بيىل ەلوردا مەشىتتەرىندە رامازان ايىنىڭ قۋانىشىن سۇيىنشىلەي كەلەتىن مۇباراك ايت مەرەكەسى ۇلتتىق سيپاتتا تويلانا باستادى. الدىمەن تاڭعى التىدان قالا مەشىتتەرىندە قاسيەتتى قۇران اياتتارى وقىلىپ, بۇدان سوڭ ورازا ايتى مەرەكەسى جايىندا ۋاعىز ايتىلىپ, ايت نامازىنىڭ ەرەكشەلىكتەرى باياندالدى.
«نۇر استانا» ورتالىق مەشىتىنە ايت نامازىنا جيىلعان حالىقتىڭ سانىندا ەسەپ بولمادى. سەبەلەي جاۋعان جاڭبىرعا قاراماستان بۇقارانىڭ بۇل مەرەكەگە دەگەن ىقىلاسىنىڭ جىلداعىدان ەرەكشە ەكەنىن بايقاۋعا بولادى. ايت نامازىنان سوڭ جيىلعان جۇرتشىلىق كيىز ۇيلەردە جايىلعان اق داستارقاننان ءدام تاتىپ, كوتەرىڭكى كوڭىل-كۇيدە ايت مەيرامىن بۇقارا بولىپ تويلادى.
مەرەكەلىك شارانىڭ وتۋىنە ۇيىتقى بولعان قمدب-نىڭ استانا قالاسىنداعى وكىلى, «نۇر استانا» مەشىتىنىڭ باس يمامى ناۋرىزباي قاجى تاعانۇلى الميساقتان مۇسىلمان حالقىنىڭ ەكى ۇلىق مەرەكەسى – قۇربان ايت مەن ورازا ايتىن ۇلتتىق سيپاتتا وتكىزۋدى قولعا الىپ وتىرعاندىقتارىن ايتتى. «بيىلعى جىل ءدىني باسقارمامىزدىڭ توراعاسى, باس ءمۇفتي ەرجان قاجى مالعاجىۇلىنىڭ باستاماسىمەن «ءدىن جانە ءداستۇر» جىلى دەپ جاريالانعانى بۇقاراعا بەلگىلى. مىنە, وسى اتاۋدىڭ ءوزى جايدان جاي ەمەس. ءبىز – اتا ءدىنىمىز بەن بابا ءداستۇرىن ۇيلەستىرە بىلگەن دانا حالىقتىڭ ۇرپاعىمىز. ءبىزدىڭ بارلىق دەرلىك ءداستۇرىمىز شاريعاتپەن بىتە قايناسقان. سپورت, سالاۋاتتى ءومىر سالتى – يسلام ءدىنىنىڭ باستى ۇستانىمى. دەنساۋلىق – امانات. ال, وسىناۋ ۇلىق مەرەكەدە باس قوسىپ, كورىسىپ, ءبىر-بىرىمەن قاۋىشىپ, داستارقانداس بولۋ – نيەتتەس بولۋدىڭ نىشانى. نيەتى, تىلەگى ءبىر حالىقتىڭ بولاشاعى ەشقاشان بۇلىڭعىر بولمايدى. تاۋەلسىز ەلدىڭ اق تاڭىندا جۇرتشىلىق بۇگىن ءماز-مەيرام, بايقاعان بولارسىزدار, ەسى كىرگەن بالادان ەڭكەيگەن قارياعا دەيىن وسى مۇباراك مەرەكەنىڭ ورتاسىندا ءجۇر. وسىنىڭ بارلىعى – اللانىڭ قازاق حالقىنا بەرگەن شەكسىز نىعمەتى» دەدى ول.
ىزگى مەرەكەلىك شارالار ايت نامازىنان كەيىنگى ايت داستارقانىنا ۇلاستى. وسىلايشا, قاسيەتتى رامازان ايىمەن قيماي قوشتاسقان حالىق ايت مەرەكەسىنىڭ قۋانىشىنا دا تويات تاپپاي, ۇلتتىق ويىنداردىڭ كورىگىن قىزدىرا ءتۇستى. ال, ءار سايىستىڭ جۇلدەگەرلەرىنە «نۇر استانا» ورتالىق مەشىتى تاراپىنان ارنايى باعالى سىيلىقتار بەرىلدى.
جايىق ناعىماش
