وزبەك – قازاق دوستىعى جاراسقان جىل
2018 جىلى ناۋرىزدا ورتالىق ازيا ەلدەرى باسشىلارىنىڭ كەزدەسۋى وتكەن بولاتىن. وسى كەزدەسۋدە نۇرسۇلتان نازارباەۆ قازاقستانداعى وزبەكستان جىلىنىڭ اشىلۋ ءراسىمىن جاريالاپ, ونىڭ ناۋرىز مەيرامى قارساڭىندا ءوتۋىنىڭ سيمۆولدىق ءمانى بار ەكەنىنە توقتالدى.
قازاقستان پرەزيدەنتى استانا مەن تاشكەنت ساۋدا-ەكونوميكالىق جانە ينۆەستيتسيالىق ىنتىماقتاستىقتى تابىستى دامىتىپ كەلە جاتقانىن, سونداي-اق ولاردىڭ حالىقارالىق جانە وڭىرلىك ماڭىزدى ماسەلەلەردى شەشۋگە قاتىستى ۇستانىمدارىنىڭ ورتاق ەكەنىن ايتتى. ستاتيستيكالىق مالىمەتتەر بويىنشا, قازاقستان مەن وزبەكستان اراسىنداعى تاۋار اينالىمى 2 ملرد اقش دوللارىنا جەتكەن. بۇل 2016 جىلمەن سالىستىرعاندا 32 پايىزعا ارتىق. وسى جىل بويىنشا قۇنى 3 ملرد اقش دوللارى بولاتىن ساۋدا-ساتتىق جانە ينۆەستيتسيالىق باعىتتا كەلىسىمدەرگە قول قويىلدى. الداعى ءۇش جىلدا ەكى مەملەكەت بۇل سومانى 5 ملرد اقش دوللارىنا جەتكىزۋدى كوزدەپ وتىر.
– قازاقستانداعى وزبەكستان جىلى ەكى حالىقتىڭ شىنايى باۋىرلاستىعىن تانىتادى. بۇل بايلانىس تامىرىنىڭ تەرەڭدىگىمەن, ورتاق تاريحىمەن جانە بابالارىمىزدىڭ باي رۋحاني مۇرالارىمەن نىعايىپ وتىر, – دەدى مەملەكەت باسشىسى سول كەزدەسۋدە.
جىل بويىنا جۇزەگە اسقان بۇل باستاما تاراپتار اراسىنداعى ءتۇرلى باعىت بويىنشا ارىپتەستىك ورناتۋعا جول اشتى.
قازاقستانداعى وزبەكستان جىلى اياسىندا 200-گە تارتا شارا ۇيىمداستىرىلعانىن ايتا كەتكەن ءجون.
باۋىرلاستىق شارانىڭ ءبىر كورىنىسى مادەني شارالاردا كورىنىس تاپتى. استاناعا وزبەكستان ونەرپازدارى كەلىپ, كونتسەرت قويدى. وعان اتاقتى «ياللا» ءانسامبلى مەن «تۋمور», «ناۆباحور» بي ۇجىمدارى جانە بىرقاتار ونەر جۇلدىزى قاتىستى. انشىلەر ءبىزدىڭ ۇلتتىق اندەر مەن وزبەك كومپوزيتورلارىنىڭ تانىمال شىعارمالارىن شىرقادى. شىمكەنت پەن تۇركىستاندا, قىزىلوردادا وزبەك فيلمدەرىنىڭ كۇنى ءوتتى.