III مىڭجىلدىقتىڭ 22 جىلىن, ياعني 2022 جىلدى تاريحتىڭ قاتپار بەتىنە حاتتايمىز. بارىس جىلىنىڭ توسىن سىيى كوپ, وزىندىك مىنەز تانىتقانىن دا كوردىك. جارقىن جەتىستىكتەر دە از ەمەس. ەلدىڭ ساياسي ورتالىعى – استانادا ورىن العان باستى 10 وقيعانى ۇسىنامىز.
كوپتىڭ تىلەۋى – كوپىر
كوشپەلى ءومىر سالتىن ۇستانعان اتا-بابامىز كوپىردىڭ ماڭىزىن تەرەڭ ءتۇسىنىپ, كوپىر سالۋدى ساۋاپتى ىسكە جاتقىزدى. ويتكەنى كوپىر قوزعالىستى جەڭىلدەتىپ, قيىندىقتى ەڭسەرۋدە تىرەك بولادى. ەركە ەسىلدى بويلاي بوي كوتەرگەن استانانى جايلى قالاعا اينالدىرۋدا كوپىردىڭ قاجەتتىلىگىن سەزىنەمىز. اسىرەسە اۋەجاي مەن «نۇرلى جول» تەمىرجولىن باعىتقا العان ادامدار كولىك كەپتەلىسىنە تىرەلىپ جاتادى. مۇنداي كەلەڭسىز جاعدايدى ەڭسەرۋدە كوپىر سالۋ مىندەتى تۇر.
2022 جىلى ۇلى دالا داڭعىلى بويىنان اشىلعان جاڭا كوپىر اشىلدى. ونىڭ ۇزىندىعى – 263,22 مەتر, ەنى – 51,4 مەتر. ءاربىر قوزعالىس باعىتىنىڭ ءجۇرىس بولىگىندە ەنى 3,75 مەتر ءۇش جولاق جانە ەنى 4 مەتر ءبىر جولاق بار. جولدىڭ سىرتقى جاعىندا 1,5 مەتردەن قاۋىپسىزدىك جولاعى سالىندى.
بۇل كوپىر ماڭگىلىك ەل داڭعىلى, ا.بايتۇرسىنوۆ, ر.قوشقارباەۆ, ج.ناجىمەدەنوۆ كوشەسى جانە Nova city اۋدانى, «مىڭجىلدىق» اللەياسىنداعى جۇكتەمەنى ءىشىنارا تومەندەتۋگە مۇمكىندىك بەرەدى. «نۇرلى جول» ۆوكزالىنا, «تەلمان» جانە «پرومىشلەننىي» تۇرعىن الابىنا, «مەترو» گيپەرماركەتى اۋماعىنا, م.جۇماباەۆ داڭعىلىنا, ت.جۇرگەنوۆ كوشەسىنە بارۋ جەڭىلدەيدى.
2023 جىلى ەسىل وزەنى ارقىلى وتەتىن تاعى ءبىر كوپىر پايدالانۋعا بەرىلەدى.
جالپى ەسىلدىڭ كوپىرلەرى تۋرالى ايتاتىن اڭگىمە كوپ. استانانىڭ ءدال كىندىگىندە «ارقار» كوپىرى بار. وعان تۇلپار, مارال, قاراوتكەل, بەلاسار جانە ت.ب. كوپىرلەردى قوسۋ كەرەك. جاياۋ جۇرگىنشىلەرگە ارنالعان «بەكىرە» جانە «سەرۋەن» كوپىرىن دە ۇمىتپاۋ كەرەك-اق.
جەتىنشى رەت توپ جاردى
ءيا, «استانا» فۋتبول كلۋبى ءوز تاريحىندا جەتىنشى رەت قازاقستان چەمپيوناتىنىڭ التىن جۇلدەسىن جەڭىپ, ەلىمىزدىڭ ۇزدىك كومانداسى اتاندى.
