وتكەن سەنبى كۇنى استانانىڭ سول جاعالاۋىنداعى «عاشىقتار» ساياباعىنان قازاقستاننىڭ ەڭبەك ەرى, حالىق جازۋشىسى ءابىش كەكىلبايۇلىنىڭ اللەياسى اشىلدى.
تاعىلىمدىق ءمانى بار شاراعا مەملەكەت جانە قوعام قايراتكەرلەرى ومىربەك بايگەلدى, ورالباي ابدىكارىموۆ, اكادەميك كەنجەعالي ساعاديەۆ, ءماجىلىس دەپۋتاتى ساۋىتبەك ابدراحمانوۆ, قالامگەرلەر اكىم تارازي, تولەن ابدىك جانە جازۋشىنىڭ زايىبى كلارا جۇماباەۆا قاتىسىپ, اللەياعا 250-دەن استام ءتۇپ اعاش ەكتى. بۇل ىزگىلىكتى ءىس «رۋحاني جاڭعىرۋ» باعدارلاماسى اياسىندا
ۇيىمداستىرىلدى.
جۇرتشىلىق جاڭا اللەياعا تال ەگىپ بولعاننان كەيىن تۇعىرلى تۇلعامەن ومىردە جاقىن سىيلاسقان دوستارىنىڭ پىكىرلەرىن تىڭدادى.
«ءابىش سەكىلدى اسىل ازاماتقا ەلوردانىڭ ەڭ كورىكتى جەرىنەن اللەيا بەرىلىپ وتىر. مۇنىڭ تاعىلىمدىق ءمانى زور. ەندى وسى جەرگە كەلىپ, ادامدار جازۋشىعا قۇرمەت كورسەتەدى. اسىرەسە, بۇل – جاستارعا ۇلگى بولاتىن ونەگە. ءوز باسىم بۇعان ەرەكشە ريزا بولىپ وتىرمىن. اللەياعا كەلىپ, تال ەكتىم. تىرشىلىكتە بۇدان اسقان جاقسى ءىس جوق. وسىنداي كۇندەر كوپ بولسىن» دەپ وي قورىتسا كەنجەعالي ساعاديەۆ, قوعام قايراتكەرى ومىربەك باي-گەلدى: «بۇگىنگى يگىلىكتى ءىستىڭ ءجونى بولەك. ءابىش سەكىلدى تۋعان حالقىنا ولشەۋسىز مۇرا قالدىرعان تۇلعاعا قانداي قۇرمەت كورسەتسەك تە ارتىق بولمايدى. مۇنداي شارا جاس ۇرپاققا تاربيە بەرىپ قانا قويماي, ولاردى ەلدىككە, مەملەكەتشىلدىككە جەتەلەيدى» دەپ پاراساتتى ءسوز ايتتى. ال قالالىق ارداگەرلەر كەڭەسىنىڭ توراعاسى سانسىزباي ەسىلوۆ: «بۇل ءىس ءارى قاراي جالعاسا بەرسە دەيمىز. اعامىزدىڭ سەڭگىرلى سەكسەن جىلدىعى قىر استىندا تۇر. سوعان دايىندىق بۇگىن باستالدى دەپ ويلايمىن» دەپ تۇيىندەدى.
ارداقتى اعامىزدىڭ اسىل جارى كلارا جۇماباەۆا دا ءسوز الىپ, شارانى ۇيىمداستىرۋشىلار مەن قۋانىشتى بولىسۋگە كەلگەندەرگە ريزاشىلىعىن ءبىلدىردى.
«ءبىر اپتا بۇرىن ەسىل اۋدانىنىڭ اكىمى تولەگەن زاكاريانوۆ قوڭىراۋ شالىپ, ابەكەڭنىڭ اتىنان اللەيا اشپاق ويلارى بار ەكەنىن ايتتى. مەن بۇعان وتە قۋاندىم. ەلى ءۇشىن كۇنى-ءتۇنى ايانباي ەڭبەك ەتكەن ازاماتتى ۇمىتپاي, ارداقتاپ جاتقاندارىنا العىسىمدى ايتامىن. بۇگىن اللەياعا ابەكەڭنىڭ دوستارى جانە اعايىندارىمىزبەن كەلىپ, اعاش ەكتىك. سول اعاشىمىز بايتەرەكتەي ماۋەلى بولسىن» دەپ اقجارما تىلەگىن جەتكىزدى.
