ەلوردانىڭ بايىرعى ونەر وشاعى, ءبىر عاسىردان استام تاريحى بار م.گوركي اتىنداعى مەملەكەتتىك اكادەميالىق ورىس دراما تەاترى عيماراتىن كۇردەلى جوندەۋ جۇمىسى بەس جىلعا سوزىلىپ, ءالى دە جالعاسىپ جاتىر. ال سالىنعانىنا جارتى عاسىرعا جۋىقتاپ قالعان «جاستار» سارايى جاڭعىرتىلىپ, جاڭارعان قالپىندا ەسىگىن ايقارا اشقالى تۇر.
نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ باستاعان ءبىر توپ دەپۋتات اتالمىش نىسانداردى جوندەۋ جۇمىستارىمەن تانىستى. الدىمەن م.گوركي تەاترىنا بارىپ, اتقارىلىپ جاتقان جۇمىستاردىڭ ساپاسى مەن نىساندى پايدالانۋعا بەرۋ مەرزىمىن, مەردىگەردىڭ وسىنداي نىسانداردى جوندەۋ تاجىريبەسىن تالقىلادى. دەپۋتاتتار عيماراتتىڭ تاريحي كەلبەتى مەن ساۋلەت ەلەمەنتتەرىنىڭ ەرەكشەلىگىن ساقتاۋدىڭ ماڭىزىن اتاپ ءوتتى. جوندەۋ جۇمىستارىن باقىلاۋدا ۇستايتىندارىن جەتكىزدى.
– وتكەندە قالا اكىمى التاي سەيدىرۇلى تەاترعا كەلىپ, جوندەۋ جۇمىستارىمەن تانىسىپ شىقتى. ءتيىستى ەسكەرتپەلەردى ايتىپ, جۇمىس ساپاسىنا ءمان بەرۋدى تاپسىردى. سوندىقتان تەاتر باسشىلىعىنا دا, مەردىگەرگە دە ۇلكەن جاۋاپكەرشىلىك جۇكتەلىپ وتىر. قالالىق مادەنيەت باسقارماسى دا كوپتەگەن قولداۋ كورسەتىپ جاتىر. ءار اپتا سايىن جينالىس وتكىزىپ, جوندەۋ بارىسىن تالقىلايمىز. بۇرىن شاتىردان سۋ اعاتىن. سونى جاۋىپ, جوندەدىك. قارجى عيماراتتى جوندەۋگە عانا ەمەس, قاجەتتى قۇرال-جابدىقتارعا دا ءبولىندى. جاقىندا جارىق پەن دىبىس بەرەتىن جاڭا زامانعا ساي قوندىرعىلار جەتكىزىلۋى كەرەك, – دەدى تەاتر ديرەكتورى ەرنار جۇماتاەۆ.
قالالىق ءماسليحات دەپۋتاتى التىنشاش تابۋلدينا عيمارات ءحىح عاسىردا سالىنعاندىقتان, ونىڭ كەلبەتىن بۇزباي, تاريحي قالپىن ساقتاۋدىڭ ماڭىزىن اتاپ ءوتتى. تەاتر ديرەكتورىنىڭ شارۋاشىلىق ماسەلەلەرى جونىندەگى ورىنباسارى عاني كارىموۆتىڭ ايتۋىنشا, وسى جاعى ەسكەرىلگەن. ماسەلەن, سىنعان, ويىلعان, ۇگىتىلگەن كىرپىشتەردىڭ ورنىنا ەسكى, قۇلاعالى تۇرعان عيماراتتاردىڭ ماتەريالدارىن پايدالانۋ جوسپارلانعان. سونداي كىرپىشتەر ازىرگە پاۆلودار قالاسىنان تابىلىپ وتىر.
– سول كىرپىشتەر كەلمەي, تەاتر كىرپىشتەرىن بۇزدىرمايمىز, – دەدى ع.كارىموۆ.
قالالىق ءماسليحات دەپۋتاتى سەرىك ءتۇسىپوۆ قازىر قۇيىلىپ جاتقان كىرپىشتەردىڭ ساپاسى ناشار ەكەنىن, بەس-ون جىلدان كەيىن ءىرىپ كەتەتىنىن ايتتى.
دەپۋتاتتار عيماراتتىڭ كىرەبەرىسىنە پاندۋستاردى ورناتۋ كەرەكتىگىنە نازار اۋداردى. تەاتر باسشىلىعى ول ورناتىلاتىنىن جەتكىزدى.
ءبىر ايتا كەتەرلىگى, عيماراتتا جوندەۋ جۇرگىزىلىپ جاتقانىنا قاراماستان, تەاتر جۇمىسى توقتاعان جوق. الدىنداعى جىلدارى سپەكتاكلدەر بەيبىتشىلىك جانە كەلىسىم سارايىندا, اتالمىش تەاتردىڭ شاعىن زالىندا كورسەتىلسە, بىلتىردان بەرى مۋزىكالىق جاس كورەرمەن تەاترىنىڭ ساحناسىندا ءجۇرىپ جاتىر.
قالالىق مادەنيەت باسقارماسىنىڭ باسشىسى سانات شاپاشوۆتىڭ ايتۋىنشا, تاپسىرىلعان جۇمىستى ۋاقىتىندا ورىنداماعان مەردىگەرمەن سوتتاسۋ جۇرگىزىلىپ, كەلىسىمشارت توقتاتىلدى. سول سەبەپتەن جوندەۋ جۇمىستارى جىلدارعا سوزىلىپ كەتتى. جاڭا مەردىگەرمەن كەلىسىمشارتقا وتىرعاننان كەيىن جۇمىس جانداندى. قازىر ءتيىستى جۇمىستار قارقىندى جۇرگىزىلىپ جاتىر. تەاتردى پايدالانۋعا بەرۋ مەرزىمى بيىلعى جەلتوقسان ايىنا قويىلدى. وعان ۇلگەرتۋ ءۇشىن تۇنگى كەزەك قوسىلدى. 16 جەلتوقسان – تاۋەلسىزدىك كۇنى مەرەكەسىنە قاراي تەاتر قويىلىمدارىن جاڭارعان عيماراتتا قويا باستاۋى ءتيىس.