قازاقستان پرەمەر-ليگاسىنداعى چەمپيوندىق تۇعىر سوڭعى 26-تۋردا شەشىلدى. ەلدىڭ ەكى بەدەلدى كومانداسى – «استانا» مەن «اقتوبە» ءبىرىنشى ورىنعا ءۇمىتتى بولدى. چەمپيوندىق رۋحى بار ەكى كوماندانىڭ اراسىن ەكى ۇپاي عانا ءبولىپ تۇرعان-دى. تۋرنير كەستەسىندە جوعارى تۇرعان ەلوردالىق كوماندا سىرت الاڭدا قاراعاندىنىڭ «شاحتەرىمەن» ويناپ, 3:2 ەسەبىمەن جەڭىسكە جەتتى. ءسويتىپ, اقتوبەنىڭ ۇجىمىن ارتتا قالدىردى.
ەستەرىڭىزدە بولسا, 2014, 2015, 2016, 2017, 2018, 2019, 2022 جىلى ەل چەمپيونى بولسا, 2010, 2012, 2016 جىلى قازاقستان كۋبوگىن, 2011, 2015, 2018, 2019 جىلى قازاقستان سۋپەركۋبوگىن ۇتىپ الدى.
ەندى «استاناعا» ەۋروپانىڭ بەلدى كوماندالارىمەن وتەتىن ويىنداردا جانكۇيەرلىك ەتەمىز. العا, استانا!
ءبىزدىڭ چەمپيوندار
ءساۋىر ايىندا موڭعوليا استاناسى ۇلان-باتىردا ازيا چەمپيوناتىنىڭ بايراعى كوتەرىلدى. استانالىق ءمادينا مەن ءجاميلا باقبەرگەنوۆا تابىستى ونەر كورسەتىپ, قۋانتتى. 68 كەلىدە بەلدەسكەن ءمادينا باقبەرگەنوۆا تۇڭعىش رەت ءوز سالماعىندا دارالانسا, 72 كەلىدە سىنعا تۇسكەن ءجاميلا باقبەرگەنوۆا ەكىنشى رەت ازيا چەمپيونى اتاندى. وسىلايشا ەل تاريحىندا تۇڭعىش رەت ەگىزدەر ازيا چەمپيونى اتاندى.
قىركۇيەك ايىندا الەمنىڭ ساقا بالۋاندارىنىڭ باسى سەربيانىڭ استاناسى بەلگراد قالاسىندا قوسىلدى. ءجاميلا باقبەرگەنوۆا اقتىق سىنعا دەيىن قارسىلاستارىنىڭ وسال تۇسىن تاپتى. تەك فينالدا اقش سپورتشىسى اميت ەلورعا شاماسى كەلمەدى. ءسويتىپ, الەم چەمپيوناتىنىڭ ەكى دۇركىن كۇمىس جۇلدەگەرى اتاندى.
ودان بولەك, استانالىق ەگىز بوكسشى نۇربەك پەن ايبەك ورالبايدىڭ جەتىستىگىن اتاپ ءوتۋ كەرەك. قازان ايىنىڭ اياعى قاراشا ايىنىڭ باسىندا يوردانيانىڭ ورتالىعى اممان قالاسىندا ازيا بوكس كونفەدەراتسياسى (ASBC) قۇرلىقتىڭ ۇزدىكتەرىن انىقتادى. نۇربەك – 80 كەلىدە قولا جۇلدەگەر, ايبەك 92 كەلى سالماقتا التىن مەدال الدى.
ەستەرىڭىزدە بولسا, 2018 جىلى تايلاندتا وتكەن ازيا چەمپيوناتىندا نۇربەك كۇمىس, ايبەك التىن مەدال العان-دى. سول جىلى 21-31 تامىزى ارالىعىندا ۆەنگريانىڭ بۋداپەشت قالاسىندا الەم چەمپيوناتىندا نۇربەك التىن, ايبەك كۇمىس مەدال ولجالادى.
قازاقستان تەننيس تاريحىنداعى ەڭ ءىرى جەڭىس – ەلەنا رىباكينانىڭ ەنشىسىندە. ول جىل باسىندا ۋيمبلدون-2022 تۋرنيرىندە توپ جارسا, جىل اياعىندا دۋبايدا ء(باا) وتكەن دۇنيەجۇزىلىك تەننيس ليگاسى (WTL) كورمە تۋرنيرىندە جەڭىمپاز اتاندى.
