ەگەمەندى ەلىمىزدىڭ الدىڭعى قاتارلى مەملەكەتتەردىڭ قاتارىنا قوسىلۋىنا قىزمەت ەتەتىن بولاشاق ۇرپاقتى الەمدىك دەڭگەيدە ءبىلىم بەرۋ, ءبىلىم مازمۇنىنا جاڭاشا قاراۋ – باستى مىندەتتەردىڭ ءبىرى. قاسىم-جومارت كەمەلۇلىنىڭ بۇل جولداۋى ءوزىنىڭ ناقتىلىعىمەن جانە ماقساتتىلىعىمەن ەلدىڭ الداعى جىلدارعا ارنالعان الەۋمەتتىك-ەكونوميكالىق دامۋىنىڭ باسىم باعىتتارىن ايقىندايدى. قر پرەزيدەنتىنىڭ ءاربىر جولداۋى ءوز جاڭالىقتارىمەن, قۇندى ۇسىنىستارىمەن ەلىمىزدىڭ وركەندەۋىنە, جاڭعىرۋىنا نەگىز بولاتىن سالماقتى تۇجىرىمدارىمەن ەرەكشەلەنەدى.
2022 جىلى 1 قىركۇيەكتەگى پرەزيدەنت جولداۋىنىڭ نەگىزگى ءمانى جاڭا ەكونوميكالىق ساياسات, ناقتى سەكتوردى دامىتۋ, ەل بولاشاعىنا ارنالعان ستراتەگيالىق ينۆەستيتسيا, مەملەكەتتىك باسقارۋ ءىسىن قايتا جاڭعىرتۋ, زاڭ جانە ءتارتىپ ارقىلى ەلىمىزدىڭ دامۋىنا ارنالىپ وتىر.
ماعان ۇناعانى – 2023 جىلى جاڭا سالىق كودەكسىنىڭ ازىرلەنۋى, ول بويىنشا «ءسان-سالتاناتقا سالىق» ەنگىزۋ. بۇل ءبىزدىڭ قازاق تاريحىنداعى كەشەگى الاش زيالىلارىنىڭ الاشوردا باعدارلاماسىنداعى سالىق تابىسقا قاراي بايعا-بايشا, كەدەيگە-كەدەيشە ءادىل جولمەن سالىنۋ كەرەكتىگىمەن ۇشتاسىپ جاتقانداي.
اۋىل شارۋاشىلىعىن دامىتۋ, سۋ ماسەلەسىن شەشۋ جولدارى – بۇگىنگى اۋىلداعى شارۋاشىلىقپەن اينالىسىپ وتىرعان حالىقتىڭ وزەكتى ماسەلەسى. قازاق – ەجەلدەن جەردەن بۇرىن مال ءوسىرىپ, بەرەكەسىن كەلتىرگەن حالىق. الايدا بۇگىنگى كۇندە كورشىلەرىمىز رەسەي, قىتاي, ورتالىق ازيا ەلدەرىنەن كەلەتىن سۋ كوزدەرىنىڭ ازايۋىنان كول-تابان, شابىندىقتاردىڭ كەۋىپ, قۇرعاپ قالىپ, اۋىل شارۋاشىلىعىن كەرى كەتىرۋدە. ودان اۋىل حالقى مال شارۋاشىلىعىمەن اينالىسۋ قيىندىعىنان اۋدان, كەنت, قالاعا ۋربانيزاتسيالانىپ, جاس پەن كارىڭنىڭ ەكى قولعا ءبىر كۇرەك تابا الماي جاتقاندىعىن ەشكىم جوققا شىعارا الماس. الايدا پرەزيدەنتىمىزدىڭ باستاماسى وڭىنان بولسا, كوپتەگەن اۋىل حالقىنىڭ ارمان-تىلەگى ورىندالىپ, اۋىل تامىرىنا قان ءجۇرىپ, شارۋاشىلىقتارى العا باسارى ءسوزسىز.
