استانادا قازاقستان دراما تەاترلارىنىڭ رەسپۋبليكالىق XXVIII فەستيۆالى ءوتىپ جاتىر.
بيىلعى سالتاناتتى ءىس-شارا تەاتر مەن كينونىڭ كورنەكتى اكتريساسى, كسرو حالىق ءارتىسى, قازاقستان مەملەكەتتىك سىيلىعىنىڭ لاۋرەاتى شولپان جانداربەكوۆانىڭ 100 جىلدىعىنا ارنالدى. سونداي-اق فەستيۆال اياسىندا قازاقستاننىڭ حالىق ءارتىسى قادىر جەتپىسباەۆتىڭ 80 جىلدىعىنا ارنالعان ءىس-شارالار جوسپارلاندى.
23 قازانعا دەيىن جالعاساتىن ءىس-شاراعا ساراپتاما كەڭەسىنىڭ شەشىمى بويىنشا ىرىكتەۋدەن وتكەن 10 تەاتر قاتىسادى. قويىلىمداردى تانىمال تەاتر سىنشىلارىنان قۇرالعان قازىلار القاسى باعالايدى.
– بۇل – فەستيۆال ەلىمىزدىڭ مادەني ومىرىندەگى ەڭ اۋقىمدى جانە ماڭىزدى جوبالاردىڭ ءبىرى. ول كورەرمەندەردى شىعارماشىلىق ۇجىمدارمەن تانىستىرىپ قانا قويماي, سونىمەن قاتار جاس اكتەرلەرگە, رەجيسسەرلەرگە جانە جازۋشىلارعا ۇلكەن ساحنادان مالىمدەمە جاساۋعا مۇمكىندىك بەرەدى. فەستيۆال باعدارلاماسى بارىنشا اۋقىمدى جانە بۇل بىزگە ەڭ وزەكتى ماسەلە بويىنشا ساراپتاما جۇرگىزۋگە مۇمكىندىك بەرەدى, – دەدى مادەنيەت جانە سپورت ءمينيسترى داۋرەن اباەۆ رەسمي اشىلۋ سالتاناتىندا.
ءمينيستردىڭ ايتۋىنشا, شولپان جانداربەكوۆانىڭ شىعارماشىلىق جولى – سۇيىكتى ىسىنە ادالدىق پەن ناعىز كاسىبيلىكتىڭ جارقىن ۇلگىسى.
فەستيۆالگە س.قوجامقۇلوۆ اتىنداعى جەزقازعان قازاق مۋزىكالىق-دراما تەاترى, ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى, ءا.مامبەتوۆ اتىنداعى مەملەكەتتىك دراما جانە كومەديا تەاترى, ف.دوستوەۆسكي اتىنداعى مەملەكەتتىك ورىس دراما تەاترى, اقمولا وبلىستىق ورىس دراما تەاترى, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترى, م.گوركي اتىنداعى مەملەكەتتىك اكادەميالىق ورىس دراما تەاترى, تۇركىستان مۋزىكالىق دراما تەاترى, رەسپۋبليكالىق اكادەميكالىق نەمىس دراما تەاترى قاتىسادى.
