ورىس تەاترى شىمىلدىعىن اشتى
![](https://astana-akshamy.kz/wp-content/uploads/2022/10/WhatsApp-Image-2022-10-12-at-20.40.00-2-780x470.jpeg)
ەلورداداعى عاسىرلىق تاريحى بار, بايىرعى مادەني وردا – م.گوركي اتىنداعى مەملەكەتتىك اكادەميالىق ورىس دراما تەاترى 122-تەاتر ماۋسىمىنىڭ شىمىلدىعىن ءتۇردى. جاڭا ماۋسىم كەڭەس جازۋشىسى, رەجيسسەر ۆ.شۋكشيننىڭ اڭگىمەلەرىنىڭ نەگىزىندە قويىلعان «سۆەتلىە دۋمى» سپەكتاكلىمەن اشىلدى.
تەاتر جىل سايىن جاڭا ماۋسىمىن بەلگىلى ءبىر تاقىرىپقا ارنايدى. بيىلعى 122-ماۋسىم تاجىريبەسى مول, بىلىكتى ماماندارمەن تولىقتى. ناقتى ايتساق, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەكتەرى ۇجىمعا قوسىلدى. رەسپۋبليكامىزدىڭ بىرنەشە وبلىستارىنان كەلگەن جاس اكتەرلەر جاڭا ماۋسىمنىڭ جۇمىسىنا ەتەنە ارالاسۋدا.
– جاڭا ماۋسىمدى جاڭا لەپ, جاڭا كوزقاراسپەن ۇسىنباقپىز. سەبەبى ءبىزدىڭ ۇجىم گاسترولدىك ساپارمەن بيىل قوستاناي قالاسىندا بولىپ, 4 كۇندە 10 قويىلىم كورسەتتى. ودان كەيىن اكتەرلەر رەسەيدىڭ پەرم قالاسىندا مارتين ماكدوناحتىڭ شىعارماشىلىعى بويىنشا حالىقارالىق تەاتر فەستيۆالىنە قاتىستى. وندا «چەلوۆەك-پودۋشكا» سپەكتاكلى ۇسىنىلدى. وسىنداي ءىس-ساپارلاردىڭ بەرەرى مول. تەاتردىڭ تىنىسى اشىلا ءتۇستى دەپ ويلايمىن. جالپى ءبىزدىڭ تەاتر وزگەلەردىڭ رەپەرتۋارىندا ۇزاق تۇرمايتىن قويىلىمداردى قويۋىمەن ەرەكشەلەنەدى, – دەدى م.گوركي اتىنداعى ورىس دراما تەاترىنىڭ ديرەكتورى ەرنار جۇماتاەۆ.
ايتا كەتۋ كەرەك, تەاتر ارتىستەرى رەسەيدىڭ «ۇلكەن گاسترولدەر» باعدارلاماسىنا قاتىسىپ, نوۆوكۋزنەتسك قالاسىندا وتكەن ءىس-شارادا ءارتۇرلى جانرلارداعى بەس سپەكتاكلدى كورەرمەنگە تارتۋ ەتتى.