ەلوردالىق قازاقستان حالقى اسسامبلەياسىنىڭ ۇيىمداستىرۋىمەن دوستىق ۇيىندە جاڭا جىلدىق قايىرىمدىلىق شىرشاسى ءوتتى. كەشكە 50-دەن اسا ءبۇلدىرشىن قاتىسىپ, ولارعا جاڭا جىلدىق سىيلىقتار بەرىلدى.
مەرەكە قارساڭىندا ۇيىمداستىرىلعان ءىس-شارا ەتنومادەني بىرلەستىكتەردىڭ, SOS بالالار اۋىلىنىڭ, الەۋمەتتىك وسال توپتىڭ بالالارىنا, سونىمەن بىرگە ەرەكشە قاجەتتىلىگى بار بالالارعا جانە ومىرلىك قيىن جاعدايعا تۇسكەن بالالارعا قولداۋ كورسەتۋ ورتالىعىنىڭ تاربيەلەنۋشىلەرىنە ارنالدى.
كەشكە قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ جانە استانا قالاسى قحا مۇشەلەرى قاتىستى.
«دەمەۋشىلەردىڭ كومەگىمەن 50 بالاعا جاڭا جىلدىق سىيلىق بەرىپ, مەرەكەلىك كوڭىل كۇي سىيلادىق. جالپى استانا قالاسىندا 20 جەلتوقساننان باستاپ اۋدانداردا, مەكتەپتەردە بالالارعا ارنالعان مەرەكەلىك كەش تولاسسىز ءوتىپ جاتىر. مۇنداي مەرەكەلىك ءىس-شارالار ەرتەڭ دە جالعاسادى. ال دوستىق ۇيىندە مۇنداي قايىرىمدىلىق شىرشاسى ەكىنشى رەت وتكىزىلۋدە» دەدى داۋرەن بابامۇراتوۆ.
كىشكەنتاي بۇلدىرشىندەر اتا-اناسىمەن بىرگە جاڭا جىلدىق شىرشانىڭ جانىندا ءان سالىپ, بي بيلەپ, ەرەكشە مەرەكەلىك كوڭىل كۇيگە بولەندى. كەش بارىسىندا بالالار وزىنە جاڭا دوس تاۋىپ, ەرتەگى الەمىنە ەنگەندەي سەزىمدە بولدى.
قايىرىمدىلىق شىرشاسىنا ەكى بالاسىمەن كەلگەن ەلوردالىق تۇرعىننىڭ ءبىرى – اقمارال يماناليەۆا. ايان جانە رايان ەسىمدى ۇلدارىمەن كەلگەن انا ۇيىمداستىرۋشىلارعا ريزاشىلىعىن ءبىلدىردى.
– «باقىتتى شاڭىراق» قوعامدىق قورىنىڭ شاقىرتۋىمەن كەلىپ وتىرمىز. ەرەكشە بالالاردى ەلەۋسىز قالدىرماي, كوڭىلدى كەش ۇيىمداستىرعان دەمەۋشىلەرگە العىسىمدى بىلدىرەمىن. ەسىكتەن كىرگەننەن باستاپ ءبىزدى قۋانا قارسى العانى ءۇشىن دوستىق ۇيىنە ايتار العىسىم شەكسىز. بيىلعى جاڭا جىلدىق كەش جوعارى دەڭگەيدە ۇيىمداستىرىلدى, – دەدى ول.
