ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا رەسەي ازاماتتارىنا جۇمىس ىستەۋگە شەكتەۋ قانداي جاعدايدا قويىلاتىنىن ءتۇسىندىردى. ونىڭ ايتۋىنشا, ەاەو شارتىنا سايكەس, رەسەيلىكتەردىڭ قازاقستاندا ەركىن ءجۇرىپ, رۇقساتسىز جۇمىس ىستەۋىنە قۇقىعى بار.
ىشكى ىستەر مينيسترلىگىنىڭ مالىمەتىنشە, كەيبىر رەسەيلىكتەر قازاقستانعا كەلىپ, بىردەن (باسقا ەلگە, – اۆتور) كەتىپ جاتىر. ەاەو شارتىنا سايكەس, قازاقستاندىقتار اتالعان وداققا مۇشە ەلدەردە رۇقساتسىز جۇمىس ىستەي الادى. مىنە, تۋرا وسى سياقتى رەسەيلىكتەردىڭ بىزدە رۇقساتسىز ەڭبەك ەتۋگە مۇمكىندىگى بار. الايدا ولار قازاقستاننىڭ ۇلتتىق قاۋىپسىزدىگىنە قاۋىپ توندىرسە, ءتيىستى سالالاردا جۇمىسقا قابىلداۋعا شەكتەۋ قويىلادى, – دەدى مينيستر ءماجىلىس وتىرىسىنان كەيىن جۋرناليستەردىڭ ساۋالىنا جاۋاپ بەرگەن ساتىندە.
تامارا دۇيسەنوۆا ەلدەگى قاۋىپسىزدىك ماسەلەسىنە ۇلتتىق قاۋىپسىزدىك كوميتەتى جاۋاپ بەرەتىنىن اتاپ ءوتىپ, رەسەيلىكتەرگە قازاقستاندا جۇمىس ىستەۋگە قانداي جاعدايدا شەكتەۋ قويىلاتىنىن ءتۇسىندىردى. «ەڭبەك نارىعىنا توقتالايىن. قازىر قازاقستاندا 8,7 ملن ادام جۇمىس ىستەپ ءجۇر. ونىڭ 90%-ىنان استامى رەسەيدەن كەلىپ جۇمىس ىستەسە, وندا ولاردى جۇمىسقا قابىلداۋ توقتاتىلادى. بۇگىندە رەسەيلىكتەرگە جۇمىس تاۋىپ بەرۋ تۋرالى تاپسىرما بەرىلگەن جوق. مۇنداعى ماسەلە قازاقستاننىڭ حالىقارالىق شارتتاردى تولىق ورىنداۋىنا قاتىستى. بۇل – مىندەت» دەدى ۆەدومستۆو باسشىسى.
سونداي-اق ول ەلىمىزدە قانشا رەسەيلىك جۇمىس ىستەۋگە نيەت بىلدىرگەنىنە قاتىستى دەرەككە توقتالدى. «كەشە مەن سىزدەرگە 6508 ادام جۇمىس ىستەۋگە نيەت بىلدىرگەنى تۋرالى ايتتىم. بۇگىن ولاردىڭ سانى 5300 ادام بولدى, دەمەك 1200-گە ازايدى. ءتيىستى نورمادان اسىپ كەتسە, ءبىز شەكتەۋ ەنگىزۋ ماسەلەسىن قاراستىرامىز. قازىر ساندار كۇن سايىن وزگەرىپ جاتىر» دەدى تامارا دۇيسەنوۆا.
