قالا اكىمى جەڭىس قاسىمبەك تۇرعىندارعا كولىك قوزعالىسى مەن كەپتەلىسى ماسەلەلەرىن شەشۋدە قانداي ءىس-شارالاردىڭ اتقارىلىپ جاتقانىن بايانداپ, الداعى جوسپارمەن تانىستىردى.
«ماعان جول-كولىك جەلىسىن دامىتۋ بويىنشا سۇراقتار قويىلىپ جاتىر. وسىعان بايلانىستى اتقارىپ جاتقان جۇمىسىمىزعا قىسقاشا توقتالىپ وتەيىن. قالادا 430 مىڭعا جۋىق اۆتوموبيل بار. كۇن سايىن وبلىستان قالاعا قوسىمشا 90 مىڭعا جۋىق كولىك كىرىپ-شىعادى. جول-كولىك جەلىسىن جۇيەلى دامىتۋ ءۇشىن كوپىرلەر, كولىك قيىلىستارى, جاڭا كوشەلەر سالۋ, جول جوندەۋ جۇمىسى قارقىندى تۇردە جۇرگىزىلۋدە. قاربالاس ۋاقىتتا كولىك كوپ جۇرەتىن ۋچاسكەلەردىڭ ءبىرى – ماڭگىلىك ەل, قابانباي باتىر, تۇران داڭعىلدارى, سارايشىق, د.قوناەۆ كوشەلەرى جانە تاعى باسقا» دەپ جازدى جەڭىس قاسىمبەك الەۋمەتتىك جەلىدەگى پاراقشاسىندا.
اكىم جىل سوڭىندا پايدالانۋعا بەرىلەتىن تاۋەلسىزدىك داڭعىلى بويىنداعى جاڭا كوپىر كولىك قوزعالىسى ماسەلەسىن ءىشىنارا شەشەتىنىن ايتادى.
«بۇل كوپىر جولدارداعى كەپتەلىستى ەداۋىر جەڭىلدەتۋگە مۇمكىندىك بەرەدى: سول جاعالاۋدى تاۋەلسىزدىك داڭعىلىمەن, جاڭا تەمىرجول ۆوكزالىمەن, ر.قوشقارباەۆ داڭعىلىمەن, ج.ناجىمەدەنوۆ كوشەسىمەن, ازىرەت سۇلتان مەشىتىمەن, ا.بايتۇرسىنوۆ, قورداي, ايناكول كوشەلەرىمەن, ب.مومىشۇلى داڭعىلىمەن جانە ت. ب. قوسىمشا بايلانىستى قامتاماسىز ەتەدى» دەيدى قالا باسشىسى.
سونداي-اق قالا باسشىسى كەلەسى جىلى تاۋەلسىزدىك داڭعىلىنىڭ قابانباي باتىر داڭعىلىنا دەيىنگى جالعاسىن سالۋ جوسپارلانىپ وتىرعانىن جەتكىزدى. اكىمنىڭ ايتۋىنشا, بۇل قالانىڭ جاڭا بولىگىندەگى ماڭگىلىك ەل, قابانباي باتىر داڭعىلدارىندا, تۇركىستان, كەرەي-جانىبەك حاندار جانە ش.ايتماتوۆ كوشەلەرىندەگى كولىك اعىنىن سەيىلتەدى.
«سول سياقتى كەلەر جىلى كەنەسارى كوشەسىنىڭ بويىندا (قازگزۋ ۋنيۆەرسيتەتى اۋدانىندا) ەسىل وزەنى ارقىلى وتەتىن تاعى ءبىر كوپىردىڭ قۇرىلىسىن باستاۋ جوسپاردا بار. وتكەن جىلى ۇلى دالا داڭعىلىنىڭ بويىنداعى جاڭا كوپىر مەن ا62 كوشەسىنىڭ بويىندا (ا91 كوشەسىنەن استانا-قاراعاندى تاسجولىنا دەيىنگى ۋچاسكەدە) كولىك قوزعالىسى اشىلعان. بۇل دا بىرنەشە كوشەدەگى كولىك قوزعالىسىن جەڭىلدەتتى» دەپ ءسوزىن جالعادى ج.قاسىمبەك.
بۇدان بولەك, شاھار باسشىسى بيىل ەلوردا 400-گە جۋىق قوعامدىق اۆتوبۋسپەن تولىعاتىنىن ايتتى.
«ولاردىڭ ءبىر بولىگى قازىردىڭ وزىندە جەلىگە شىقتى. جوعارىدا ايتىلعان ءىس-شارالار, سونىڭ ىشىندە كوشەلەر سالۋ جانە جوندەۋ, اقىلدى باعدارشامدار ورناتۋ جانە اۆتوبۋس جەلىلەرىن ەنگىزۋ قالانىڭ كولىك جەلىسىن ايتارلىقتاي جاقسارتادى» دەدى ول.
