الماتى
الماتى قالاسىندا تمد-عا مۇشە ەلدەردىڭ جاستار فورۋمى ءوتىپ جاتىر. ءىس-شاراعا ەلىمىزدەگى جاستار ۇيىمدارىنىڭ وكىلدەرىنەن بولەك, ازەربايجان, رەسەي, بەلارۋس, قىرعىزستان جانە وزبەكستان مەملەكەتتەرىنەن كەلگەن شىعارماشىلىق جاستار قاتىسۋدا.
اقمولا وبلىسى
وبلىس جاستارىنىڭ ءبىلىم الۋى ءۇشىن قوسىمشا گرانتتار مەن شاكىرتاقى ءبولىندى. بۇل تۋرالى ءوڭىر اكىمى مالىك ءمىرزاليننىڭ توراعالىعىمەن وتكەن اپپارات كەڭەسىندە بەلگىلى بولدى. بۇگىندە ايماقتا 148996 جاس تۇرادى. بۇل جالپى وبلىس تۇرعىندارىنىڭ 20,2 پايىزىن قۇرايدى.
تۇركىستان وبلىسى
تۇركىستان وبلىسىنىڭ تۇلكىباس اۋدانىندا باعباندار اپورت الماسىن ءوسىرىپ, 5 مىڭ توننا جەمىس جينادى. قازىر اۋداندا المانىڭ بۇل ءتۇرىن كۇتىپ, باپتاۋ جۇمىسىن 32 شارۋاشىلىق قولعا العان. جالپى, تۇلكىباستا 3 مىڭ گەكتاردان استام الما باعى بار.
اتىراۋ
اتىراۋدا «تۇنگى سوت» قاناتقاقتى جوباسى ىسكە قوسىلدى. سوت داۋلارىن كەشكى ۋاقىتتا قاراۋ اكىمشىلىك قۇقىق بۇزۋشىلىقتار بويىنشا ءىس جۇرگىزۋدى جەڭىلدەتەدى جانە ازاماتتاردىڭ ۋاقىتىن ۇنەمدەيدى.
قاراعاندى وبلىسى
قاراعاندى وبلىسىندا جىلىتۋ ماۋسىمىنا دايىندىق اياقتالۋعا جاقىن. قازىرگى ۋاقىتتا نىسانداردىڭ دايىندىعى 91 پايىزدى قۇراپ وتىر. جوسپار بويىنشا ينجەنەرلىك جەلىلەردەگى جوندەۋ جۇمىستارى 20 قىركۇيەككە دەيىن اياقتالادى.
شىمكەنت
شىمكەنتتە «7-20-25» باعدارلاماسى بويىنشا 500 مىڭ شارشى مەتر, ياعني 8,3 مىڭ پاتەر ء(بىر پاتەردىڭ اۋدانى شامامەن 60 شارشى مەتر) سالىنادى. وعان 20 ملرد تەڭگە بولىنەدى.
سولتۇستىك قازاقستان وبلىسى
سولتۇستىك قازاقستان وبلىسىندا 2022 جىلعا تامان ورتاشا جانە جاقسى دەڭگەيدەگى جولداردىڭ جاعدايىن 58 پايىزدان 73 پايىزعا دەيىن ارتتىرۋ كوزدەلىپ وتىر. وسى ماقساتتا بيىل رەسپۋبليكالىق بيۋدجەتتەن 10 ميلليارد تەڭگە, ال بولاشاقتا 17 ميلليارد تەڭگە بولىنبەك.
شىعىس قازاقستان وبلىسى
شىعىس قازاقستان وبلىسىندا تسيفرلاندىرۋ باعدارلاماسىنىڭ ارقاسىندا كيەلى جەرلەردى زەرتتەۋ جەڭىلدەي ءتۇستى. ەندى تۇرعىندار قازاقستاننىڭ تاريحي-مادەني الەمى تۋرالى ارنايى قوسىمشا ارقىلى بەس تىلدە ماعلۇمات الا الادى. جوبانى وبلىس اكىمدىگىنىڭ قولداۋىمەن جەكە كومپانيا جۇزەگە اسىرىپ جاتىر.
