ەلوردامىزداعى «جاستار» سارايى – بايىرعى مادەنيەت جانە سپورت كەشەنى. مۇندا استانالىقتار مەن قالا قوناقتارى ءۇشىن ءتۇرلى شىعارماشىلىق ۇيىرمەلەر تۇراقتى جۇمىس جۇرگىزەدى.
الداعى جەكسەنبى, 9 قىركۇيەك كۇنى ايتۋلى ونەر ورداسىنىڭ جاڭا ماۋسىمى اشىلادى. سالتاناتتى شارا اياسىندا سارايدىڭ جازعى ساحناسىندا شىعارماشىلىق ۇجىمداردىڭ قاتىسۋىمەن كونتسەرت وتەدى. كورەرمەندەر ءتۇرلى شىعارماشىلىق ۇجىمداردىڭ ونەرىن تاماشالاي الادى.
سونىمەن قاتار, وسى كۇنى جاڭا ماۋسىمنىڭ باعدارلاماسىنا قاراي شىعارماشىلىق ۇجىمدارعا بالالاردى قابىلداۋ جۇرگىزىلەدى. اتا-انالار بالالارىن قالاۋلارى بويىنشا وسى سارايدا جۇمىس ىستەيتىن ستۋديالارعا بەرە الادى. كەشەننىڭ سپورت زالىندا سپورت تۇرلەرىمەن اينالىسۋعا, باسسەيندە ءجۇزۋ سپورتىنا, سونداي-اق دەنساۋلىق توپتارىنا جازىلۋعا بولادى.
«جاستار» سارايىنىڭ شىعارماشىلىق ۇيىرمەلەرىنە قاتىسۋشىلار قالالىق, رەسپۋبليكالىق جانە حالىقارالىق ءمادەني-سپورتتىق شارالارعا قاتىسۋعا مۇمكىندىك الادى. مۇندا بالالار مەن جاستاردى ونەر مەن سپورتقا ۇيرەتەتىن كاسىبي
ماماندار مەن جاتتىقتىرۋشىلار ۇجىمى قالىپتاسقان.
اتالمىش سارايدىڭ تاعى ءبىر ەرەكشەلىگى – مۇندا جاپ-جاقسى كونتسەرت زالى بار. وندا ۇنەمى وتاندىق جانە شەتەلدىك ءارتىستەر مەن ونەر ۇجىمدارىنىڭ كونتسەرتتەرى ءوتىپ تۇرادى. سونداي-اق ساراي الاڭىندا ۇلتتىق جانە مەملەكەتتىك مەرەكەلەرگە ارنالعان بۇقارالىق شارالار دا ءجيى وتەدى.
تۇپتەپ ايتقاندا, «جاستار» سارايى – ەلوردامىزداعى كوپشىلىك جينالاتىن ونەر ورداسىنىڭ ءبىرى.
«جاستار» سارايىنىڭ جاڭا ماۋسىمىنىڭ اشىلۋىنا ارنالعان اشىق ەسىك كۇنى جازعى ساحنادا ساعات 13.00-15.00 ارالىعىندا وتەدى.
