تاۋەلسىزدىك كۇنى مەرەكەسى مەن استانانىڭ 20 جىلدىعىنا ارنالعان «استانام, سەنسىڭ ايبارىم» اتتى «التىن دومبىرا» ءVىى رەسپۋبليكالىق اقىندار ايتىسى ەلوردانى ەكى كۇن بويى دۇبىرگە بولەدى. مادەنيەت جانە سپورت مينيسترلىگى ۇيىمداستىرعان «ءسوز بارىمتاسىنا» جيىرما اقىن شاقىرىلىپ, ولاردىڭ ءبىر توبى ايتىستىڭ قورىتىندىسىندا ءتيىستى جۇلدەلەرمەن قاتار «مادەنيەت سالاسىنىڭ ۇزدىگى» اتاعىن الىپ قايتتى.
«شارشى توپتا ءسوز باستاۋدان قيىندىق كورگەم جوق» دەپ بۇقار جىراۋ بابامىز ايتپاقشى, ايتىستى باستاعان كەشەگى سىر سۇلەيلەرىنىڭ جالعاسىنداي اقىن نۇرمات مانسۇروۆ سول جاۋاپكەرشىلىكتى سەزىنىپ, ساحناعا شىقتى. ونىڭ قارسىلاسى دا وڭاي شاعىلاتىن جاڭعاق ەمەس ەدى, اقتوبە جەرىندە وتكەن اتاقتى حالىق اقىنى نۇرپەيىس بايعانيننىڭ شوبەرەسى ەرشات قايبولدين بولدى.
ەكى اقىن دا ءبىرىن-ءبىرى سوزبەن تۇيرەپ, بىرازعا دەيىن باردى. العاشقى جۇپ بولعان سوڭ ايتىستى جۇرگىزگەن بەلگىلى اقىن, نەشە جىلدان بەرى ايتىستىڭ «وتىمەن كىرىپ, كۇلىمەن شىعىپ جۇرگەن» ءجۇرسىن ەرمان دا ۋاقىتتان شەكتەمەدى. نۇرمات ەرشاتتىڭ «ءبىر ايتىستا باس جۇلدە السام, ۇيلەنەمىن» دەگەن ءسوز ايتقانىن, سودان بىرنەشە ولەڭجارىستا توپ الدىنان كورىنسە دە, سول ۋادەسىن ورىنداماي كەلە جاتقانىن تىلگە تيەك ەتتى. اقىندار تاۋەلسىزدىك مەرەكەسى كەلگەندە ايتپاي كەتۋگە بولمايتىن 1986 جىلعى جەلتوقسان كوتەرىلىسىن جىرلادى. بۇل جۇپتىڭ تارتىسىندا نۇرماتتىڭ باسىمدىعى كورىنىپ تۇردى. قازاقستاننىڭ ەڭبەك ەرى, كسرو حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆ باستاعان قازىلار القاسى دا جەڭىستى سوعان بەردى.
بۇل ايتىستىڭ ءبىر جاڭالىعى – قازىلار القاسىنان بولەك اقىندار ونەرىنە باعا بەرگەن تاۋەلسىز ساراپشىلار تاعايىندالدى. سولاردىڭ قاتارىنان ورىن العان بەلگىلى اقىن باۋىرجان حاليوللانىڭ نۇرمات پەن ەرشاتتىڭ ايتىسىنا كوڭىلى تولمادى. «اقىندار ەلدىڭ ماسەلەسىن ءتيىپ قاشىپ ايتتى. ەكەۋى دە جولدىڭ ەكى شەتىنە ءتۇسىپ الىپ, شاپتى دا وتىردى. بۇل ايتىستا جاۋاپتاسۋ, ءسوز قاعىسۋ بولعان جوق. اقىندارىمىز مينيستردى, اكىمدى ايتسا, حالىققا وتەمىز دەپ ويلايدى. ودان دا باسقا وزەكتى ماسەلەلەر, ءتىلىپ-ءتىلىپ ايتاتىن تاقىرىپتار بار عوي» دەدى ول.
«التىن دومبىرا» ايتىسى استاناعا ءتورت جىلدى ارالاتىپ بارىپ ورالدى. 2014 جىلى بالعىنبەك يماشەۆ باس جۇلدەنى يەلەنگەن سوڭ, بۇل ايتىس قاتارىنان ەكى جىل الماتىدا, بىلتىر اقتوبەدە ۇيىمداستىرىلدى. ەكىنشى جۇپتا اتىراۋلىق شالقارباي ىزباساروۆپەن ءسوز قاعىسقان استانالىق اسەم ەرەجەقىزى مۇنى دۇرىس بايقاپ, استانالىقتار «التىن دومبىرانى» وليمپيادانى كۇتكەندەي بولعانىن ولەڭگە قوستى. جالپى وسى ەكى اقىننىڭ تارتىسى قىز بەن جىگىت ايتىسىنىڭ ادەمى ۇلگىسىندەي بولدى. قورىتىندىسىندا قازىلار القاسىنىڭ شەشىمىمەن شالقارباي ۇپاي سانىنان ءسال باسىمدىقپەن اسەمنەن وزدى.