ۇلەسكەرلەر – ۇدايى نازاردا
راسىندا, ۇلەسكەرلەردىڭ ماسەلەسى – استانا قالاسىنىڭ باسشىلارىن تولعاندىراتىن نەگىزگى ماسەلە. ەكس-اكىم التاي كولگىنوۆ ۇلەسكەرلەر ماسەلەسىنە باسىمدىق ەتىپ, مەردىگەر كومپانيالارمەن بىرنەشە رەت كەزدەسىپ, ۇلەسكەرلەر ءوتىنىش-تىلەگىن شەشۋگە ءمان بەردى. باس قالانىڭ مەرى جەڭىس قاسىمبەك تە اكىم قىزمەتىن ۇلەسكەرلەردىڭ ماسەلەسىنە نازار اۋدارۋدان باستادى.
2022 جىلى استانادا ۇلەسكەر وتباسىنىڭ 90 پايىزعا جۋىعىنىڭ ماسەلەسى شەشىلىپ, 16 مىڭ ۇلەسكەرلەر سانى 2 مىڭ وتباسىعا قىسقاردى. ماسەلەن, 2019 جىلدىڭ جازىندا قۇرىلىسى ۇزاققا سوزىلعان 150 كوپپاتەرلى تۇرعىن ءۇي بولسا, ونىڭ 120-ى شەشىلدى.
قۇرىلىسى ۇزاققا سوزىلعان قالعان 30 ءۇي بويىنشا قادامدىق ءىس-شارالار جوسپارى بار. وندا 2 مىڭعا جۋىق وتباسى باسپاناسىن كۇتىپ ءجۇر. مۇنداي پروبلەمالى ۇيلەردىڭ اياقتالۋى – مەملەكەت باسشىسىنىڭ تىكەلەي باقىلاۋىندا.
قۇرىلىسى ۇزاققا سوزىلعان ءاربىر ءۇيدىڭ پروبلەماسى ءارتۇرلى بولاتىن. بىرىندە تەك شۇڭقىرى عانا قازىلعان, ەندى بىرىندە قارجىلىق اۋديت, جوبالىق-سمەتالىق سەكىلدى قۇجاتتاماسى جوق ەدى, سول سياقتى ءبىر پاتەردى ەكى-ءۇش وتباسىعا ساتقان جايتتار, تاعى بىرىندە قاڭقاسى تۇرعىزىلعان ءۇي اپاتتى كۇيدە بولدى.
مىسالى, «تەرريتوريا كومفورتا-1» تۇرعىن ءۇي كەشەنىنىڭ قۇرىلىسى 2004 جىلى باستالعان-دى. ءۇيدى تەحنيكالىق تەكسەرۋ بارىسىندا عيماراتتىڭ اپاتتى جاعدايدا ەكەنى بەلگىلى بولدى. بۇرىنعى قۇرىلىس سالۋشى تەحنيكالىق نورمالارعا ساي كەلمەيتىن بەتون ماركاسىن قولدانعان, پليتالار اراسىندا سايكەستىك جوق. قۇرىلىسشىلاردىڭ ايتۋىنشا, بۇل ءۇي پايدالانۋعا بەرىلگەندە ۇزاققا بارماي قيراپ, تۇرعىندار ءۇيىندىنىڭ استىندا قالار ەدى. وسىدان كەيىن ونىڭ بلوكتارى بۇزىلىپ, ورنىنا جاڭا تۇرعىن ءۇي كەشەنى سالىندى, ناتيجەسىندە تۇرعىندار كوپتەن كۇتكەن باسپاناسىنا يە بولدى.
قوعامدىق كەڭىستىكتەر كوركەيگەن جىل
شىنى كەرەك, استانا قالاسىنىڭ اكىمشىلىك اۋماعى كەڭەيىپ, حالىق سانى جىل وتكەن سايىن ارتىپ كەلەدى. سوعان ساي كوپقاباتتى تۇرعىن ءۇيدىڭ قۇرىلىسى قارقىندى جۇرۋدە. الايدا سوعان ساي الەۋمەتتىك ينفراقۇرىلىم – مەكتەپ, ەمحانا, اۋرۋحانا, سپورت كەشەنى جانە ت.ب. دامۋدا ما؟ بۇل وزەكتى ماسەلە ەكەنى داۋسىز.
