ۇلتتىق مۋزەيدە اقىن قازكسر حالىق جازۋشىسى ءماريام حاكىمجانوۆانىڭ 115 جىلدىعىنا ارنالعان ءداستۇرلى «تاڭ شولپان» كورمەسى اشىلدى. كورمەگە «تاڭ شولپان» حالىقارالىق تاۋەلسىز سۋرەتشى ايەلدەر قورىنا مۇشە سۋرەتشىلەردىڭ تۋىندىلارى قويىلدى.
الدىمەن ءماريام حاكىمجانوۆانىڭ شىعارماشىلىق جانە قوعامدىق قىزمەتىنىڭ كەزەڭدەرى, قازاقستاننىڭ بەينەلەۋ ونەرىن دامىتۋدىڭ وزەكتى ماسەلەلەرى قامتىلعان «دوڭگەلەك ۇستەل» ءماجىلىسى ۇيىمداستىرىلدى. وندا سۋرەتشىلەردىڭ جاعدايى باياندالدى. قاتىسۋشىلار قوعامداعى ايەلدەر شىعارماشىلىعىنىڭ ماقساتى مەن مىندەتتەرى تۋرالى پىكىر الماستى.
ۇلتتىق مۋزەيدىڭ ونەرتانۋ ءبولىمىنىڭ جەتەكشىسى ەلدوس مەرتەنوۆ شارانىڭ ماڭىزدىلىعىن اتاپ ءوتتى.
– ءماريام حاكىمجانوۆا – ءوز جىرلارىندا وتان, ءومىر, بەيبىتشىلىك تۋرالى ۇلكەن ازاماتتىق وي تولعاعان تۇلعا. تاعدىرى ەرەكشە اقىننىڭ ءومىر جولىن ءبىرى بىلسە, ءبىرى بىلمەيدى. سوندىقتان, بۇگىنگى كورمەنىڭ بەرەر ءتالىمى مەن اتقارار رۋحاني ءرولى وتە زور, – دەدى ە.مەرتەنوۆ.
«تاڭ شولپان» حالىقارالىق تاۋەلسىز سۋرەتشى ايەلدەر قورىنىڭ پرەزيدەنتى, قازاقستان سۋرەتشىلەر وداعىنىڭ مۇشەسى ءجاميلا تاكەننىڭ ايتۋىنشا, اتالمىش قور سۋرەتشى ايەلدەردىڭ شىعارماشىلىق دامۋىنا ارنالعان الاڭ. وندا ارقايسىسى ءوزىنىڭ كوركەمدىك ءستيلى مەن كومپوزيتسيالىق يدەياسىن كورسەتە الادى. ال اتالمىش كورمەدە 47 سۋرەتشىنىڭ 123 تۋىندىسى كورەرمەن نازارىنا ۇسىنىلدى.
جالپى «تاڭ شولپان» حالىقارالىق تاۋەلسىز سۋرەتشى ايەلدەر قورىنداعى سۋرەتشىلەردىڭ ەسىمدەرى كوپتەگەن رەسپۋبليكالىق جانە حالىقارالىق كورمەلەر ارقىلى تانىس. بۇل قاتاردا كاميلا جاپالوۆا, دينارا نۋگەر, گۇلنار يسينا, بوتا تولەش, ت.ب. قىلقالام شەبەرلەرى بار.
بايان اسىلبەكوۆا
