وسى اپتادا استانا قالاسى اكىمدىگى حالىقتى جۇمىسپەن قامتۋ ورتالىعىنىڭ ۇيىمداستىرۋىمەن بوس جۇمىس ورىندارى جارمەڭكەسى ءوتتى. بيىلدىققا بەسىنشى رەت ۇيىمداستىرىلىپ وتىرعان ەڭبەك جارمەڭكەسىنە 68 جۇمىس بەرۋشى قاتىسىپ, ولار كەلۋشىلەرگە 1820 بوس جۇمىس ورنىن ۇسىندى.
اتالعان ورتالىق ديرەكتورى ازامات بايتاسوۆتىڭ ايتۋىنشا, بيىل وسىنداي 10 جارمەڭكە وتكىزۋ جوسپارلانعان.
– جارمەڭكەنى جىل سايىن وتكىزىپ كەلەمىز. وسىعان دەيىن بارلىعى 300 جۇمىس بەرۋشى قاتىستى. ەڭ كوپ سۇرانىسقا يە ماماندىقتار قاتارىندا – ساۋدا مەنەدجەرى, تاربيەشىلەر, ەسەپشىلەر, نەسيە مەنەدجەرلەرى-كونسۋلتانتتار, ساۋلەتشىلەر, ينجەنەر-جوبالاۋشىلار بار. سونىمەن قاتار دەنساۋلىق ساقتاۋ, ساۋدا, ءوندىرىس جانە قۇرىلىس سالاسىندا ماماندار جەتىسپەۋشىلىگى بايقالدى. جىل باسىنان بەرى وتكەن 4 جارمەڭكەگە 2 مىڭنان استام ادام كەلىپ قاتىستى. ونىڭ مىڭنان استامى كونسۋلتاتسيا الدى. سونىڭ ىشىندە 500-دەن استام ادام ەكىنشى رەت اڭگىمەلەسۋگە شاقىرىلسا, سودان 240 ادام جۇمىسقا قابىلداندى, – دەدى ورتالىق باسشىسى.
ورتالىقتىڭ جۇمىس بەرۋشىلەرمەن ءوزارا ءىس-قيمىل جونىندەگى ءبولىم باسشىسى باقىت راقىشەۆا بوس جۇمىس ورىندارىنىڭ دەنى ءبىلىم بەرۋ, دەنساۋلىق ساقتاۋ, قۇرىلىس, وڭدەۋ ونەركاسىبى سالالارىنان تابىلىپ وتىرعانىن جەتكىزدى.
– جارمەڭكەگە جوو ەندى بىتىرگەن تۇلەكتەر دە, ەرەسەكتەر دە كەلىپ قاتىسا الادى. سونىمەن قاتار اليمەنتتىك قارىزى بارلار, پروباتسيادا تىركەۋدە تۇرعاندار جانە باس بوستاندىعىنان ايرىلىپ, جازاسىن وتەپ شىققاندار مەن الەۋمەتتىك وسال توپتار وكىلدەرى دە جارمەڭكەگە قاتىسۋعا مۇمكىندىك الدى. باستاپقىدا تۇيىندەمەسىمەن كەلىپ, جۇمىس بەرۋشىمەن اڭگىمەلەسەدى. ءارى قاراي ءوزارا ءبىر شەشىمگە كەلگەن سوڭ ءبىز ارقىلى باسقا قۇجاتتارىن تۇگەندەپ تاپسىرادى. ءار جارمەڭكەگە 300-500 ادام قاتىسادى. جالپى مۇنداي جارمەڭكەنى قاراشا ايىنا دەيىن وتكىزۋ جوسپارلانعان, – دەيدى ول.
«استاناەنەرگوسبىت» جشس كادر ءبولىمىنىڭ مامانى ءاليا ىسقاقوۆا بۇل جارمەڭكەگە ەكى اپتا سايىن قاتىسىپ تۇراتىندارىن ايتتى. بۇل جولى ولار ەڭبەك جارمەڭكەسىنە كەلۋشىلەرگە 7 بوس جۇمىس ورنىن ۇسىنىپ وتىر. ولاردىڭ ىشىندە كونترولەر, ەلەكترومونتەر, وپەراتور سىندى ماماندىقتار بار.
ال م.تىنىشباەۆ اتىنداعى اقمولا كوللەدجى اتىنان 4 بوس جۇمىس ورنى ۇسىنىلدى. كوللەدجگە قازىرگى تاڭدا باس ەسەپشى, ەسەپشى, وقىتۋشى جانە ەدەن جۋشى قاجەت ەكەن. سونىڭ ىشىندە باس ەسەپشى ماماندىعىنا تاجىريبەسى بار ازاماتتار تاڭدالادى.
