«اشىق ميكروفون» فورماتىندا وتكەن جيىندا استانا قالاسىنىڭ اكىمى جەڭىس قاسىمبەك پەن ەلوردالىق كاسىپكەرلەر كەزدەستى. بۇل باسقوسۋدا ىسكەر ازاماتتار ماڭىزدى ماسەلەلەردى كوتەردى. سونداي وزەكتى قاجەتتىلىكتەردى ۇسىنىپ وتىرمىز.
وقۋشىلار تاعامىنىڭ باعاسى وزگەرە مە؟
«وتانداستار» جشس ديرەكتورى اناستاسيا زاحارەنكوۆا ءبىلىم بەرەتىن ۇيىمداردا ءبىر وقۋشىنىڭ از مازىرىنە 584 تەڭگە قارالاتىنىن, بۇل قارجىعا ساپالى دا قۇنارلى ىستىق تاعامدى قالاي دايىنداۋعا بولاتىنىن سۇرادى.
– ينفلياتسيا كۇن سايىن ءوسىپ جاتىر. ءبىر بالاعا قۇنارلى تاعامدارمەن اس ءمازىرىن دايىندايتىن بولساق, ول 700 تەڭگەدەن اسادى. قازىر كاسىپكەرلەر پايدا تابۋدى بىلاي قويعاندا, شىعىنعا باتۋدا. ءبىز ءبىر بالاعا ەسەپتەلگەن مەكتەپ تاماعىنىڭ قۇنىن كوتەرۋدى سۇرايمىز, – دەدى كاسىپكەر.
ەلوردا اكىمى قازىر ءبىر بالاعا مەكتەپتەگى تاماقتاندىرۋ كولەمىن ارتتىرۋ جۇمىستارى جۇرگىزىلىپ جاتقانىن اتاپ ءوتتى.
– سىزدەرگە ءسوز بەرەمىن, ءبىر بالانىڭ تاماقتانۋ قۇنىن شامامەن 700 تەڭگەگە جەتكىزەمىز, – دەدى جەڭىس قاسىمبەك.
قازىردىڭ وزىندە مەكتەپتەگى جاڭا اس مازىرىنە ەسەپتەۋ جۇرگىزىلۋدە. بىراق اكىم بيۋدجەتتىڭ شەكسىز ەمەس ەكەنىن ەسكەرتتى.
– بالاباقشا مەن مەكتەپ سالۋ – ماڭىزدى قاجەتتىلىك. قالانى جىلۋمەن قامتاماسىز ەتۋ, ساپالى سۋ جەتكىزۋ مىندەتى دە تۇر. بىراق بىزدە بيۋدجەت – بىرەۋ. سوندىقتان ماسەلەنىڭ ماڭىزىنا قاراي كەزەڭ-كەزەڭىمەن شەشەمىز, – دەدى قالا اكىمى.
ءوز كەزەگىندە استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ جاڭا اس ءمازىرى ازىرلەنىپ جاتقانىن, ونىڭ الدىن الا قۇنى 697 تەڭگە ەكەنىن اتادى.
اۆتوتۇراق تەگىن بولا ما؟
استانا قالاسىنىڭ حالىق سانى وسۋىمەن قاتار اۆتوكولىك سانى ارتىپ كەلەدى. كوشەلەردىڭ اۆتوكولىك وتكىزۋ قابىلەتى تومەندەپ, كەپتەلىستەر پايدا بولا باستادى. بارىنەن بۇرىن, اۆتوتۇراق ماسەلەسى وزەكتىلىگىن جويماي تۇر. شاھارداعى الەۋمەتتىك نىساندار ماڭىنداعى اۆتوتۇراقتار اقىلى. وسى ماسەلەنى شەشۋدى «Qazproperty» مەنەدجمەنت جانە سەرۆيستىك كومپانيالار قاۋىمداستىعىنىڭ باسشىسى كونستانتين گلۋشكو كوتەردى.