استانالىق ەركەبۇلان قاينازاروۆ پەن الماتىلىق رۇستەم قايىرتايۇلىنىڭ ايتىسىنا ساراپشى رەتىندە باعا بەرگەن ارقالى اقىن, جازۋشىلار وداعىنىڭ استانا قالاسىنداعى فيليالىنىڭ توراعاسى داۋلەتكەرەي كاپۇلى بۇل ەكەۋىنىڭ ءسوز قاعىسۋىن تاماشالاعاندا, فينالداعى ايتىستى كورگەندەي اسەردە بولعانىن ايتتى. راسىمەن دە, بۇل ايتىستا تەرەڭ وي دا, تاپقىرلىق تا, ءازىل دە ءبارى دە بولدى. قازىلار القاسىنىڭ مۇشەسى, بەلگىلى جازۋشى, مەملەكەتتىك سىيلىقتىڭ لاۋرەاتى قاجىعالي مۇقامبەتقاليۇلى رۇستەمگە «8» ۇپاي بەرگەندە, كورەرمەندەر ونىمەن كەلىسپەي, شۋلاي باستادى. اقىرى ءاسانالى ءاشىموۆ «توراعا رەتىندە ەكى داۋىسىمدى پايدالانىپ, ءرۇستەمگە بەرەمىن» دەپ حالىقتى تىنىشتاندىردى.
ءتورتىنشى جۇپ بولىپ سەرىك قۋانعان مەن سىرىم ادىلبەكوۆ ايتىستى. بەسىنشى جۇپتاعى تولەگەن جامانوۆ پەن ايبەك قاليەۆ ءبىر-ءبىرىنىڭ بەتىنەن الماي, سالماقتى ويلار ايتتى. قازىلار القاسى ەكەۋىنە دە ەڭ جوعارى ۇپايلاردى بەردى. قاراعاندىلىق ديدار قاميەۆ پەن الماتىلىق قازىرەت بەردىحاندى دا قازىلار وسىلاي باعالادى.
قازان ايىندا مادەنيەت جانە سپورت مينيسترلىگى ەلوردا مەرەيتويىنا ارناپ «جىر ارقاۋى – استانا» اتتى ايتىس ۇيىمداستىردى. سول دودادا رينات زايىتوۆ پەن «التىن دومبىرانىڭ» ەكى دۇركىن جەڭىمپازى مۇحتار نيازوۆ باس جۇلدەنى يەلەندى. بۇل جەردە «التىن دومبىرا» ايتىسى جەتىنشى رەت ۇيىمداستىرىلسا, رينات وعان العاشقى رەت قاتىسقانىن ايتا كەتۋ كەرەك. قوس قارسىلاس ءبىر-بىرىنە ساي بولىپ, كەلەسى كۇنگى ايتىستىڭ اقتىق كەزەڭىنە شىقتى.
كەز كەلگەن ايتىستىڭ ءسانى بولعان «قۇلمانبەتتىڭ قۇلىنى», مارقۇم ورازالى دوسبوسىنوۆتىڭ شاكىرتى بولاتبەك ورازباەۆ پەن قاراعاندىلىق تىلەگەن ءادىلوۆ جۇپ بولىپ ءتۇسىپ, كەشەگى جىراۋلارشا تولعادى. تالانتتى ايتىس اقىنى ەكەنىن تانىتقان مەيىربەك سۇلتانحان مەن كەرەكۋ وڭىرىندە ايتىستىڭ تۋىن جوعارى ۇستاپ كەلە جاتقان اسپانبەك شۇعاتاەۆتىڭ ايتىسىندا العاشقىسى باسىم ءتۇستى. العاشقى كۇندەگى ايتىستى تۇيىندەگەن ماقسات اقانوۆ پەن جانسايا مۋسينا قىز بەن جىگىت ايتىسىن جاساپ, ءازىل-قالجىڭدى مولىنان ايتىپ, جينالعان حالىقتى كۇلكىگە قارق قىلدى.
ەكىنشى كۇنى فينالعا شىققان ون ەكى اقىن, التى جۇپتى قۇرادى. سونىڭ ىشىندە رينات زايىتوۆ پەن قازىرەت بەردىحاننىڭ ءسوز قاعىسۋىنان سوڭ حالىق قازىلار القاسىنىڭ ريناتقا بەرگەن باعاسىنا كەلىسپەي, 15-20 مينۋتتاي شۋلاپ تۇرىپ الدى. اقىرى ريناتتىڭ وزىنە كورەرمەندەردى سابىرعا شاقىرۋعا تۋرا كەلدى.
ايتىستىڭ قورىتىندىسىندا جانسايا مۋسينانىڭ باعى جانىپ, ول باس جۇلدە – «التىن دومبىرانى» جەڭىپ الدى. ءبىرىنشى ورىندى جانە «ايتىستىڭ اقتاڭگەرى» اتاعىن ديدار قاميەۆ الدى. ەكىنشى ورىندى ەركەبۇلان قاينازاروۆ پەن مەيىربەك سۇلتانحان ءبولىستى. ءۇشىنشى ورىن جۇلدەسى رينات زايتوۆ, ماقسات اقانوۆ جانە رۇستەم قايىرتايۇلىنا تاراتىلدى. ال تولەگەن جامانوۆ مەتسەنات دۋلات تاستەكەەۆ تاعايىنداعان ارنايى ستيپەندياعا يە بولدى. ايتىسقا قاتىسقان وزگە اقىندار ارنايى اقشالاي جۇلدەلەردى الدى.
«التىن دومبىرا» يەگەرلەرى
2012 جىل – مۇحتار نيازوۆ
2013 جىل – جانداربەك بۇلعاقوۆ
2014 جىل –
بالعىنبەك يماشەۆ
2015 جىل –
اسپانبەك شۇعاتاەۆ
2016 جىل –
مۇحتار نيازوۆ
2017 جىل –
جانداربەك بۇلعاقوۆ
2018 جىل –
جانسايا مۋسينا
