كونستيتۋتسيا كۇنى قارساڭىندا ارىپتەسىمىز, «استانا اقشامى» گازەتىنىڭ شەف-رەداكتورى تولەن تىلەۋباي «اقپارات سالاسىنىڭ ۇزدىگى» توسبەلگىسىمەن ماراپاتتالدى. توسبەلگىنى «باس رەداكتورلار كلۋبى» رەسپۋبليكالىق قوعامدىق بىرلەستىگىنىڭ پرەزيدەنتى, قر سەنات توراعاسىنىڭ كەڭەسشىسى بيبىگۇل جەكسەنباي تاپسىردى.
«ءوزىڭنىڭ قۇداي بەرگەن تالانتىڭدى, قابىلەتىڭدى ۇنەمى قامشىلاپ وتىر» دەگەندى ۇستانىپ, ۇنەمى ىزدەنىس ۇستىندە شىعارماشىلىعىن شىڭداپ جۇرەتىن تولەننىڭ قازاق جۋرناليستيكاسىندا وزىندىك ورنى بار.
ءار جىلدارى «سانا», «اق جول», «قازاقستان», «جاس قازاق ءۇنى», «التىن وردا», «جاس قازاق» گازەتىندە جازعان ومىرشەڭ ماقالالارى يدەياسىمەن, مازمۇنىمەن وقىرمانعا ورامدى وي ايتىپ, اتقارۋشى بيلىككە ءجون سىلتەدى.
ول جۋرناليستىك زەرتتەۋلەر مەن ساراپتامالىق ماقالالار, جولساپار وچەركتەردەن بولەك, الەۋمەتتىك عىلىمدار ماگيسترى رەتىندە عىلىمي-پۋبليتسيستيكالىق ماقالالارىمەن تانىمال.
«الاساپىران امەريكا», «تاۋەلسىزدىك – تۇمارىم», «تسيفرلىق جولايرىق: قازاقستان گازەتتەرىنىڭ بۇگىنى مەن ەرتەڭى» اتتى كىتاپتاردىڭ اۆتورى.
قالامى جۇيرىك, ويى ۇشقىر قالامگەر حالىقارالىق, رەسپۋبليكالىق بايقاۋلار, فەستيۆالدەر مەن فورۋمداردىڭ جۇلدەگەرى.
بۇگىندە «Astana aqshamy» رەسپۋبليكالىق قوعامدىق-ساياسي گازەتىنىڭ شەف-رەداكتورى بولىپ قىزمەت ەتىپ, ەلدىڭ جانە ەلوردانىڭ تىنىس-تىرشىلىگىن اقپاراتتاندىرۋعا ۇلەس قوسىپ, مەملەكەتتىك باعدارلامالاردى ناسيحاتتاۋدا بەلسەندىلىك تانىتىپ كەلەدى.
تولەننىڭ تاعى ءبىر قىرى – قوعامدىق جۇمىستارعا بەلسەندى ارالاسىپ, «باس رەداكتورلار كلۋبى» قوعامدىق بىرلەستىگىنىڭ مۇشەسى رەتىندە قازاق جۋرناليستيكاسىنىڭ دامۋىنا, جاڭا دەڭگەيگە كوتەرىلۋىنە ۇلەس قوسۋدا. ارىپتەسىمىزدى مەرەيلى ماراپاتىمەن قۇتتىقتاپ, شىعارماشىلىق تابىس تىلەيمىز!
