تيمۋر مۇراتوۆ, استانا قالاسى №2 اۋرۋحاناسى باس دارىگەرىنىڭ ورىنباسارى: سەرۆيستىڭ ۇلكەنى – سىرقاتتارعا ساپالى ەم جاساۋ

باقىتجان:
– رەميسسيا ستادياسىنداعى وڭ جاقتىڭ سوزىلمالى مەزوتيمپانيتى دەگەن دياگنوز قويىلدى. سونىمەن بىرگە, قۇلاق مۇكىستىگىنىڭ ءتورتىنشى دەڭگەيى, سول جاقتىڭ ادگەزيۆتى ءوتيتى, كوندۋكتيۆتى قۇلاق مۇكىستىگىنىڭ ءبىرىنشى دەڭگەيى بار. بۇل اۋرۋلاردى سىزدەردە ەمدەتە الام با؟
– مۇنداي اۋرۋلارعا بارلىق جەردە كونسەرۆاتيۆتى ەم قولدانىلادى. بۇل جونىندە لور بولىمشەسىنىڭ مەڭگەرۋشىسى ەرمەك ەلەمەسۇلى يمانعاليەۆتەن اقىلى كەڭەس الۋىڭىزعا بولادى.

اقەركە:
– جاتاقحانادا تۇرامىن. اس-سۋىمدى ۋاقىتىلى ىشپەيمىن, كوبىنە قۋىرىلعان تاماقتار جەيمىن. اسقازانىم قىجىلداپ اۋىرادى. تاماق ىشسەم اۋىرعانى قويادى. سالدەن سوڭ تاعى ءبۇرىپ اۋىرادى. قالاي ديەتا ۇستاۋعا بولادى؟ نە ىستەۋگە بولادى؟
– مۇنداي سۇراققا تەلەفون ارقىلى جاۋاپ بەرۋ وتە قيىن. سوندىقتان سىزگە جەرگىلىكتى جەردەگى ەمحاناعا بارىپ قارالىپ, قاجەتتى تەكسەرىلۋلەردەن ءوتىپ, بىلىكتى مامانداردان, تەراپەۆت ءدارى­گەردەن نەمەسە گاستروەنتەرولوگتان اقىل-كەڭەس العان دۇرىس بولادى.

قانات:
– قايىرلى كۇن! مۇرنىم سىنىپ, كەيىن قيسىق ءبىتتى. ونى ءسىزدىڭ اۋرۋحانادا تۇزەتۋ مۇمكىن بە؟
– ول ءۇشىن قالالىق №2 اۋرۋحانانىڭ لور بولىمشەسىنە كەلىپ, دارىگەرگە كورىنىڭىز. ونداعى دارىگەرلەر جوعارى ساناتتى قىزمەت كورسەتەدى. الدىمەن ءسىزدىڭ مۇرنىڭىزدى رەنتگەنگە تۇسىرەدى. سوسىن رينوپلاستيكا نەمەسە ەندوسكوپيالىق ادىسپەن وتا جاساۋ ارقىلى مۇرىن ىشىندەگى شەمىرشەكتى تۇزەتىپ بەرەدى. ەگەر ءسىز اقىلى تۇردە قىزمەت العىڭىز كەلسە, مۇمكىندىگىنشە تاڭەرتەڭگى ۋاقىتتا تىكەلەي ءبىزدىڭ اۋرۋحاناداعى اقىلى ەمحاناعا كەلىپ, مامان دارىگەرگە جازىلاسىز. مامان سىزگە كەڭەس بەرىپ, قاجەتتى اناليزدەرىمەن رەنتگەن سۋرەتىنىڭ قورىتىندىسى بويىنشا قاي ۋاقىتتا وتا جاساۋ كەرەكتىگىن ايتادى. اقىلى ەم قابىلداۋ ءۇشىن ءبىزدىڭ اۋرۋحانامەن كەلىسىمشارتقا وتىراسىز. دارىگەرلەر قاجەت دەپ تاپسا, سىزگە سول كۇنى وتا جاسالادى. ەگەر تەگىن مەديتسينالىق كومەك العىڭىز كەلسە, وندا جەرگىلىكتى مەكەنجايىڭىز بويىنشا ءوزىڭىز تىركەلگەن ەمحاناعا بارىپ, لور دارىگەرىنە قارالىڭىز. ول ءسىزدى ناۋقاستاردى گوسپيتاليزاتسيا پورتالىنا تىركەيدى. كەزەگىڭىز كەلگەن كەزدە ءبىزدىڭ ستاتسيونارعا كەلىپ تۇسەسىز. مۇندا سىزگە اقىسىز مەديتسينالىق كومەك كورسەتىلەدى.

