نۇر-سۇلتان قالاسىنداعى «تارلان ارەنا» ستاديونىندا قازاقستان رەسپۋبليكاسىنىڭ ەڭبەك سىڭىرگەن سپورت قايراتكەرى ابدۋكاھار ابدراحمانوۆ ەسىمىن ەسكە الۋعا ارنالعان فۋتبول ءتۋرنيرى ءوتتى.
قايىرىمدىلىق قاعيداسىمەن وتكەن جارىسقا بۇرىنعى كاسىپقوي جانە اۋەسقوي فۋتبولشىلاردان قۇرالعان 6 كوماندا قاتىستى. ەكى كۇنگە جالعاسقان جارىستىڭ فينالىندا «تسەليننيك» جانە «دينامو» كوماندالارى كەزدەسىپ, «تىڭ يگەرۋشىلەر» جەڭىمپاز اتاندى. ال, ءۇشىنشى ورىن ءۇشىن وتكەن ماتچتا «ستەپنوگورسك» كومانداسى «قتج تسەنتر» ۇجىمىنان باسىم ءتۇسىپ, قولا جۇلدەگە قول سوزدى. ىرىكتەۋ ويىندارىندا سۇرىنگەن «اتباسار» جانە «ەڭبەك-كولۋتون» كوماندالارى دا جانكۇيەرلەردىڭ ىقىلاسىنا بولەنە ءبىلدى.
جەڭىمپاز جانە جۇلدەگەر اتانعان كوماندالار كۋبوكپەن, مەدالمەن جانە ديپلوممەن ماراپاتتالدى. سونداي-اق ءتۋرنيردىڭ ۇزدىك قاقپاشىسى, قورعاۋشىسى جانە شابۋىلشىسى بولىپ تانىلعان فۋتبولشىلار ارنايى سىيلىقتار الدى. ال, ابدراحمانوۆ اۋلەتى اتىنان جۇلدەگەر كوماندالارعا قارجىلاي سىيلىقتار بەرىلدى.
جارىستىڭ باس تورەشىسى, فۋتبولدان كسرو سپورت شەبەرى ۆلاديمير پاۆليۋك بۇل تۋرنير ءداستۇرلى جارىسقا اينالاتىنىن جەتكىزدى.
عالىم قوجابەكوۆ