كاسىپكەرلىكتى جۇيەلى تۇردە قورعاۋ بۇل ەرتەڭگى ەلىمىزدىڭ وركەندەۋىنە زور مۇمكىندىك بەرەرى ءسوزسىز. وتاندىق بيزنەس ءۇشىن نەسيەلەر مولشەرىن ارتتىرۋ ارقىلى شاعىن جانە ورتا بيزنەستى دامىتۋعا بولار ەدى. سونىڭ ىشىندە جىل سايىن اۋىل جاستارىنىڭ شارۋاشىلىقتارىنا ارنالعان نەسيەلەر مولشەرى ۇلعايتىلسا, جاستاردىڭ ەرىنشەكتىك, اتا-انا پەنسياسىنا قاراپ وتىرۋ سياقتى ماسىلدىقتان ادا قىلار ەدى.
ءبىلىم بەرۋ جۇيەسىندەگى وزگەرىستەر, اسىرەسە, ءوسىپ كەلە جاتقان جاستاردى قۋانتقانى ءسوزسىز. سەبەبى كوپ جاستار مەملەكەتتىك گرانتقا ءۇمىتتى تالاپكەرلەردىڭ كوپتىگىنەن جوعارى وقۋ ورىندارىنا تۇسە الماي قالىپ جاتاتىنى جاسىرىن ەمەس. بۇل, اسىرەسە, كوپبالالى وتباسىلار ءۇشىن قيىندىق تۋعىزىپ وتىرعانى ءمالىم. پرەزيدەنت جولداۋىندا جاستارعا 2-3 پايىزدىق نەسيە بەرۋ ارقىلى جوو وقي الاتىنى كوپتىڭ ۇمىتسىزدىگىنە قۋانىش سىيلادى دەپ ايتا الامىن. قازىرگى قوعامدا باسەكەگە قابىلەتتى جاستاردىڭ جوعارى ءبىلىم العانى قاي ەل ءۇشىن بولسا دا ماڭىزدى. سەبەبى ەلدىڭ ەرتەڭى – وسى جاستاردىڭ قولىندا.
«ۇلتتىق قور – بالالارعا» جاڭا باعدارلاماسى اياسىندا 2024 ج. 1-قاڭتارىنان باستاپ ۇق جىل سايىنعى ينۆەستيتسيالىق تابىسىنىڭ 50 پايىزى 18 جاسقا دەيىنگى ءار قازاق ۇل-قىزىنىڭ شوتىنا اۋدارۋ ەل كۇتپەگەن جاڭالىق بولدى. بۇل دا الاش قايراتكەرى ا.بوكەيحانوۆتىڭ «قازاقتىڭ ءاربىر تاسى قازاقتىڭ وڭىرىنە تۇيمە بولىپ قادالۋى كەرەك» دەگەنىمەن بىردەي. ەڭبەكاقىنى دا نارىقتىق جاعدايلارعا ساي ءوسىرۋ, ايەل-انالارىمىزدىڭ زەينەت جاسىنىڭ 2028 ج دەيىن ۇزارماي تومەندەتىلۋى, بالا كۇتىمىنە بەرىلەتىن تولەماقىنىڭ كەلەر جىلدان باستاپ ءار ءسابيدىڭ ءبىر جارىم جاسقا تولعانعا دەيىن ۇزارتىلۋى كوپتىڭ قۋانىشىنا اينالدى دەپ ويلايمىن.
قازاقستاننىڭ جارقىن بولاشاعىن جانكەشتى ەڭبەك ارقىلى قۇرۋعا بولادى. قازاقستان ءۇشىن قىزمەت ەتۋ – بۇل كەدەيلىكتى, اۋرۋلاردى, تەڭسىزدىكتى كەلمەسكە كەلتىرۋ. ءبىزدىڭ زامانىمىزدىڭ الاش قايراتكەرلەرىنىڭ جوعارى ماقساتى مەن اسىل ارمانى – ءار قازاقتىڭ كوزىندەگى ءاربىر جاس تامشىسىن ءسۇرتۋ بولاتىن. وسى جولداعى قىزمەتىمىز پرەزيدەنتىمىزبەن بىرگە ار-نامىسپەن جۇرە وتىرىپ ءوز ەلىمىزگە, ونىڭ حالقىنا جانە بۇدان كەڭ اۋقىمدا قىزمەت ەتۋمىز كەرەك دەپ ەسەپتەيمىن.
اسقار ساعىنعاليۇلى,
استانا قالاسى №38 مەكتەپ-ليتسەيىنىڭ مۇعالىمى