وسى باعىتتا جۇيەلى جۇمىس تا جوق ەمەس. ماسەلەن, ەلوردادا 93 مىڭ وقۋشىعا ارنالعان 45 مەكتەپ سالىندى (2 اۋىسىمدى). ونىڭ 9-ى بيىلعى وقۋ جىلىندا اشىلدى. 2019-2021 جىلدار ارالىعىندا 36 وقۋ ورنى سالىنىپ, پايدالانۋعا بەرىلدى.
بيىل مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا ءىرى گاباريتتى 25 مەكتەپتى جوبالاۋ باستالدى. بۇل ءىرى گاباريتتى مەكتەپتەر 100 مىڭ وقۋشى ورنىن (2 اۋىسىمدى) اشۋعا مۇمكىندىك بەرەدى. ولاردىڭ قۇرىلىسى 2023 جىلى باستالادى.
2025 جىلعا دەيىن 120 مىڭ وقۋشى ورنىنا (2 اۋىسىمدى) ارنالعان 44 مەكتەپ سالۋ جوسپارلانىپ وتىر.
ەلوردادا مەكتەپ سالۋ ءۇشىن 158 جەر ۋچاسكەسى بەلگىلەندى. جەر ۋچاسكەلەرى الەۋمەتتىك نىسانداردىڭ قاجەتتىلىكتەرىنە وراي قالانىڭ بارلىق اۋدانىندا ورنالاستى.
جاڭا جىل مەرەكەسى قارساڭىندا ەلوردادا التىنشى BINOM مەكتەبى اشىلدى. وقۋ ورداسىنا حالىق جازۋشىسى ءابىش كەكىلبايۇلىنىڭ ەسىمى بەرىلدى. مەكتەپ ەلوردانىڭ جىلدام دامىپ كەلە جاتقان اۋدانىندا, تۇرار رىسقۇلوۆ كوشەسىندە ورنالاستى. 4 مىڭ بالا ەكى اۋىسىممەن وقي الادى. بۇعان دەيىن اشىلعان 5 BINOM مەكتەبى جۇكتەمەنى ازايتۋعا جانە باس قالاداعى وقۋشى ورىندارىنىڭ تاپشىلىعىن 20 مىڭعا دەيىن قىسقارتۋعا مۇمكىندىك بەردى. بۇل جوبانى BI Group قۇرىلىس حولدينگى استانا اكىمدىگىمەن بىرلەسە وتىرىپ, مەملەكەتتىك-جەكەمەنشىك ارىپتەستىك تەتىگى بويىنشا جۇزەگە اسىرىلدى.
ەلوردانى قايتا قۇرۋ بويىنشا اۋقىمدى جۇمىستار «استانا جايلى قالا» ماستەر-جوسپارى اياسىندا جۇرگىزىلدى. استانادا قالا تۇرعىندارى مەن قوناقتار بوس ۋاقىتىن جايلى ءارى دەنساۋلىعىنا پايدالى كۇيدە وتكىزە الاتىن جاڭا تارتىمدى ورىندار اشىلدى. سوڭعى جىلدارى ەلوردادا 900-دەن استام اۋلا مەن قوعامدىق كەڭىستىك (ساياباقتار, گۇلزارلار, جەلەكجولدار) اباتتاندىرىلدى: كوپىر استى كەڭىستىكتەر, «تەاتر» بۋلۆارى («جاستار» سارايىنان مۋزىكالىق جاس كورەرمەن تەاترىنا دەيىن), «Demalys promenade», قۇتقارۋشىلاردىڭ, مۇعالىمدەردىڭ, مەديتسينا قىزمەتكەرلەرىنىڭ قۇرمەتىنە ارنالعان گۇلزارلار, كوشە سپورتى كوليزەيى اشىلدى جانە ت.ب.
