استانادا مەملەكەت باسشىسى نۇرسۇلتان نازارباەۆتىڭ قاتىسۋىمەن داستۇرگە اينالعان جالپىۇلتتىق تەلەكوپىر ءوتتى. يندۋستريالاندىرۋ كۇنىنە ارنالعان يگىلىكتى شارادا 23 جوبانىڭ تۇساۋى كەسىلىپ, ەلباسى تەلەكوپىر رەجيمىندە جاڭا نىسانداردى ىسكە قوسىپ, يندۋستريالاندىرۋ اياسىنداعى جوبالار قۇرىلىسىنىڭ باستالۋىنا بەلگى بەردى.
اۋقىمدى شارادا ەلباسى استانا قالاسىنداعى «Selena Insulations» جشس قۇرىلىس ماتەريالدارىن شىعاراتىن زاۋىتتى ىسكە قوستى. زامان تالابىنا ساي ءنىساننىڭونىمدەرى ۇيلەردى جىلىتۋعا ارنالعان. «تاۋارلارىمىزدىڭ 40 پايىزى رەسەي مەن ورتالىق ازياعا ەكسپورتتالادى. قازىرگى تاڭدا زاۋىتتا 70 ادام ەڭبەك ەتەدى» دەدى جشس ديرەكتورلار كەڭەسىنىڭ ءتوراعاسى كشيشتوف دومارەتسكي. ول مەملەكەت باسشىسىن تاۋەلسىزدىكتىڭ 25 جىلدىعىمەن قۇتتىقتاپ, قازاقستان مەن پولشا اراسىنداعى ءارىپتەستىكتىڭ جاندانىپ كەلە جاتقانى جايىندا وي ساباقتاپ ءوتتى. ەلباسى ءوز كەزەگىندە ەكى ەل اراسىنداعى ارىپتەستىك تۋرالى ءسوز قوزعادى. «مەن بيىل پولشاعا رەسمي ساپارمەن بارىپ قايتتىم. سول كەزدە ەكى ەلدىڭ ارىپتەستىك بايلانىسىن ارتتىرۋ ماقساتىندا كەلىسسوزدەر جۇرگىزدىك. بۇل – جاقسى ۇلگى. سىزدەردە بيزنەسكە جانە قۇرىلىسقا جاقسى جاعداي جاسالعان دەپ ءۇمىتتەنەمىن» دەدى پرەزيدەنت.
سونىمەن بىرگە ەلباسى يندۋستريالاندىرۋ كۇنى اياسىندا «پارىز» جانە «التىن ساپا» سىيلىقتارىن سالتاناتتى جاعدايدا تاپسىردى. بيىل «پارىز» بايقاۋىنىڭ باس جۇلدەسىنە كورپوراتيۆتىك الەۋمەتتىك جانە ەكولوگيالىق جاۋاپكەرشىلىك قاعيداتتارىن ىسكە اسىرۋدا جوعارى ءناتيجەگە قول جەتكىزگەن «اقسايگازسەرۆيس» اق يە بولدى. جەڭىمپاز كومپانيا الەۋمەتتىك باعدارلامالاردى جۇزەگە اسىرۋعا جىل سايىن 25 ملن تەڭگەگە دەيىن قارجى ءبولىپ كەلەدى. قازاقستان پرەزيدەنتىنىڭ «التىن ساپا» سىيلىعىمەن «قازاقستان ەلەكتروليز زاۋىتىنىڭ» پرەزيدەنتى ر.رومانوۆ, «اتىراۋمۇنايماش» جشس ديرەكتورلار كەڭەسىنىڭ توراعاسى س.تۇگەلباەۆ, «حيمفارم» اق ديرەكتورى ر.بايعارين ماراپاتتالدى.
وسى جيىندا «قازاقستاننىڭ ۇزدىك تاۋارى» رەسپۋبليكالىق كورمە بايقاۋىنىڭ ديپلومانتتارىنا ارناۋلى ديپلومدار تابىس ەتىلدى. بايقاۋ جەڭىمپازدارى ءۇش اتالىم – «ءوندىرىستىك ماقساتتاعى ۇزدىك تاۋارلار», «حالىققا ارنالعان ۇزدىك تاۋارلار», «ەڭ ۇزدىك ازىق-تۇلىك تاۋارلارى» بويىنشا انىقتالدى. ايتا كەتەرلىك, بيىل «التىن ساپا» سىيلىعىنا 100-دەن استام كاسىپورىن ۇمىتكەر بولسا, «پارىز» بايقاۋىنا قاتىسۋعا ەلىمىزدەگى 501 كاسىپورىن ءوتىنىم بەرگەن.
