«حان شاتىر» ساۋدا, ويىن-ساۋىق ورتالىعىندا قالالىق مەملەكەتتىك كىرىستەر دەپارتامەنتىنىڭ ۇيىمداستىرۋىمەن «سالىقتار تۋرالى سۇرا!» ناۋقانى ءوتتى.
«اتالمىش اكتسيا سالىق سالۋ ماسەلەسىندە حالىقتىڭ سالىقتىق ساۋاتىن ارتتىرۋ, سونداي-اق «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە جەكە جانە زاڭدى تۇلعالارعا كومەك كورسەتۋگە باعىتتالدى» دەدى ءوز سوزىندە استانا قالاسى مەملەكەتتىك كىرىستەر دەپارتامەنتى مەملەكەتتىك قىزمەتتەر ءبولىمىنىڭ باسشىسى الماگۇل نادارحانوۆا.
ازاماتتاردىڭ كولىك, جەر جانە مۇلىك سالىعى بويىنشا بەرەشەكتى تەكسەرۋ ءراسىمى, سونداي-اق, جالپىعا بىردەي دەكلاراتسيالاۋ, كاسىپكەرلەردىڭ قىزمەتىن تىركەۋ جانە توقتاتۋ, ارنايى سالىق رەجيمىن قولدانۋ, بولشەك سالىق بويىنشا وزگەرىستەر, POS-تەرمينالداردى قولدانۋ, eSalyq Azamat, eSalyq Business ءموبيلدى قوسىمشالارىن پايدالانۋ سەكىلدى ماسەلەلەر بويىنشا اقپارات ايتىلدى. ءىس-شاراعا قاتىسۋشىلار وزدەرىن قىزىقتىرعان سۇراقتارعا جان-جاقتى جاۋاپ الدى. العاش رەت وتكىزىلگەن ناۋقانعا 300-گە جۋىق ازامات قاتىستى.