ساۋلە قايىرجانوۆا:
– قالالىق №2 اۋرۋحانادا بۇيرەك كيستاسىنا وتا جاسالا ما؟
– بۇيرەكتىڭ كيستاسى – قاتەرسىز (دوبروكاچەستۆەننىي) قۇرىلىم. قازىرگى كەزدە ونى ەمدەۋدىڭ بۇكىل الەمدە دۇرىس دەپ تابىلعان جولى – ەندوسكوپيالىق جولمەن كيستانى الىپ تاستاۋ. بۇگىنگى زامان تالابىنا ساي ەمدەۋ ءتۇرى وسى. وتا ناركوز بەرۋ ارقىلى جاسالادى جانە ونداي كەزدە پاتسيەنتتىڭ ەش جەرىنە پىشاق تيمەيدى.

ماقپال قۇرماشەۆا:
– مۇرنىمنىڭ پوشىمى وزىمە ۇنامايدى. ءسىزدىڭ اۋرۋحانادا پلاستيكالىق وپەراتسيا جاساتۋىما بولا ما؟
– ءبىز پلاستيكالىق وپەراتسيالار جاسامايمىز. ەگەر مۇرنىڭىزدىڭ فورماسى ۇناماسا, استانادا جەكەمەنشىك كلينيكالار كوپ, سولارعا حابارلاسىپ, وتا جاساتۋىڭىزعا بولادى.

بيبىگۇل:
– سول جاق قۇلاعىمنىڭ تۇسى اۋىرادى جانە جاعىم اشىلمايدى. قاي دارىگەرگە قارالۋىم كەرەك؟
– بۇل سىرقاتتىڭ ءارتۇرلى سەبەپتەرى بولۋى مۇمكىن. سوندىقتان دا سىزگە نەۆروپاتولوگ جانە لور دارىگەرىنە قارالعان ءجون. دياگنوزىڭىز انىقتالعاننان كەيىن دارىگەر سىزگە قاجەتتى ەم كورسەتەتىن مەكەمەگە نەمەسە بولىمشەگە جول سىلتەيدى.

مارجان قىستاۋباي:
– بۇيرەكتەگى جانە نەسەپ جولىنداعى ۇساق جانە ورتاشا ولشەمدى تاستاردى پىشاقتىڭ كومەگىنسىز, ياعني وتاسىز-اق بولشەكتەۋگە بولاتىنىن ەستىدىم. ايتىڭىزشى, بۇل سوندا قالاي جۇزەگە اسادى؟
– ءزار شىعارۋ جولدارىنداعى كولەمى ءبىر سانتيمەتردەن از تاستاردى قاشىقتىقتان جانە ەندوسكوپيالىق ادىسپەن ۇگىتۋ مۇمكىندىگى بار. ياعني, بۇيرەكتەگى تاستاردى ورگانيزمگە ەشتەڭە ەنگىزبەي سىرتىنان ۇگىتۋگە بولادى. ادام اعزاسىنا ەشقانداي پىشاق تيگىزبەي كىشى دارەت جۇرەتىن جولدار ارقىلى ەندوسكوپيالىق لازەرلىك ليتوتريپسيا كومەگىمەن ۇگىتىپ شىعارۋعا دا مۇمكىندىك بار.