استانا قالاسىنىڭ اكىمى جەڭىس قاسىمبەك قالا تۇرعىندارىنا تەگىن اۆتوتۇراقتاردى قايتارۋعا ۋادە بەردى.
«تۇراق الاڭدارىنىڭ ورىندارىن قايتا قاراستىرامىز. الەۋمەتتىك نىساندارداعى تۇراقتار تەگىن بولادى» دەدى قالا اكىمى.
اقىلى تۇراق ورىندارى قالا مەنشىگىندە, ولاردى «استانا تۇراق كەڭىستىگى» جشس باسقارادى. اقىلى تۇراقتى كولىك جۇرگىزۋشىسى پايدالانعان جاعدايدا ساعاتىنا 100 تەڭگە تولەيدى.
بۇگىندە استانادا 7 مىڭنان استام اقىلى اۆتوتۇراق بار. الايدا اۆتوتۇراقتاردىڭ سەرۆيستىك قىزمەتى كولىك جۇرگىزۋشىلەرىنىڭ كوڭىلىنەن شىقپايدى. بۇل تۋرالى پرەزيدەنت قاسىم-جومارت توقاەۆ تا ەسكەرتكەن ەدى.
– دامىعان ەلدەردىڭ ءىرى مەگاپوليستەرىندە كوپ دەڭگەيلى اۆتوتۇراقتار سالىپ, اقىلى قىزمەت كورسەتەدى. بىراق ءبىزدىڭ شەنەۋنىكتەر ىزدەنبەي, بۇرىننان جابدىقتالعان اۆتوتۇراقتاردى كوك تۇسپەن بەلگىلەپ, اقشا تاپقاندى ءجون كورەدى. بۇل ارادا تابىستىڭ 75 پايىزى جەكە سەرىكتەستىڭ قالتاسىنا تۇسەدى, – دەدى QazProperty قاۋىمداستىعىنىڭ وكىلى.
جەرگىلىكتى وندىرۋشىلەردى تارتۋ ماڭىزدى
ەل ماكروەكونوميكاسىن كوتەرۋدە وتاندىق كاسىپكەرلەردى قولداپ, ولار وندىرەتىن ونىمدەرگە سۇرانىستى ارتتىرۋ – ماڭىزدى باستامانىڭ ءبىرى. مىنە, وسى ماسەلەنى «Qazaq Stone» جشس ديرەكتورى داۋرەن اعزىموۆ كوتەردى. ونىڭ سوزىنشە, «جايلى مەكتەپ» ۇلتتىق جوباسىن جۇزەگە اسىرۋدا وتاندىق تاۋار وندىرۋشىلەردى قولداۋ ماڭىزدى ەكەنىن ايتتى. استانادا بىرقاتار قۇرىلىس ونىمدەرى, جيھازدار, تاس, بەتون, ەلەكتر جابدىقتارى, پلاستيكالىق تەرەزەلەر, كابەلدەر, قۇبىرلار جانە تاعى باسقالار شىعارىلاتىنىن اتاپ ءوتتى.
اكىم بۇل باعىتتا مەردىگەر كومپانيالارعا ناقتى تاپسىرما بەرەتىنىن ايتتى.
«قالا ءتۋريزمىن دامىتۋ ورتالىعى» بىرلەستىگىنىڭ ديرەكتورى تاتيانا ۆەرنيتسكايا تۋريزم ينفراقۇرىلىمىن دامىتۋدا اكىمدىك تۋريزم ءبولىمىن قۇرعانى دۇرىس ەكەنىن ايتتى.
باس قالانىڭ باسشىسى ىشكى ءتۋريزمدى دامىتۋ ماڭىزدى باسىمدىق ەكەنىن اتاپ, قۇزىرلى باسقارما بۇل باعىتتا جۇمىس ىستەپ جاتقانىن, ۇسىنىستى قاراستىرىپ كورەتىنىن اتادى.