الەۋمەتتىك پاتەر كوپتەپ سالىندى
استانادا جاستارعا ارنالعان ارنايى تۇرعىن ءۇي باعدارلاماسى بار, سول سياقتى تۇرعىن ءۇي سەرتيفيكاتتارىنىڭ سوماسى 1 ميلليون تەڭگەدەن 1,5 ميلليون تەڭگەگە دەيىن ۇلعايدى, ال تۇرعىن ءۇي باعدارلاماسىنا قاتىسۋشىلاردىڭ ساناتى كەڭەيتىلدى جانە ت.ب.
سوڭعى جىلدارى استانادا 23,5 مىڭعا جۋىق الەۋمەتتىك پاتەر سالىندى. ماسەلەن, 2018 جىلى – 1100 الەۋمەتتىك پاتەر, 2019 جىلى 2900 الەۋمەتتىك پاتەر سالىنسا, 2020-2022 جىلدارى 20,5 مىڭ الەۋمەتتىك پاتەر سالىندى.
بۇدان بولەك, قۇرىلىسى ۇزاققا سوزىلعان نىسانداردى اياقتاۋ, قاۋىپتى تۇرعىن ءۇي كەشەندەرىن جوندەۋ, اپاتتى كۇيدەگى ءارى توزىعى جەتكەن تۇرعىن ۇيلەردى بۇزۋ جۇمىسى ءجۇرىپ جاتىر. سوڭعى ءۇش جىلدا اپاتتى ۇيلەردەن 700-گە جۋىق وتباسى قونىس اۋداردى. تاعى 300-دەن استام وتباسىنى كوشىرۋ جوسپارلانىپ وتىر. ەلورداعا دامۋ باعدارلاماسى باستالعالى بەرى اپاتتى ۇيلەردەن 4200 وتباسى قونىس اۋداردى.
بۇگىنگى كۇننىڭ باتىرى
ءورت سوندىرۋشىلەردىڭ جۇمىسى قاۋىپ-قاتەرگە تولى. ولاردىڭ اپات كەزىندە كوزسىز جانكەشتىلىككە باراتىنىن ەلوردالىق ءورت ءسوندىرۋشى اسقار زابيكۋليننىڭ ەرلىگىنەن ءدۇيىم جۇرت بىلەدى. ءۇش ادامدى قۇتقارعان باتىردىڭ قايسارلىعى ەلەنبەي قالعان جوق. استانا ونوماستيكالىق كوميسسياسىنىڭ وتىرىسىندا ەسىل اۋدانىندا ورنالاسقان ە-583 كوشەسىندە ءورتتى ءسوندىرۋ كەزىندە ەرلىكپەن قازا تاپقان اسقار زابيكۋليننىڭ ەسىمىن بەرۋ تۋرالى شەشىم قابىلداندى.
جيىندا باتىردىڭ ەسىمىن ءوزى قىزمەت ەتكەن №6 مامانداندىرىلعان ءورت ءسوندىرۋ بولىمىنە بەرۋ, مەكەمە الدىنا بيۋست ورناتۋ ۇسىنىلدى. اسقار زابيكۋليننىڭ ەستەلىك سۋرەتىن استانا قالاسىنىڭ ا.پۋشكين كوشەسىندە ورنالاسقان «قۇتقارۋشىلار ساياباعىنداعى» اقپاراتتىق تاقتاعا ورنالاستىرۋ تۋرالى شەشىم قابىلداندى. اتالمىش ساياباقتا بۇرىن قايتىس بولعان قۇتقارۋشىلاردى ەسكە الۋعا ارنالعان اقپارات ورنالاستىرىلعان-دى.
ەستەرىڭىزدە بولسا, اسقار ءورت شىققان ۇيدە ءۇش ادامدى قۇتقارىپ, كاسىبي جۇمىسى بارىسىندا دەنەسىنىڭ 80 پايىزى كۇيىك شالىپ, اۋرۋحانادا ەس-ءتۇسسىز جاتىپ, جان تاپسىردى. قىزمەت بارىسىندا ەرلىك كورسەتىپ قازا بولعان باتىردىڭ رۋحىنا قالىڭ بۇقارا تاعزىم ەتتى.
باس قالانىڭ ونىنشى باسشىسى
ادىلبەك جاقسىبەكوۆ, تەمىرحان دوسمۇحامبەتوۆ, ومىرزاق شۇكەەۆ, اسقار مامين, يمانعالي تاسماعامبەتوۆ, اسەت يسەكەشەۆ, باقىت سۇلتانوۆ جانە التاي كولگىنوۆتەن كەيىن باس قالانىڭ تىزگىنىن جەڭىس قاسىمبەك ۇستادى.