مارات بالتاباەۆ:
– دارىگەر ماعان جۇرەك كانالدارىن اۋىستىرۋ كەرەكتىگىن ايتقان بولاتىن. ءۇش كانالدىڭ بىرەۋى 100 پايىزعا, ءبىرى 70 جانە تاعى بىرەۋى 30 پايىزعا تولىپ قالعاندىقتان شۇعىل وتا قاجەت. قالالىق №2 اۋرۋحانامەن حابارلاسۋعا كەڭەس بەردى. سىزدەردە جۇرەككە وتا جاسالا ما؟
– سىزگە اورتوكورونارلىق شۋنتتەۋ جاساۋ كەرەك شىگار. ول ءۇشىن ءبىزدىڭ اۋرۋحانانىڭ كارديولوگيا بولىمشەسىنە حابارلاسىڭىز. تەلەفوندارى مەكەمەمىزدىڭ سايتىندا بار. ەگەر سىزگە شۇعىل تۇردە وتا جاساۋ كەرەك بولسا, وندا ءسىز تۇرعىلىقتى جەرىڭىز بويىنشا جەدەل جاردەم كومەگىنە جۇگىنە الاسىز. جەدەل جاردەم قىزمەتى سىرقاتىڭىزدىڭ اۋىرلىعىنا بايلانىستى ءبىزدىڭ اۋرۋحاناعا وزدەرى-اق الىپ كەلەدى. ال, باسقا قالادا تۇراتىن بولساڭىز, سول جەردەگى جەرگىلىكتى جەدەل جاردەم قىزمەتىنە حابارلاسقانىڭىز ءجون.

تالعات:
– استانادا دارىگەرلەردىڭ تاپشى ەكەنىنەن حاباردارمىز. بۇل رەتتە سۇرايىن دەگەنىم, سىزدەر مامانداردى قالاي دايارلايسىزدار؟
– مامانداردى دايارلاۋ ءبىزدىڭ نەگىزگى قىزمەتىمىزگە جاتپايدى. وزدەرىڭىزگە بەلگىلى, استانانىڭ, الماتىنىڭ مەديتسينالىق جوعارى وقۋ ورىندارىندا بوس ورىندار جارمەڭكەسى ۇيىمداستىرىلىپ تۇرادى. سوندا بارىپ, قاتىسىپ, وزىمىزگە قاجەتتى مامانداردى ىزدەپ تاۋىپ الامىز.

داريعا:
– تيمۋر مۇراتۇلى, مىنانى بىلگىم كەلەدى: №2 اۋرۋحانادا كاپسۋلدى كولونوسكوپيا بار ما؟
– ءيا, قالالىق №2 اۋرۋحانادا كاپسۋلدى كولونوسكاپيا جاسالادى. ءبىز قازاقستاننىڭ سولتۇستىك وبلىستارىنداعى وسىنداي ەندوسكوپيالىق تاسىلمەن دياگنوستيكا جاسايتىن جالعىز مەكەمە بولىپ تابىلامىز. كولونوسكوپياعا جازىلۋ ءۇشىن اقىلى ەمحانامىزعا حابارلاسىڭىز. تەلەفونى اۋرۋ­حانانىڭ www.astanaclinic.kz سايتىندا كورسەتىلگەن.

