ەلوردانىڭ ءتارتىپ ساقشىلارى وتباسىلىق زورلىق-زومبىلىقتىڭ الدىن الۋ ماقساتىمەن بىرقاتار ءىس-شارالاردى جۇزەگە اسىرۋدا. سونىڭ ءبىرى – وتباسىلىق جانجالشىلارمەن پروفيلاكتيكالىق اڭگىمە جۇرگىزۋ.
بۇل ورايدا پوليتسيا قىزمەتكەرلەرى ۇكىمەتتىك ەمەس ۇيىمدارمەن بىرلەسىپ, جۇمىس اتقارۋدا. وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىق ءىس-قيمىلداردىڭ الدىن الۋ ءۇشىن تۇراقتى تۇردە پروفيلاكتيكالىق اڭگىمە وتكىزىلەدى.
«مۇنداي اڭگىمەلەردىڭ نەگىزگى ماقساتى – ىشكى ىستەر ورگاندارىندا پروفيلاكتيكالىق ەسەپتە تۇرعان ادامداردى ماس كۇيىندە تۇرمىستىق زورلىق-زومبىلىقتىڭ جولىن كەسۋ باعىتىندا قابىلدانىپ جاتقان ءىس-شارالار تۋرالى حاباردار ەتۋ, وتباسىنداعى تىنىشتىقتى ساقتاۋ جانە وتباسىنىڭ قوعامداعى ءرولىن نىعايتۋ بولىپ تابىلادى» دەدى پوليتسيا قىزمەتكەرلەرى. ەڭ باستىسى, مۇنداي جاعدايدا جابىرلەنۋشى ازاماتتار قۇزىرلى مامانداردان قۇقىقتىق جانە الەۋمەتتىك ماسەلەلەر بويىنشا جەكە كەڭەس الادى.
ەندى وسىعان ناقتى مىسالدار كەلتىرەيىك. نۇر-سۇلتان قالاسىنىڭ پوليتسيا دەپارتامەنتىنەن الىنعان مالىمەتتە ايتىلعانداي, ەسىل اۋداندىق پوليتسيا باسقارماسىنىڭ ۋچاسكەلىك پوليتسيا ينسپەكتورىنا قايىم مۇحامەدحانوۆ كوشەسىندەگى تۇرعىن ۇيلەردىڭ ءبىرىنىڭ تۇرعىنى كومەك سۇراپ, حات جازعان. تەكسەرۋ بارىسىندا قۇزىرلى ورگان قىزمەتكەرىنە جۇگىنگەن ايەلدىڭ كۇيەۋى وتباسىندا جانجال شىعارىپ, سول جەردە ايەلىنە بالاعات سوزدەر ايتىپ, دەنساۋلىعىنا زيان كەلتىرمەيتىن فيزيكالىق كۇش قولدانعانى انىقتالعان.
كوپ ۇزاماي جانجال شىعارعان ەركەك ۋاقىتشا ۇستاۋ اباقتىسىنا قامالدى. وعان قاتىستى 1 اي مەرزىمگە قورعاۋ ۇيعارىمى شىعارىلدى. پوليتسيا قىزمەتكەرلەرى قورعاۋ نۇسقاۋلىعىنىڭ شەكتەۋلەرىن, تۇرمىستا قۇقىق قايشى كەلەتىن ءىس-ارەكەتتەرگە جول بەرگەنى ءۇشىن قۇقىقتىق جاۋاپكەرشىلىگىن ءتۇسىندىردى.
زاڭ شەڭبەرىندە جانجال شىعارعان ادامعا قازاقستان رەسپۋبليكاسىنىڭ اكىمشىلىك-قۇقىق بۇزۋشىلىق كودەكسىنىڭ 73-بابى, 2-تارماعى بويىنشا «ۇرىپ-سوعۋ» دەگەن ايىپپەن اكىمشىلىك ءىس قوزعالدى. مامانداندىرىلعان اۋدانارالىق اكىمشىلىك سوتتىڭ شەشىمىمەن قۇقىق بۇزعان ادام كىنالى دەپ تانىلدى. ونىڭ مىنەز-قۇلقىنا ەرەكشە تالاپتار قويا وتىرىپ, ەسكەرتۋ تۇرىندە جازا قولدانىلدى. ياعني, وتاعاسىنا جۇبايىمەن 6 مەرزىمگە دەيىن كەزدەسۋگە, قارىم-قاتىناس جاساۋعا تىيىم سالىندى. ال جابىرلەنگەن ايەلگە قۇقىقتىق جانە پسيحولوگيالىق كومەك كورسەتىلدى.
ەسىل اۋداندىق پوليتسيا باسقارماسىنىڭ باستىعىنىڭ ورىنباسارى مارات دۋباەۆتىڭ ايتۋىنشا, 2022 جىلدىڭ باسىنان بەرى اۋدان بويىنشا وتباسىلىق-تۇرمىستىق سالاداعى ماتەريالدارعا قاتىستى سوت شەشىمدەرى بويىنشا 115 قۇقىق بۇزۋشى قاماۋعا الىنىپ, قابىلداۋشى جانە ءبولۋشى ورىنعا ورنالاستىرىلعان. ەلوردا بويىنشا 102 نومىرىنە جىل باسىنان بەرى وتباسىلىق-تۇرمىستىق ماسەلەلەرگە قاتىستى 9972 قوڭىراۋ كەلىپ تۇسكەن. التى ايدىڭ ىشىندە 1045 ادام اكىمشىلىك جاۋاپكەرشىلىككە تارتىلىپتى. سونداي-اق 4432 ادامعا قورعاۋ ۇيعارىمى شىعارىلعان, 250 قۇقىق بۇزۋشىنىڭ مىنەز-قۇلقىنا ەرەكشە تالاپتار بەلگىلەنگەن. بارلىعى 265 ادام مەديتسينالىق مەكەمەگە ماجبۇرلەپ ەمدەلۋگە جىبەرىلگەن.
