ەلباسى 8 ناۋرىز – حالىقارالىق ايەلدەر كۇنىنە ارنالعان «كوكتەم شۋاعى» اتتى سالتاناتتى كونتسەرتكە باردى. مەملەكەت باسشىسى قازاقستاننىڭ بارلىق ايەلدەر قاۋىمىن 8 ناۋرىز – حالىقارالىق ايەلدەر كۇنى مەرەكەسىمەن قۇتتىقتادى.
نۇرسۇلتان نازارباەۆ ەل ومىرىندە ايەلدەردىڭ ەرەكشە ءرول اتقاراتىنىنا توقتالىپ, قازاقستانداعى وسكەلەڭ جاس ۇرپاقتىڭ ساناسىنا ادامگەرشىلىك قۇندىلىقتاردى ءسىڭىرۋدىڭ قاجەتتىلىگىن ايتتى.
– جاھاندانۋ جاعدايىندا قىزدارىمىزعا ءتان اسىل قاسيەتتەردى ساقتاۋىمىز كەرەك. ينتەرنەت زامانىندا قاپتاعان اقپاراتتار لەگىن ءبىرجولا توقتاتۋ مۇمكىن ەمەس. ءاربىر بويجەتكەننىڭ جاقسى مەن جاماندى اجىراتا بىلەتىن ىشكى سۇزگىسى بولۋى قاجەت, – دەدى ەلباسى.
مەملەكەت باسشىسى قابىلدانعان بەس الەۋمەتتىك باستاما, ەڭ الدىمەن, ايەلدەر قاۋىمىنا ارنالعانىن ايتتى.
نۇرسۇلتان نازارباەۆ قازاقستان ايەلدەرىنىڭ بويىندا ەلىمىزدەگى بەيبىتشىلىك پەن بىرلىكتى نىعايتۋعا سەپتىگىن تيگىزەتىن مەيىرىمدىلىك پەن جاسامپازدىق ەنەرگياسىنىڭ سارقىلمايتىن كوزى بار ەكەنىن اتاپ ءوتتى.
– بۇگىندە جاس ۇرپاقتىڭ تاربيەسى مەن ولاردىڭ ءبىلىم الۋىنا بايلانىستى بۇكىل سالماق سىزدەرگە ءتۇسىپ وتىر. بالا قامقورلىعىنا قاتىستى نەگىزگى مىندەتتى وزدەرىڭىزگە الىپ, ولاردىڭ دۇنيەتانىمىن قالىپتاستىراسىزدار, وزىنە دەگەن سەنىمىن جەتىلدىرەسىزدەر. سىزدەر ءوز سەنىمدەرىڭىزبەن, ۇمىتتەرىڭىزبەن جانە ماحابباتتارىڭىزبەن ەلىمىزدىڭ جارقىن بولاشاعىنىڭ بەرىك نەگىزىن قالاپ كەلەسىزدەر, – دەدى نۇرسۇلتان نازارباەۆ.
مەملەكەت باسشىسى بۇگىندە ەلىمىزدە 250 مىڭعا جۋىق انانىڭ «التىن القامەن» جانە «كۇمىس القامەن» ماراپاتتالعانىنا نازار اۋدارىپ, مەملەكەتىمىزدىڭ قارقىندى دامۋىنا قازاقستاندىق ايەلدەردىڭ زور ۇلەس قوسقانىن اتاپ ءوتتى.
– جاڭا ۇرپاقتىڭ دۇنيەگە كەلۋى جانە حالقىمىزدىڭ كوبەيۋى – مەملەكەتىمىزدىڭ باستى ستراتەگيالىق ماقساتى. ايەلدەر جەتىستىككە جەتە المايتىن ەشقانداي سالا جوق. سىزدەر كاسىبيلىك پەن سپورتتىڭ, عىلىم مەن ساياساتتىڭ شىڭدارىن باعىندىرا الاسىزدار. قازىرگى تاڭدا ءۇش مىڭعا جۋىق دوكتورانتتىڭ 60 پايىزى – ايەلدەر. ءماجىلىس دەپۋتاتتارىنىڭ ۇشتەن بىرىنە جۋىعى – قىز-كەلىنشەكتەر. جالپى, مەملەكەتتىك قىزمەتتەگى ايەلدەردىڭ ۇلەس سالماعى ەلۋ پايىزدان اسادى. مۇنى مەملەكەتتى باسقارۋ ءىسىنىڭ تيىمدىلىگىن ارتتىرۋعا سەپتىگىن تيگىزەتىن دۇرىس ءۇردىس دەپ سانايمىن, – دەدى قازاقستان پرەزيدەنتى.
نۇرسۇلتان نازارباەۆ ەلىمىزدەگى بارلىق ەر-ازاماتتاردىڭ اتىنان ايەلدەر قاۋىمىن تاعى دا مەرەكەلەرىمەن قۇتتىقتاپ, ولارعا باقىت, ماحاببات پەن باق-بەرەكە تىلەدى.
سوڭىندا مەملەكەت باسشىسى وڭتۇستىك قازاقستان وبلىسىنىڭ تۇرعىنى, كوپ بالالى انا ا.تۇزەلباەۆانى «التىن القامەن» جانە استانا تۇرعىنى ر.اياعانوۆانى «كۇمىس القامەن» ماراپاتتادى.
