ۇلتتىق مۋزەيدە قر ەڭبەك سىڭىرگەن قايراتكەرى, «پاراسات» وردەنىنىڭ يەگەرى, تۋىندىلارى تەك ەلىمىزدە عانا ەمەس, شەتەلدە دە تانىمال سۋرەتشى الپىسباي قازىعۇلوۆتىڭ شىعارماشىلىعىنا ارنالعان دوڭگەلەك ۇستەل وتكىزىلىپ, كورمە ۇيىمداستىرىلدى.
دوڭگەلەك ۇستەل بارىسىندا سۋرەتشى جەڭىس كاكەنۇلى «الپىسباي قازىعۇلوۆتىڭ اتى اتالسا, ءتۇرلى تۇستەردىڭ جۇمباق ۇيلەسىمىنىڭ كىلتىن تاپقان شەبەر, ەشكىمگە ۇقسامايتىن سيرەك شىعارماشىلىق يەسى كوز الدىمىزعا كەلەدى. وسىنداي كوزقاراس ارقىلى ادامعا راحات سەزىمىن سىيلاپ, ءتانتى ەتۋ قاشاندا ءوز باعاسىن الادى دەپ ويلايمىن» دەپ سۋرەتشىنىڭ اسقان شەبەرلىگىن اتاپ ءوتتى.
«جاڭاشىلدىق جانە اۆتورلىق ءادىستىڭ بىرەگەيلىگى» اتتى دوڭگەلەك ۇستەلدە قازاق بەينەلەۋ ونەرىنىڭ بۇگىنگى احۋالى, ەلىمىزدەگى ارت-نارىقتىڭ قالىپتاسۋىنداعى وزەكتى ماسەلەلەر تالقىلاندى. سونىمەن قاتار الپىسباي قازىعۇلوۆ شىعارماشىلىق جولىنداعى قىزىقتى كەزدەردى ەسىنە الىپ, ەستەلىكتەرىمەن ءبولىستى. وتىرىس كورمەنىڭ اشىلۋىمەن جالعاسىن تاپتى.
«سوناۋ وتپان تاۋدان التايعا, الاتاۋدان ارقاعا دەيىنگى قازاق دالاسىن, بۇكىل فيلوسوفياسىن, ونىڭ تۇرمىس-تىرشىلىگىن, دالا مادەنيەتىن حالقىنا وسى قىلقالام ارقىلى جەتكىزىپ كەلگەن الپىسباي قازىعۇلوۆ اعامىزدىڭ كورمەسى قۇتتى بولسىن! شىعارماشىلىعىڭىزعا تولاعاي تابىس تىلەيمىز, ەلىمىزدىڭ مادەنيەتىن دامىتۋ جولىنداعى ەڭبەگىڭىز جانا بەرسىن» دەپ مادەنيەت جانە سپورت ءمينيسترى اسحات ورالوۆ ءوز سالەمدەمەسىن جەتكىزدى.
ءومىرىنىڭ 45 جىلىن بەينەلەۋ ونەرىنە ارناعان سۋرەتشىنىڭ قايتالانباس ەڭبەكتەرىن تىزبەكتەي كەلە, قازاقستاننىڭ ەڭبەك سىڭىرگەن قايراتكەرى, سەناتور نۇرتورە ءجۇسىپ: «الپىسباي قازىعۇلوۆ بەينەلەۋ ونەرى ارقىلى ادامزاتتىڭ جان الەمىنە ۇلكەن مۇرا سىيلاپ جاتقانىنا ءبىز كۋامىز. سوندىقتان قيالىڭىز, قالامىڭىز تالماسىن» دەپ ءسوزىن اياقتادى.
«كوكتەمگى سامعاۋ» – قىلقالام شەبەرىنىڭ دارا كورمەسى. الپىسباي قازىعۇلوۆتىڭ تۋىندىلارى تابيعاتتىڭ كوزگە كورىنبەس تىلسىمىن سىر شەرتە وتىرىپ, كەلۋشىلەردىڭ كوڭىل كۇيدى ايشىقتايتىن, جان دۇنيەسىنە ۇڭىلە ەرەكشە سەزىمگە بولەيتىنى انىق.
