سپورت – ادام ءۇشىن الدىمەن دەنساۋلىقتىڭ كەپىلى بولسا, ەل-جۇرت ءۇشىن ۇلتتىق نامىستىڭ كورسەتكىشى, ال مەملەكەت ءۇشىن مارتەبە مەرەيى بولىپ تابىلادى. ەلباسىمىز نۇرسۇلتان نازارباەۆتىڭ «ەل تۋى ەكى جاعدايدا: ءبىرى مەملەكەت باسشىسىنىڭ رەسمي ساپارى كەزىندە بولسا, ەكىنشىسى سپورتشىنىڭ جەڭىسكە جەتكەن كەزىندە سالتاناتتى جاعدايدا بيىككە كوتەرىلەدى» دەگەن ءسوزى سول مارتەبەنىڭ, سول نامىستىڭ سالماعىن ايقىنداپ تۇرعانداي. شىنىمەن دە, بەيبىتشىلىكتىڭ ەلشىسىنە بالانعان سپورتتىڭ سيقىرلى قۇدىرەتى بۇگىندە ساياساتتىڭ دا, ەكونوميكانىڭ دا ايتارلىقتاي ءبىر بولشەگىنە اينالىپ وتىرعانى اقيقات.
قۇدايعا شۇكىر, بۇگىنگى تاڭدا قازاقستان سپورتى دا الەمدىك باسەكەنىڭ بەل ورتاسىنان تۇسپەي, قازاق سپورتشىلارى وليمپيادا ويىندارىنان, الەمدىك جانە قۇرلىقتىق جارىستاردان ولجا الىپ, تورتكۇل دۇنيەنىڭ سايىپقىراندارىمەن قاتار شاۋىپ, قايبىر سايىستاردا قارسىلاستارىنان قارا ءۇزدىرىپ, التىن تۇعىردىڭ تورىنەن كورىنىپ ءجۇر.
حالىقارالىق جارىستاردا توپ جارىپ, ەلدىڭ مەرەيىن كوتەرىپ جۇرگەن جەڭىمپازدار قاتارىندا استانا سپورتشىلارى دا بارشىلىق. سوڭعى ءبىر جىلدىڭ كولەمىندە بوكستان الەم چەمپيونى اتانعان مەرەي اقشالوۆ پەن دانيار ەلەۋسىنوۆ, 37 سپورت تۇرىنەن وتكەن رەسپۋبليكالىق كەشەندى جارىستان استانا قالاسى كومانداسىنىڭ كۇمىس جۇلدەگەر اتانۋى, ۆەلوجارىستان ازيا چەمپيوناتىندا استانالىق شاباندوزداردىڭ بىرنەشە جۇلدەنى قاتارىنان جەڭىپ الۋى, باسقا دا سايىستاردان جاقسى ناتيجە كورسەتۋى ەلوردامىزدىڭ ناعىز سپورت قالاسىنا اينالا تۇسكەنىن بىلدىرسە كەرەك.
سپورتشىلار جەڭىسى ەلدىڭ مەرەيىن كوتەرسە, سول جەڭىمپازداردى دايىندايتىن باپكەرلەر مەن وقىتۋشىلار, ادىسكەرلەر مەن تاربيەشىلەر ەكەنى ءسوزسىز. دەمەك, ەرتەڭ اتالىپ وتىلەتىن سپورت كۇنى بۇل وسى سالادا ەڭبەك ەتىپ جۇرگەن مىڭداعان ادامداردىڭ مەرەكەسى. ولاي بولسا, مەرەكەلەرىڭىز قۇتتى بولسىن, قۇرمەتتى سپورتشى قاۋىم!
عالىم قوجابەكوۆ
