ساكەن مەن احمەت ساباقتاستىعى
![](https://astana-akshamy.kz/wp-content/uploads/2023/09/375462789_3678114152423124_425859711604365439_n-780x470.jpg)
استانا قالاسى مادەنيەت باسقارماسىنا قاراستى مەكەمەلەردە قازاقستان حالقى تىلدەرى كۇنىنە وراي بىرقاتار ءىس-شارا ءوتتى. م.اۋەزوۆ اتىنداعى ورتالىق قالالىق كىتاپحانادا «دانالىق ديقانشىسى» اتتى تانىمدىق ساعات, ال ساكەن سەيفۋللين مۇراجايىندا ءدارىس وقىلدى.
تانىمدىق ساعات «ۇلتتىڭ ساقتالۋىنا دا, جوعالۋىنا دا سەبەپ بولاتىن نارسەنىڭ ەڭ قۋاتتىسى – ءتىلى» دەگەن قازاق ءتىل ءبىلىمىنىڭ اتاسى احمەت بايتۇرسىنۇلىنىڭ مۇرالارىنا ارنالدى. وعان №6636 اسكەري ءبولىمىنىڭ جاۋىنگەرلەرى قاتىستى. تاعىلىمدى شارا بارىسىندا ۇلت ۇستازىنىڭ جاس ۇرپاققا ۇلاعات بولار سوزدەرى ايتىلىپ, ەڭبەكتەرىنىڭ كورمەسى ۇيىمداستىرىلدى. سونداي سوزدەرىنىڭ ءبىرى – «ءبىلىمدى بولۋعا وقۋ كەرەك, باي بولۋعا كاسىپ كەرەك». ال كورمەدەن «ءتىل – قۇرال», «ادەبيەت تانىتقىش», ت. ب. ەڭبەكتەرى ورىن الدى.
تىلدەر كۇنىنە ارنالعان ءدارىستى تاريحي-مادەني مۇرا وبەكتىلەرىن جانە ەسكەرتكىشتەردى ساقتاۋدى قامتاماسىز ەتۋ ورتالىعىنىڭ قىزمەتكەرى قابيدەن قۋانىشباي وقىدى. ءدارىستىڭ ءدال ساكەن سەيفۋللين مۋزەيىندە وقىلۋىنىڭ ءوز سەبەبى بار. ساكەن سەيفۋللين 1922 جىلى احمەت بايتۇرسىنۇلىنىڭ 50 جىلدىق مەرەيتويىن ۇيىمداستىرىپ, جوعارى دەڭگەيدە وتۋىنە مۇرىندىق بولعان. قانشاما قارسىلىققا قاراماي وسى شارانى ءساتتى اتقارىپ شىققان. «كەڭسە ءتىلى – قازاق ءتىلى بولسىن» دەپ شىرىلداعان دا ساكەن ەدى. احمەت تە, ساكەن دە قازاقتىڭ ءتىلىن قاسيەتتى تۇعىرىنا قوندىرۋ ءۇشىن ەڭبەك ەتتى. شارا بارىسىندا قوس تۇلعانىڭ اراسىنداعى ساباقتاستىق اڭگىمە وزەگىنە اينالدى.