استانانىڭ ونىنشى اكىمى ج.قاسىمبەك ەڭبەك جولىندا كولىك جانە كوممۋنيكاتسيا, ينۆەستيتسيالار جانە دامۋ ءمينيسترى, يندۋستريا جانە ينفراقۇرىلىمدىق دامۋ ءمينيسترى, سونداي-اق ۇكىمەت باسشىسىنىڭ ورىنباسارى قىزمەتىن اتقارىپ, ەلشىل ىستەردە بەلسەندىلىگىمەن كورىندى.
ەلوردانىڭ جاڭا اكىمى جەڭىس قاسىمبەك: «ەكونوميكالىق كورسەتكىشتەر, كاسىپكەرلىكتى دامىتۋ, ينفراقۇرىلىم, قولجەتىمدى الەۋمەتتىك قىزمەتتەر – ءوز جۇمىسىمىزدا قالا ءومىرى ءۇشىن ماڭىزى زور بارلىق سالانى قامتيمىز. قالا تۇرعىندارىنىڭ جايلى ءومىر ءسۇرۋى ءۇشىن قولجەتىمدى الەۋمەتتىك تۇرعىن ۇيلەر, مەكتەپتەر, بالاباقشالار, مەديتسينالىق نىساندار جانە ت.ب. سالۋدى ءارى قاراي دا جالعاستىرامىز. قالا تۇرعىندارىنىڭ سانى, قۇرىلىس كولەمى جىل سايىن ءوسىپ كەلە جاتقانىن ەسكەرىپ, جىلۋ, سۋ جانە ەلەكترمەن جابدىقتاۋ نىساندارىنىڭ قۋاتىن ۇلعايتۋ بويىنشا جۇمىس ىستەيتىن بولامىز» دەپ استانالىقتارعا ۇندەۋ جولدادى.
العاشقى رەسمي كەزدەسۋى ۇلەسكەرلەرگە باعىتتاپ, قاراپايىم حالىقتىڭ مۇددەسىنە باسىمدىق بەرەتىنىن بايقاتتى.
«استانا» اتاۋى قايتا ورالدى
پرەزيدەنت قاسىم-جومارت توقاەۆ 2022 جىلدىڭ 17 قىركۇيەگىندە ەلوردانىڭ اتاۋىن نۇر-سۇلتاننان استانا قالاسى دەپ وزگەرتۋ تۋرالى جارلىققا قول قويدى. ءسويتىپ, كوپتىڭ ۇسىنىسى ەسكەرىلىپ, ەلدىڭ ساياسي ورتالىعى قايتا «استانا» اتاۋى قايتا ورالدى.
1997 جىلى 10 جەلتوقسانىندا الاتاۋدا ارقا تورىنە ەلدىڭ ساياسي-اكىمشىلىك ورتالىعى اۋىستى. 1998 جىلى 6 مامىردا اقمولانىڭ اتاۋى استانا بولىپ وزگەرتىلدى.
1998 جىلى 10 ماۋسىمىندا جاڭا استانانىڭ حالىقارالىق تۇساۋكەسەرى ءوتتى. 1999 جىلى يۋنەسكو شەشىمىمەن استانا «بەيبىتشىلىك قالاسى» اتاعىن الدى. قازاقستاننىڭ باس قالاسى 2000 جىلدان باستاپ استانالار مەن ءىرى قالالاردىڭ حالىقارالىق اسسامبلەياسىنىڭ مۇشەسى.
قالا ءتورت اۋداننان – الماتى, سارىارقا, ەسىل جانە بايقوڭىر اۋدانىنان تۇرادى. جىل اياعىندا بۇل قاتارعا نۇرا اۋدانى قوسىلدى.
بۇگىندە ميلليون تۇرعىنى بار استانا ەل ەكونوميكاسىنىڭ لوكوموتيۆىنە اينالدى.
