دارىندى بالالارعا ارنالعان №81 «Astana English School» گيمنازياسىندا «عاسىردان عاسىرعا» قالالىق زياتكەرلىك بايقاۋى ءوتتى. شارانى قالالىق ءبىلىم باسقارماسىنا قاراستى «استانا دارىنى» وڭىرلىك عىلىمي-پراكتيكالىق ورتالىعى ۇيىمداستىردى.
بايىپتى باسقوسۋدى ءبىلىم باسقارماسىنىڭ باسشىسى ەلميرا سۋحانبەرديەۆا اشتى.
– ءبىز قىزىقتى ۋاقيعانىڭ كۋاگەرى بولىپ وتىرمىز. بايقاۋ كەزەڭدەرى ۇلى اقىن اباي قۇنانباەۆتىڭ ءومىرى مەن شىعارماشىلىعىنا ارنالماق. ابايدى وقىماعان قازاقتى قازاق دەۋ – قيىن. ۇلى ويشىلدىڭ ولەڭدەرىن, قارا سوزدەرىن ۇيدە دە, مەكتەپتە دە جاتقا وقىدىڭدار. سايىستاعى ماقسات – اقىن تۋرالى جيعان-تەرگەن بىلىمدەرىڭدى پاش ەتۋ, – دەدى ول قاتىسۋشىلارعا قاراتا ايتقان سوزىندە.
بۇل شىعارماشىلىق بايگە وقۋشىلار اراسىندا كەڭىنەن تانىمال. وندا ەلوردالىق 8 مەكتەپتىڭ وقۋشىلارى ءوزارا باق سىناستى. بالالار ءبىرىنشى كەزەڭدە كورەرمەن نازارىنا ساحنالىق قويىلىم ۇسىندى. قويىلىم مۇحتار اۋەزوۆتىڭ «اباي جولى» ەپوپەياسىنداعى باستى كەيىپكەر تۇلعاسى, وي-تولعانىسى, جازۋشىنىڭ ءتۇيىندى يدەيالارى تۋرالى سىر شەرتتى. ەكىنشى اينالىمدا ءبىلىمپازدار «وقىعانىمىز اباي بولدى, توقىعانىمىز قالاي بولدى؟» دەگەن سۇراققا جاۋاپ بەردى. سوڭعى كەزەڭدە «سيقىرلى ساندىققا» سالىنعان قانداي زات ەكەنىن تابۋ كەرەك بولدى.
بايقاۋدىڭ گران-پري جۇلدەسىن №40 ورتا مەكتەپ وقۋشىلارى يەلەندى. ولار ابايدىڭ تۋعان جەرىنە جولداما الدى. جەڭىمپازدارعا سىيلىقتاردى فيلولوگيا عىلىمىنىڭ دوكتورى, جازۋشى, ابايتانۋشى تۇرسىن جۇرتباي تابىستادى. ءبىرىنشى ورىندى №76 جانە №64 مەكتەپ وقۋشىلارى ءوزارا ءبولىستى. توپ جارعاندارعا «اباي الىپپەسى» شىعارماسىنىڭ ەلەكتروندى نۇسقاسىن سىيعا تارتتى. ال ەكىنشى ورىن №78 جانە №48 مەكتەپتەرىنە بۇيىرسا, №3, №54 جانە №73 مەكتەپتەرى ءۇشىنشى ورىندى قاناعات تۇتتى. بايقاۋ قاتىسۋشىلارىنا م.اۋەزوۆتىڭ «اباي جولى» كىتابى مەن ديپ-لومدار بەرىلدى.
ەلباسى نۇرسۇلتان نازارباەۆ «اباي الەمى ءبىزدى جەتى تۇندە اداس-تىرمايتىن تەمىرقازىق. سوعان قاراپ تىلەگىمىزدىڭ دۇرىس-بۇرىسىن ساراپتاي الامىز» دەپ باعا بەرگەن. سوندىقتان دا, وقۋشىلار اراسىنداعى وتكىزىلگەن سايىستىڭ ماڭىزى زور.
گۇلدانا تالعاتقىزى, astana-akshamy.kz
