عاني قايراتۇلى, ەلوردا تۇرعىنى:
– قوعامدىق كولىك كارتاسىن ۆاليداتسيا جاساعاننان كەيىن ءبىر ساعاتتا ەكىنشى اۆتوبۋسپەن تەگىن ءجۇرۋ مۇمكىندىگى بۇدان بىلاي كۇنىنە ءبىر-اق رەت بولادى دەپ ەستىدىم. سونىمەن قاتار جۇرگىزۋشى جاقتاعى ۆاليداتوردان 180 تەڭگە الىنادى دەگەندى دە قۇلاعىم شالدى. بۇل اقپاراتتار قانشالىقتى شىندىق؟
وسى ساۋالعا «Astana LRT» كومپانياسىنىڭ قوعاممەن بايلانىس ءبولىمىنىڭ جەتەكشىسى ناۋات ازانباەۆانىڭ جاۋابىن ۇسىنامىز.
– بۇل ەكەۋى دە – جالعان اقپارات. ولاي بولۋى مۇمكىن دە ەمەس. جاڭا ەلەكتروندى جۇيەگە قارسى ادامدار ادەيى وسىنداي اقپاراتتاردى تاراتىپ جۇرگەن سياقتى. جالپى, كولىك كارتاسىمەن 90 تەڭگە تولەۋ ارقىلى ءبىر ساعاتتىڭ ىشىندە اۆتوبۋستىڭ بىرىنەن ەكىنشىسىنە اۋىسقاندا جول ءجۇرۋ تەگىن بولادى. بۇلاي كۇنىنە قانشا رەت جۇرسەڭىز دە, كارتادان ارتىق اقشا الىنبايدى. سول سياقتى جۇرگىزۋشى جانىنداعى ۆاليداتوردىڭ كارتادان 180 تەڭگە الاتىنى دا وتىرىك. اۆتوبۋستارداعى بارلىق ۆاليداتورلاردىڭ قىزمەتى بىردەي. ەگەر قاجەت دەسەڭىز, مۇنى كەز كەلگەن ۋاقىتتا دالەلدەپ بەرە الامىز. تەك كەي جاعدايدا عانا كارتادان ەكى رەت اقشا الىنۋى مۇمكىن. مىسالى, سوڭعى ايالداماعا تاياعاندا جولاۋشىلار اۆتوبۋسقا كىرە سالىسىمەن بىردەن ۆاليداتسيا جاساسا, ەكىنشى اۆتوبۋسقا اۋىسقاندا دا اقشا تولەنەدى. ويتكەنى سوڭعى ايالداماعا توقتاپ, جاڭا رەيس باستالعاندا وعان دەيىنگى ەسەپ ايىرىسۋلار جارامسىز بولىپ سانالادى. ەلەكتروندى جۇيەنىڭ جۇمىسى وسىلاي. سوندىقتان جولاۋشىلارعا ايتارىمىز, اۆتوبۋسقا سوڭعى ايالداماعا جاقىنداعاندا وتىرساڭىز, ۆاليداتسيانى ونىڭ جاڭا رەيسى باستالعاندا بىراق جاساڭىز. جولاۋشىلار وسىنى ەسكەرسە ەكەن دەيمىز.
