قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ ۇيىمداستىرۋىمەن استانادا اسا كورنەكتى جازۋشى شىڭعىس ايتماتوۆتىڭ 90 جىلدىق مەرەيتويىنا ارنالعان «ادامزاتتىڭ ايتماتوۆى» اتتى ادەبي-مۋزىكالىق كەش ءوتتى.
كەشكە شىڭعىس تورەقۇلۇلىنىڭ ۇلى اسقار ايتماتوۆ, قىرعىز رەسپۋبليكاسىنىڭ مادەنيەت, اقپارات جانە تۋريزم ءمينيسترى ازامات قاپارۇلى, ايتماتوۆتىڭ جاقىن دوسى, كورنەكتى اقىن مۇحتار شاحانوۆ, كسرو حالىق ءارتىسى الىبەك دىنىشەۆ, كسرو مەملەكەتتىك سىيلىق لاۋرەاتى, قازاقستاننىڭ ەڭبەك سىڭىرگەن ءارتىسى ناتاليا ارىنباساروۆا, قر مەملەكەتتىك سىيلىعىنىڭ لاۋرەاتى مايرا مۇحامەدقىزى جانە باسقا دا بەلگىلى تۇلعالار قاتىستى.
«شىڭعىس ايتماتوۆتىڭ قازاقستانعا دەگەن قۇرمەتى ەرەكشە ەدى. جازۋشى ءوزىنىڭ «بوراندى بەكەت» شىعارماسىنداعى ەدىگە – ناعىز قازاقتىڭ بەينەسى ەكەنىن باسا ايتاتىن.وسىدان ون جىل بۇرىن شىڭعىس تورەقۇلۇلى ەلباسىمىزدىڭ شاقىرۋىمەن قازاقستانعا كەلىپ, ونىمەن رەسمي شارالاردان كەيىن جەكە سۇقباتتاسۋ مۇمكىندىگى تۋىپ ەدى. وكىنىشكە قاراي, بۇل سوڭعى كەزدەسۋىمىز ەكەن» دەدى قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەديۇلى.
شىڭعىس ايتماتوۆ شىعارمالارى كوزىنىڭ تىرىسىندە-اق الەمگە تارالدى. ورىس جانە قىرعىز تىلدەرىندە جازعان ونىڭ شىعارمالارى الەمنىڭ 150-دەن استام تىلدەرىنە اۋدارىلدى. كلاسسيك قالامگەر قىرعىزستاننىڭ جانە قازاقستاننىڭ حالىق جازۋشىسى, ساياسي قايراتكەر, ديپلومات بولدى.
ش. ايتماتوۆتىڭ شىعارماشىلىعى مەن تۇلعالىق قاسيەتى ءسوز بولعان كەشتە جازۋشىنىڭ درامالىق شىعارمالارى مەن كىتاپتارىنىڭ جەلىسى بويىنشا تۇسىرىلگەن كينوفيلمدەردەن ۇزىندىلەر كورسەتىلدى.
