ەلوردادا ءماجىلىس پەن ءماسليحات دەپۋتاتتارىن سايلاۋ ءۇشىن 349 سايلاۋ ۋچاسكەسى اشىلىپ, 691 877 سايلاۋشى تىركەلگەن.
«قازاقستان – دەموكراتيالىق, زايىرلى, قۇقىقتىق مەملەكەت. ازاماتتاردىڭ دەموكراتيالىق قۇقىعى سايلاۋدا داۋىس بەرۋ بارىسىندا كورىنەدى. سايلاۋ – بۇل ەلدىڭ دامۋ جولىن حالىق انىقتايدى دەگەن ءسوز. ەلدەگى سايلاۋ ينستيتۋتىنىڭ دامۋ دەڭگەيى قوعام ءومىرىنىڭ بارلىق سالالارىنا اسەر ەتەدى. سوندىقتان بولاشاقتا ءوز سايلاۋشىلارىنىڭ مۇددەسىن قورعايتىن كانديداتتارعا داۋىس بەرۋ مۇمكىندىگىن پايدالانۋ وتە ماڭىزدى. 2021 جىلدىڭ 10 قاڭتارىندا قازاقستاندا ءماجىلىس پەن ءماسليحات دەپۋتاتتارىنىڭ سايلاۋى وتەدى. داۋىس بەرۋ ءۇشىن ەلوردادا 349 سايلاۋ ۋچاسكەسى اشىلدى, 3322 كوميسسيا مۇشەسى جۇمىس ىستەيدى. ەلوردا تۇرعىندارى بارلىق ماسەلەلەر بويىنشا وسى ۋچاسكەلەرگە جۇگىنە الادى» دەيدى قالالىق سايلاۋ كوميسسياسىنىڭ ءتورايىمى باقىت بەكتەمىسوۆا.
پارلامەنت ءماجىلىسى مەن ءماسليحات دەپۋتاتتارىن سايلاۋعا: «اۋىل» حالىقتىق-دەموكراتيالىق پارتياسىنان, «ADAL» ساياسي پارتياسىنان, Nur Otan پارتياسىنان, «قازاقستان حالىق پارتياسىنان», «اق جول» دەموكراتيالىق پارتياسىنان كانديداتتار قاتىسادى.
داۋىس بەرۋ سايلاۋ ۋچاسكەسىنىڭ اۋماعىندا تىركەلگەن تۇرعىلىقتى جەرى بويىنشا جەرگىلىكتى اتقارۋشى ورگاندار, ياعني اۋداندىق اكىمدىكتەر بەكىتەتىن سايلاۋشىلاردىڭ تىزىمدەرى بويىنشا وتكىزىلەتىن بولادى. سوندىقتان داۋىس بەرۋ ءۇشىن ۋچاسكەڭىزدى الدىن الا ءبىلۋ ماڭىزدى.
نۇر-سۇلتاندا مۇنى جسن, تەگىن, اتىن, اكەسىنىڭ اتىن جانە تۋعان كۇنىن نە سايلاۋشى تىركەلگەن وبەكتىنىڭ (كوشە, ءۇي) مەكەنجايىن كەلەسى سەرۆيستەردە كورسەتە وتىرىپ, ونلاين-رەجيمدە انىقتاۋعا بولادى:
1) اكىمدىكتىڭ ۆەب-پورتالى astana.gov.kz ارقىلى (باننەردىڭ باستى بەتىندەگى «ءوز سايلاۋ ۋچاسكەڭىزدى تابىڭىز»);
2) Smart Astana ءموبيلدى قوسىمشاسى («قالالىق قىزمەتتەر» بولىمىندە);
3) @smartastana_bot تەلەگرام-بوتى («قىزمەتتەر» بولىمىندە).
وسى بايلانىس ارنالارىنىڭ كومەگىمەن سايلاۋ ۋچاسكەسىنىڭ ءنومىرىن, ورتالىقتىڭ مەكەنجايىن جانە اتاۋىن, سونداي-اق كارتاداعى سايلاۋ ۋچاسكەسى ورتالىعىنىڭ ورنالاسقان جەرى تۋرالى بەلگىنى تەكسەرۋگە بولادى.
سونداي-اق ينتەرنەتكە شىعۋ مۇمكىندىگى جوق ادامدار ءۇشىن 109 iKomek بىرىڭعاي بايلانىس ورتالىعى جۇمىس ىستەيدى. وسى تەلەفون نومىرىنە قوڭىراۋ شالىپ, ءوز ۋچاسكەسىن انىقتاي الادى.
سايلاۋ قارساڭىندا «بەلسەندى سايلاۋشى» اكتسياسى باستالادى, ونىڭ قورىتىندىسى 5 قاڭتاردا جاريالانادى. اكتسيانىڭ شارتى بويىنشا, ءوزىنىڭ سايلاۋ ۋچاسكەسىن ونلاين-سەرۆيستەر ارقىلى تەكسەرگەن ءاربىر بەس مىڭىنشى پايدالانۋشى سىيلىققا يە بولادى.
