ەلوردا اكىمدىگى تۇڭعىش رەت باس قالانىڭ جاستارىنا ارنالعان قايىرىمدىلىق بالىن ۇيىمداستىردى. وعان قاتىسقان 150 قىز-جىگىت «Ritz-Carlton» قوناقۇيىنىڭ زالىندا دوڭگەلەنە بي بيلەپ, ناعىز ەرتەگىنىڭ اتموسفەراسىن جاسادى.
دەبيۋتانتتاردىڭ ىشىندە ءتۇرلى ماماندىق يەلەرى بار. مۇعالىم مەن دارىگەردىڭ, كاسىبي ءبيشى مەن اسكەري قىزمەتكەردىڭ ءبىر-بىرىمەن جۇپتاسىپ بيلەپ جۇرگەنىن كورگەندە, اتالمىش شارانىڭ استانالىق جاستار ءۇشىن يدەيالار الماساتىن الاڭ بولا العانىن بايقادىق. ويتكەنى ولاردىڭ ءبارىن دە ورتاق ءبىر مۇددە – قايىرىمدىلىق جاساۋعا دەگەن قۇلشىنىس بايلانىستىرعان ەدى.
– قاتىسۋشىلار بال باستالارعا دەيىن قالاداعى قارتتار ءۇيى مەن بالالار ۇيىنە, تۇرمىسى تومەن وتباسىلارعا بارىپ, ونداعى جانداردىڭ حال-جايىن سۇراپ, قولدارىنان كەلگەنشە كوڭىلدەرىن كوتەردى. جالپى, بۇل شارانى قولعا الاردا ءبىز دە وسىنداي قايىرىمدى ىستەردى بارىنشا كەڭىنەن ناسيحاتتاۋدى ماقسات تۇتتىق, – دەدى استانا قالاسى قوعامدىق دامۋ ىستەرى باسقارماسىنىڭ باسشىسى دانيار ەسين.
كەش قورىتىندىسى بويىنشا «بال حانشايىمى» اتاعى 18 جاستاعى ءازيزا زەينوللاعا بەرىلسە, «بال حانزاداسى» تيتۋلى 21 جاستاعى ورالعازى تاڭاتقانوۆقا بۇيىردى. بۇلاردان بولەك, بەلسەندى دەبيۋتانتتارعا «جومارت جۇرەك», «قايىرىمدى جۇرەك», «ەرەكشە ۇلەسى ءۇشىن», «بەلسەندىلىگى ءۇشىن», «ومىرگە دەگەن قۇشتارلىعى ءۇشىن», «قايسارلىعى ءۇشىن» اتتى ارنايى نوميناتسيالار تابىس ەتىلدى.
جيىن اياسىندا اۋكتسيون ۇيىمداستىرىلىپ, وعان قىلقالام شەبەرلەرىنىڭ كارتينالارى مەن ءتۇرلى باعالى زاتتارى قويىلدى. اۋكتسيوننان تۇسكەن قارجى استاناداعى قارتتار مەن بالالار ۇيلەرىنە جانە تۇرمىسى تومەن وتباسىلارعا جۇمسالادى.