«ەلوردا اقپاراتتىڭ» تارتۋى
رەسپۋبليكا كۇنىنە ارنالعان قالامگەرلەر مەن جۋرناليستەر اراسىنداعى بيليارد ءتۋرنيرى ءوتتى. استانا قالاسى اكىمدىگىنىڭ قولداۋىمەن «Elorda Aqparat» مەدياحولدينگى ۇيىمداستىرعان ءدۇبىرلى دوداعا مەملەكەتتىك سىيلىقتىڭ لاۋرەاتى – قويشىعارا سالعاراۇلى, تولەن ابدىك, نەسىپبەك ايتۇلى, جۋرناليست-جازۋشى, اكادەميك ءۋاليحان قاليجانۇلى باستاعان زيالى قاۋىم, باق وكىلدەرى (ۇلكەن, ورتا جانە كىشى بۋىن) قاتىسىپ, قىزىقتى دا تارتىستى ويىن ۇلگىسىن كورسەتتى.
سەرىكتەستىكتىڭ ديرەكتورى ولجاس سىدىقبەك ءتۋرنيردىڭ نەگىزگى ماقساتى – ەلورداداعى زيالى قاۋىم وكىلدەرىنىڭ, جۋرناليستەردىڭ باسىن قوسۋ, ءبىر ۇستەل باسىندا قاۋىشتىرۋ جانە ۇلتتىق مەرەكەنى بىرگە اتاپ ءوتۋ بولعانىن ايتتى.
كىلەڭ سايدىڭ تاسىنداي ىرىكتەلگەن 32 ويىنشى تاڭعى ساعات 10-نان تۇنگى ساعات 22-گە دەيىن باق سىناپ, قولىنا قالام مەن ميكروفوندى عانا ەمەس, بيليارد تاياعىن دا شەبەر ۇستاي الاتىندىعىن كورسەتتى. ناتيجەسىندە ءنۇردىلدا وراز ءبىرىنشى ورىن السا, ەكىنشى ورىننان احمەت قايراتۇلى كورىندى. ءۇشىنشى ورىندا جاناربەك ءاشىمجان مەن ەربول ەردەنبەك ءبولىستى.
«Elorda Aqparat» جشس تارتۋى مۇنىمەن شەكتەلمەدى. تاۋەلسىزدىك كۇنى قارساڭىندا «تاۋەلسىزدىك جانە ەلوردا» اتتى جىر ءمۇشايراسى ءوتتى. جىر دوداسىنا ەلدىڭ ءار وڭىرىندەگى 102 اقىن ءوز ولەڭىن جولداعانىن ايتۋىمىز كەرەك. قورىتىندى كەشتە تەك ۇزدىكتەرى شاقىرىلىپ, سىي-سىياپاتى تابىستالدى, ءارى اقىندار جىر-جاۋھارىن وقىدى. رۋحىنا ءسوز ونەرى قونعان جۇزدەن جۇيرىك, مىڭنان تۇلپار اقىندار تاۋەلسىزدىك پەن ەلوردانى جىرعا قوسىپ, تىڭدارمانىن جىرمەن تەربەدى.
رەسپۋبليكالىق ءمۇشايرادا ءبىرىنشى ورىندى قاراعاندىلىق بەلگىلى اقىن ءىلياس مۇقاي يەلەنسە, ارشىن نۇرباقىت, ايدىن بايىس, قارلىعاش قاشقىنباي, ۇمتىل زارىققان سىندى تالانتتار دا جۇلدەگەرلەر قاتارىنان كورىندى.
P.S: ءبىز ءبىر جىلدىڭ جۇگىن سالماقتاپ, نەگىزگى وقيعالارىن وسىلاي سارالادىق. ارينە, ءبىر جىلدىڭ جۇزىندە بۇدان وزگە دە ءىرى-ءىرى جاعىمدى جاڭالىقتار ورىن الدى. ماسەلەن, ەلوردادا ەڭسەلى مەشىتتە ازان شاقىرىلا باستادى, بىرنەشە حالىقارالىق فورۋمدار ءوتىپ, ەل باسشىلارى ارنايى كەلدى. الايدى مۇنىڭ ءبارى وزگە تاقىرىپقا ارقاۋ بولعانىن ايتۋىمىز كەرەك.
