سارىارقا اۋدانى بويىنشا رۇقسات ەتىلمەگەن قوقىس ۇيىندىلەرىنەن 1,5 مىڭ توننادان استام قوقىس شىعارىلدى.
جىل باسىنان بەرى اۋداندا رۇقسات ەتىلمەگەن 9 جەردە قوقىس ءۇيىندىسى انىقتالعان. سارىارقا اۋدانى اكىمى اپپاراتىنىڭ كوممۋنالدىق شارۋاشىلىق ءبولىمىنىڭ مامانى دانيار داستانۇلىنىڭ ايتۋىنشا, رۇقسات ەتىلمەگەن قوقىس ۇيىندىلەرىنەن 1,5 توننادان استام قوقىس شىعارىلعان. اباتتاندىرۋ ەرەجەلەرىن بۇزعان 20 ادامعا اكىمشىلىك ايىپپۇل سالىندى.
– كۇن سايىن ەكولوگيالىق پوليتسيامەن بىرلەسىپ مونيتورينگ جۇرگىزەمىز. بۇل ماسەلەدە بىزگە تۇرعىندار دا كومەكتەسەدى, سونىمەن قاتار بەينەباقىلاۋ كامەرالارىن قارايمىز. بۇگىنگى تاڭدا رۇقسات ەتىلمەگەن 8 قوقىس ورنى تولىعىمەن جويىلدى, ال س-308 كوشەسىندە قوقىس شىعارۋ جۇمىستارى جۇرگىزىلۋدە, – دەدى دانيار داستانۇلى.
ءىرى كولەمدى, قۇرىلىس جانە باسقا دا قوقىس تۇرلەرىن تەك الاش تاس جولىنىڭ بويىندا ورنالاسقان ەلوردانىڭ ەكوپوليگونىنا شىعارۋعا رۇقسات ەتىلگەن. سونداي-اق اباتتاندىرۋ ەرەجەلەرىن بۇزعانى ءۇشىن قازاقستان رەسپۋبليكاسى اقبتك 505-بابى بويىنشا اكىمشىلىك ايىپپۇلدار كوزدەلگەن. وسى باپ بويىنشا جەكە تۇلعالار ءۇشىن 20 اەك, ال كاسىپكەرلەر ءۇشىن 30-دان 100 اەك مولشەرىندە ايىپپۇل قاراستىرىلعان.
