ەلوردانىڭ سىرباي ماۋلەنوۆ اتىنداعى №37 مەكتەپ-ليتسەيىندە قازاقستاننىڭ حالىق جازۋشىسى, مەملەكەتتىك سىيلىقتىڭ يەگەرى, كورنەكتى اقىن سىرباي ماۋلەنوۆتىڭ 100 جىلدىعىنا وراي «ولەڭىم – ءومىرىم مەنىڭ» اتتى رەسپۋبليكالىق عىلىمي-پراكتيكالىق كونفەرەنتسيا ءوتتى.
كونفەرەنتسياعا استانا قالاسى ءبىلىم باسقارماسىنىڭ جالپى ورتا ءبىلىم بەرۋدىڭ مازمۇنى مەن ادىستەمە ءبولىمىنىڭ باسشىسى اسىل امانگەلدىقىزى, اقىننىڭ ۇلى قاسىم سىربايۇلى, نەمەرەسى مەن كەلىنى,
قوستاناي وبلىسىنداعى اقىن اتىنداعى مەكتەپتەردىڭ باسشىلارى, ەلوردا مەكتەبىندە «ماۋلەنوۆ مۇراجايىن» اشۋعا مۇرىندىق بولعان وسى مەكتەپتىڭ 2016-2021 جىلدارداعى باسشىسى الماگۇل تلەكتەسقىزى مەن مەكتەپتىڭ تۇڭعىش ديرەكتورى احمەت بازىل قاتىستى.
كونفەرەنتسيادا اقىننىڭ ۇلى قاسىم سىربايۇلى اكەسىن ساعىنىشپەن ەسكە الىپ, بايانداما وقىسا, سىرباي ماۋلەنوۆتىڭ كوزىن كورگەن, فيلولوگيا عىلىمدارىنىڭ دوكتورى, پروفەسسور سەرىك نەگيموۆ پەن حالىقارالىق «الاش» ادەبي سىيلىعىنىڭ لاۋرەاتى, «پاراسات» وردەنىنىڭ يەگەرى سەرىك تۇرعىنبەكۇلى دا اقىن جايلى سىر شەرتىپ, ەستەلىكتەرىمەن ءبولىستى.
كونفەرەنتسيا سوڭىندا ەلوردانىڭ ءبىلىم بەرۋ ۇيىمدارى اراسىندا اقىن سىرباي ماۋلەنوۆتىڭ 100 جىلدىق مەرەيتويىنا وراي «سىربايدىڭ عاجاپ سىرلارى…» اتتى قالالىق دەڭگەيدە وتكىزىلگەن ەستافەتا قورىتىندىسى جاريالانىپ, جەڭىسكە جەتكەن مەكتەپتەر ماراپاتتالدى.
