردى جاستار اراسىندا دارىپتەۋگە باعىتتالدى. ۇلگىلى وتباسىلار بايقاۋى شىنىمەن دە ەلىمىزدە جانۇيا قۇندىلىقتارىنىڭ ءرولىن ارتتىرىپ, وتباسى مەن نەكەنىڭ وڭ ءيميدجىن دارىپتەيدى.
سايىستىڭ قازىلار القاسىنىڭ قۇرامىندا مەملەكەت جانە قوعام قايراتكەرى دارحان مىڭباي, ەلىمىزدىڭ ەڭبەك سىڭىرگەن قايراتكەرى, پۋبليتسيست ساۋلە مەشىتبايقىزى, تاريحشى, «قارا شاڭىراق» قوعامدىق بىرلەستىگىنىڭ ديرەكتورى تۇرار شاكەن, «ناز» بي مەملەكەتتىك تەاترىنىڭ ديرەكتورى ەركەبۇلان اعىمباەۆ, مادەنيەت قايراتكەرى, اقىن, سازگەر وسپان سۇلەيمەنۇلى, قالالىق ءماسليحات دەپۋتاتى ءمادينا اجىكەنوۆا, تەاتر جانە كينو اكتەرى تولقىن سۇلتان بولدى.
«قازاقتىڭ ەڭ باستى قۇندىلىعى – ءتىل, ءدىن جانە مادەنيەت. ونىڭ بارلىعى سالت-داستۇرگە ارقا سۇيەيدى. ال وتباسى داستۇرگە بەرىك بولسا, مەملەكەت تە مىقتى بولادى. سوندىقتان بۇگىنگى سايىستا ونەر كورسەتكەن وتباسىلار داستۇرگە بەرىك ەكەندەرىن انىق كورسەتە الدى» دەپ قازىلار القاسىنىڭ توراعاسى دارحان مىڭباي جەڭىمپازداردى قۇتتىقتاپ, وتباسى قۇندىلىقتارىن بەرىك ۇستانعان اۋلەتتەرگە ريزاشىلىعىن ءبىلدىرىپ, قۇرمەتىن جەتكىزدى.
جاس وتباسىلار ءۇش كەزەڭ بويىنشا سىنعا ءتۇستى. العاشقىسى «ءبىزدىڭ وتباسىنىڭ ءبىر كۇنى» اتتى بەينەسايىس كەزەڭى بولسا, ودان كەيىن «ون ساۋساقتان ونەر تامعان» كەزەڭىندە ەرى مەن زايىبىنىڭ ازىرلەپ اكەلگەن دۇنيەلەرى نازارعا ۇسىنىلدى. كەلىنشەكتەر ۇمىت بولا باستاعان ۇلتتىق دامدەردەن اس ازىرلەپ اكەلىپ, تاريحى مەن دايىندالۋ جولىن بايانداسا, جولداسى قامشى ءورۋ, تەڭگە سوعۋ, زەرگەرلىك ونەر, اعاش بۇيىمى, ءمۇسىن جاساۋ, ت.س.س. ءداستۇرلى ونەر بۇيىمىنىڭ تاريحى مەن ازىرلەنۋ جولىمەن تانىستىردى. «ونەر, ءبىلىم بار جۇرتتار» اتتى سوڭعى شىعارماشىلىق كەزەڭدە وتباسىلار وزدەرىن تانىستىرىپ, تاريح, ەتنوگرافيا, سالت-ءداستۇر, فولكلور, ماقال-ماتەل بويىنشا سۇراقتارعا جاۋاپ بەرىپ, ءان ايتىپ, بي بيلەپ, ونەر كورسەتتى.
«بۇل بايقاۋدىڭ كوپكە تيگىزەر پايداسى مول. ءار وتباسى قازاقتىڭ سالت-ءداستۇرىن ۇستانىپ, بالالارىنا كورسەتىپ وتىرعانى ءجون. سول ارقىلى سانالى ۇرپاق تاربيەلەيدى. مۇنداي جارىسقا ءبىز وتباسىمىزبەن ءبىرىنشى رەت قاتىسىپ وتىرمىز. بوس ۋاقىتىمدا بالالارىممەن اسىق ويناۋدى, ارقان تارتىستى ۇناتامىز» دەدى قاتىسۋشىلاردىڭ ءبىرى نۇرلىبەك سامەكوۆ.
سايىس قورىتىندىسى بويىنشا باس جۇلدە سامەك جانۇياسىنا, 1-ورىن ۇلىقپانۇلى وتباسىنا, 2-ورىن حالات جانۇياسىنا, 3-ورىن قازيەۆتەر وتباسىنا جانە «كورەرمەن كوزايىمى» نوميناتسياسى راشيتوۆتار وتباسىنا تابىستالدى. جەڭىمپاز وتباسىلارعا اعاشتان جاسالعان قازاقتىڭ تۇرمىستا قاجەت زاتتارى, جازۋشى زەينەپ احمەتوۆانىڭ سالت-ءداستۇر جايلى «كۇرەتامىر» كىتابى جانە بالالارعا ارنالعان بوياماقتار سىيعا بەرىلدى.
