تازا قالا – جايلىلىق پەن وركەنيەتتىڭ بەلگىسى. الايدا اينالامىزدىڭ تازالىعىن ساقتاۋدا ءالى دە دامىعان ەلدەر كوشىنە ىلەسە الماي كەلەمىز. سوندىقتان ازىرگە قالا تازالىعىنا جاۋاپتى «استانا تازالىق» جشس سىندى مەكەمەلەر جۇمىسشىلارىنا جۇكتەمە كوپ ءتۇسىپ تۇر. وسى ۇجىمدا ءۇش جىلدان بەرى قولمەن جيناۋ جونىندەگى بريگاديرى بولىپ ەڭبەك ەتەتىن گۇلشات جانپەيىسوۆانىڭ ءبىر كۇنگى جۇمىسىن كورىپ, سوعان كوز جەتكىزدىك.
ەسىل اۋدانىنداعى كوشەلەردى قوقىس پەن ارام شوپتەن تازالايتىن گۇلشاتتىڭ بريگاداسىندا 10-15 جۇمىسشى بار. ولاردىڭ ءبىرازى عانا قالادا تۇرسا, كوبى ەلوردا ماڭىنداعى الىس اۋىلداردان قاتىنايدى. گۇلشاتتىڭ ءوزى ەلوردادان 120 كم جەردەگى قاراعاندى وبلىسى نۇرا اۋدانى بايتۋعان اۋىلىنان كۇن سايىن كەلىپ جۇمىس ىستەيدى. بۇعان سەبەپ – اۋىلدا جۇمىستىڭ جوعى, بولسا دا 50-60 مىڭ تەڭگە عانا ايلىق بەرەتىنى. ال مۇندا تۇراقتى جۇمىس, اۋقىمدى جالاقى بەرىلەدى. تەك تاڭعى 2.00-دە تۇرىپ, مەكەمەنىڭ كولىگىمەن قالاعا جەتۋى كەرەك, سوسىن تاڭعى 6.00-دە كوشە تازالاۋ جۇمىسىنا كىرىسۋى ءتيىس.
– جۇمىس 7 ساعاتقا سوزىلىپ, 15.00-دە بىتەدى. سوسىن كەلەسى اۋىسىم جۇمىسى باستالادى. جۇما كۇنى جارتى جۇمىس كۇنىن ىستەپ, سەنبى دەمالامىز. قالعان كۇندەرى اۋىل مەن استانا اراسىن تاڭنان باستاپ جول قىلامىز. مۇندا جۇمىس ىستەيتىن ايەلدەردىڭ جاسى 38-57 جاس ارالىعىندا. ءبىر كۇندە ەسىل اۋدانى بويىنشا كوشە تازالىعىنا 10 بريگادا شىقسا, سونىڭ ىشىندە ءبىزدىڭ بريگادا سول جاعالاۋداعى سىعاناق, تۇركىستان, اقمەشىت, كەرەي مەن جانىبەك حاندار, ساۋران كوشەلەرىنىڭ جانە كوپىر استىنىڭ تازالىعىنا جاۋاپتىمىز. كەيدە بۇل مەكەنجايلار اۋىسىپ تۇرادى. وسى كوشەلەرگە بريگاداداعى جۇمىسكەرلەردى بولەمىن. تاڭەرتەڭ جيناپ كەتكەن جەر تۇستەن كەيىن قايتا شاشىلىپ جاتادى. اسىرەسە جازدا قيىن. قاي كوشەدە قوقىس كوپ, ارام ءشوپتى موتوكوسا قۇرالىمەن جۇلۋ كەرەك بولسا سوندا بولەدى. جۇمىسشىلارعا فورما, قولعاپ, قوقىس سالاتىن قاپ, قوقىستاردى قىستىرىپ الاتىن ارنايى قۇرال بەرىلەدى. قىستا قوقىس كورىنبەۋى مۇمكىن, ول كەزدە, نەگىزىنەن, قار تازالاۋ تەحنيكالارى الا المايتىن جەرلەردى كۇرەكپەن تازالاۋ جۇمىستارىنا كىرىسەمىز. 10 بريگاداعا 5-6 كاماز كولىگى بولىنەدى. كۇنىنە ءبىر بريگادادان 50 قاپتاي قوقىس جينالادى. ادامدار سۋىن ءىشىپ بولىپ, باكلاجكا, پاكەت, قاعاز, سالفەتكا, ءيتتىڭ ءناجىسىن تاستاي سالادى, بىرەۋلەر كولىكتە كەتىپ بارا جاتىپ, بىرەۋلەر ءۇي تەرەزەسىنەن لاقتىرا سالۋى مۇمكىن. ونىڭ ءبارى ۇشىپ, كوشەلەرگە تارالادى. كەيبىر تۇرعىندار قوقىس جاشىگىنە جەتپەي تاستاپ كەتەدى. ارينە, سونىڭ ءبارىن جيناۋ – ءبىزدىڭ مىندەتىمىز, بىراق ەلوردا حالقىنىڭ استانالىق دەگەن اتقا لايىق بولىپ, اينالاسىن مەيلىنشە تازا ۇستاعانىن دا قالايسىڭ, – دەيدى گۇلشات بريگادير.
الىس اۋىلدان كۇن سايىن ات ارىلتىپ كەلىپ, ناپاقاسىن تاۋىپ جۇرگەن بريگادير گۇلشاتتىڭ جولداسى مال شارۋاشىلىعىمەن اينالىسادى. باسىندا بۇل جۇمىستى ۋاقىتشا ىستەپ كەتەرمىن دەپ كەلگەن ول قازىر بۇعان ۇيرەنىپ كەتىپتى. قاراپايىم جۇمىسشىلار ءۇشىن باستىسى – اۋىلدا بوس جۇرگەننەن گورى قالادا كولەمدىلەۋ جالاقى بەرەتىن تۇراقتى جۇمىسىنىڭ بولۋى. جالپى قالا بويىنشا كۇنىنە ەكى اۋىسىمداعى تازالاۋ جۇمىستارىنا اتالعان سەرىكتەستىكتىڭ 200-دەن استام جۇمىسشىسى جۇمىلدىرىلادى. ولار قالانى تازالاۋ جۇمىستارىنىڭ 42,9 پايىزىن اتقارسا, قالعانىن وزگە دە مەردىگەر مەكەمەلەر ىستەيدى.
