نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ باستاعان ءبىر توپ دەپۋتات ەلوردادا جاسىل جەلەكتى كۇتىپ ۇستاۋ بارىسىن تەكسەردى. سونىڭ ىشىندە سۋارۋ جۇيەسىنىڭ جۇمىسىمەن تانىسىپ, بىرقاتار اۋماقتاردى ارالادى.
– وتكەن جىلى ءماسليحاتتا قالادا وتىرعىزىلعان اعاشتاردىڭ قۋراپ قالۋ ماسەلەسىن كوتەردىك. سونىڭ ىشىندە سۋارۋ جانە ۇڭعىمالار جۇيەلەرىنىڭ بولۋ ماڭىزىن ايتتىق. ونىڭ سەبەبى شاھاردا سۋارۋعا ارنالعان سۋدى تاسىمالدايتىن ەكى-اق ورىن بار. سونىڭ ءبىرى اق جول كوشەسىندەگىسى دۇرىس جۇمىس ىستەمەيدى. ال ەكىنشىسى كەنەسارى كوشەسىنىڭ سوڭىندا ورىن تەپكەن. باسقا تەحنيكالىق سۋدى تاسىمالداپ جەتكىزەتىن ورىندار جوق. ەكىنشىدەن, تاسىمالداناتىن تەحنيكالىق سۋدىڭ تەكشە مەترى 4300 تەڭگە تۇرادى. بۇل وتە قىمبات, «التىن سۋ» دەسە دە بولادى. سوندىقتان ءار ساياباق پەن سكۆەردە 3-10 تەكشە مەترلىك كولەمدەگى ۇڭعىما جۇيەلەرىن ورناتۋدى ۇسىندىق. بۇل جۇمىس بيىل جاسالدى. وسىنىڭ ارقاسىندا وسى جىلى اۋداندارعا بەرىلەتىن 4 ميلليارد تەڭگەگە جۋىق قارجىنى ۇنەمدەدىك, – دەدى ەرلان كاناليموۆ.
«استانا-كوگالداندىرۋ قۇرىلىسى» جشس باس ديرەكتورى ايبار ءناۋرىزالىنىڭ ايتۋىنشا, بيىل بىرقاتار ساياباقتار مەن سكۆەرلەردە سۋارۋ جۇيەلەرى قالپىنا كەلتىرىلىپ, ۇڭعىمالار جۇيەلەرى ورناتىلدى. بۇل جۇمىس جالپى 46 گەكتار اۋماقتا اتقارىلدى. ءماسليحات دەپۋتاتتارى وسى جۇيەلەردىڭ جۇمىسىمەن تانىستى. قارجى مينيسترلىگى عيماراتى جانە اسكەري-تاريحي مۋزەي ماڭىنداعى جۇمابەك تاشەنەۆ ەسكەرتكىشى اينالاسىنداعى سۋارۋ جۇيەلەرى قالپىنا كەلتىرىلگەننەن كەيىن جاسىل جەلەك جايقالا باستادى. ەسكەرتكىشتىڭ اينالاسى كوركەيتىلىپ, كوز قۋانتاتىن كورىنىسكە اينالدى. ءماسليحات دەپۋتاتتارىنىڭ وعان كوڭىلدەرى تولدى. ال ر.قوشقارباەۆ داڭعىلى مەن قورداي كوشەسىنىڭ قيىلىسىندا جاڭادان بوي كوتەرگەن قوعامدىق كەڭىستىكتە ۇڭعىما جۇيەسى ورناتىلدى. دەپۋتاتتار سونىڭ جۇمىسىمەن دە تانىستى.