سەزىم سابىرقىزى:
– قالالىق №2 اۋرۋحانادا سەرۆيس ماسەلەسى دۇرىس جولعا قويىلماعان. سىزدەرگە حابارلاسۋ مۇمكىن ەمەس. الدا-جالدا بىرەۋ تەلەفون تۇتقاسىن كوتەرە قالعاننىڭ وزىندە ماردىمدى جاۋاپ الا المايمىز. كەيبىرەۋلەر ءتىپتى دورەكى سويلەيدى. وسىنى ءبىر رەتكە كەلتىرۋگە بولماي ما؟
– سەزىم, ءسىزدىڭ ايتقان وكپە-نازىڭىزدى ءبىز, ارينە, قابىلدايمىز. ەگەر قاجەت دەپ تاپساڭىز, ماعان حابارلاسىڭىز (تەلەفونىم – 577228). ءبىز مەديتسينالىق كومەك كورسەتۋ كەزىندە دورەكىلىك تانىتقان قىزمەتكەرلەر بولسا, ولارمەن جەكە سويلەسىپ, شەشىم قابىلدايمىز. ال, نەگىزىندە ءبىزدىڭ دەنساۋلىق ساقتاۋ مەكەمەسىن قىزمەت كورسەتەتىن مەكەمەمەن سالىستىرۋعا كەلمەيدى, سالىستىرۋعا بولمايدى دا. مەكەمەنىڭ نەگىزگى فۋنكتسياسى – سەرۆيس كورسەتۋ ەمەس, دەنساۋلىقتى ساقتاۋ.
اۋرۋحانامىزدىڭ قابىلداۋ بولىمىنە جىلىنا 36 مىڭ ناۋقاس كەلىپ قارالادى. سونىڭ ىشىندە 14 مىڭى عانا ستاتسيونارعا جاتىپ ەمدەلەدى. سوندا, بايقاپ وتىرساڭىزدار, ءبىز اۋرۋحانامىزعا كەلۋشىلەردىڭ ۇشتەن ءبىرىن عانا ستاتسيونارلىق ەمگە جاتقىزامىز. قالعان 22 مىڭ ناۋقاس امبۋلاتورلىك دەڭگەيدە ەمدەلۋى ءتيىس, وسى ساناتتاعى ناۋقاستارعا جۇمسالعان ۋاقىتتا باسقا اۋىر ناۋقاستارعا ساپالى قىزمەت كورسەتۋگە بولار ەدى. دەمەك, اۋرۋحانامىزدىڭ قابىلداۋ بولىمىندەگىلەر كىشىگىرىم ەمحانانىڭ قىزمەتىن, ياعني وزىمىزگە قاتىسسىز جۇمىستى اتقارىپ وتىر. سوندىقتان, ءبىزدىڭ نەگىزگى مىندەتىمىز تۇرعىنداردىڭ دەنساۋلىعىن ساقتاۋ جانە نىعايتۋ ەكەنىن ەستەن شىعارماساڭىزدار ەكەن.

روزا:
– جۇمىسسىز ءجۇرمىن. نەگىزگى ماماندىعىم – ورتا مەديتسينالىق قىزمەتكەر. سىزدەرگە مەيىربيكەلەر قاجەت ەمەس پە؟
– قازىرگى كەزدە رەانيماتسيا بولىمشەسىنە انەستەزيولوگ-رەانيماتولوگ دارىگەرلەر قاجەت. ورتا مەديتسينالىق پەرسونالدارعا كەلسەك, سول رەانيماتسيا بولىمشەسىنە دە مەيىربيكەلەر جەتىسپەيدى. سوندىقتان, ءسىز مەكەمەمىزدىڭ كادر بولىمىنە 577-220 تەلەفونى ارقىلى حابارلاسىڭىز نەمەسە تۇيىندەمەڭىزبەن كەلىپ, وسى ءبولىم قىزمەتكەرلەرىنە جولىعىڭىز.

قايروللا:
– كەيىنگى كەزدە جۇرەك-قان تامىرلارى اۋرۋلارىنا شالدىققاندار كوبەيىپ كەتتى. ونىڭ الدىن الۋ ءۇشىن نە ىستەۋىمىز كەرەك؟
– دۇرىس ايتاسىز. دەگەنمەن, بۇل – ءبىر اۋىز سوزبەن جاۋاپ بەرە سالاتىن سۇراق ەمەس, كۇردەلى ماسەلە. قاراپايىم تىلمەن ايتقاندا, ادام بالاسى ەڭ الدىمەن ءوزىن-ءوزى ساقتاۋى كەرەك. ول ءۇشىن بىرىنشىدەن ارتىق سالماقتان ارىلىپ, تەمەكى, شىلىم شەكپەۋ كەرەك. ۋاقىتىندا سپورتپەن شۇعىلدانىپ, سترەستەردى بولدىرماۋعا تىرىسۋدى دا ەستە ساقتاڭىز. بۇل جونىندە جەكە ادامنىڭ ناۋقاسىنا بايلانىستى كونسۋلتاتسيا الۋ ءۇشىن سىزگە كارديولوگ مامانعا بارىپ قارالىڭىز دەر ەدىم.