№48 احمەت بايتۇرسىنۇلى اتىنداعى مەكتەپ-ليتسەيدە ۇلت ۇستازىنىڭ 150 جىلدىعىنا ارنالعان «ءبىلىمنىڭ اتاسى – احمەت» اتتى رۋحاني-مادەني كەش ءوتتى. نۇر-سۇلتان قالاسىنىڭ ىشكى ساياسات باسقارماسى جانە ءبىلىم بەرۋ باسقارماسى, قالالىق ارداگەرلەر كەڭەسى ۇيىتقى بولعان ءىس-شاراعا ارداگەرلەر مەن جاستار, ۇستازدار مەن وقۋشىلار قاتىستى.
نۇر-سۇلتان قالاسىنىڭ قوعامدىق كەڭەسىنىڭ مۇشەسى, الماتى اۋدانى ارداگەرلەر كەڭەسىنىڭ توراعاسى مارات مۋستافين ءسوز الىپ:
– بيىل احمەت بايتۇرسىنۇلىنىڭ 150 جىلدىق مەرەيتويى حالىقارالىق دەڭگەيدە, يۋنەسكو اياسىندا اتاپ وتىلەدى. نۇر-سۇلتان قالاسىندا ۇلت ۇستازىن ۇلىقتايتىن 300-گە جۋىق ءىس-شارا جوسپارلانسا, سونىڭ ءبىرى – №48 مەكتەپ-ليتسەيىندە مۋزەي اشىلدى. تاعى ءبىر قۋانىشتى جاڭالىق, احمەت بايتۇرسىنۇلىنا بەرىلگەن كوشەدە ەسكەرتكىش بوي كوتەرەتىن بولادى, – دەدى.
ال, ادەبيەتتانۋشى, الاشتانۋشى ديحان قامزابەكۇلى تۇلعانىڭ تاريحتاعى ورنىن سارالادى. عالىمنىڭ سوزىنشە, احمەت بايتۇرسىنۇلى ۇلتتىق وقۋ-جازۋ جۇيەسىنىڭ رەفورماتورى. ول ۇلتتىڭ دىبىستىق, لەكسيكالىق, گرامماتيكالىق ەرەكشەلىكتەرىن نەگىزگە الىپ, ءتول ءالىپبينى ەنگىزەدى, ۇلتتىق ءبىلىم بەرۋدىڭ نەگىزىن قالاپ, وقۋلىقتار جازادى.
كەشەگى كورنەكتى عالىم, الاش قوزعالىسىنىڭ قايراتكەرى احمەتتىڭ ارمانى قازاق قوعامىندا وقۋ-ءبىلىم ارقىلى ادىلەتتىلىك ورناتۋ بولسا, بۇگىنگى بالا احمەت-مىرزانىڭ ارمانى وقۋ, ىزدەنۋ ارقىلى ەلگە قىزمەت ەتۋ. التى جاستاعى زەيىندى دە زەرەك ءوسپىرىم اباي مەن احمەت بايتۇرسىنۇلىنىڭ ولەڭدەرىن جاتقا بىلەدى ەكەن. ودان بولەك الپامىس باتىر جىرىن جاتقا وقىپ, ەلدەگى تۇراقتىلىق پەن تىنىشتىقتىڭ تۇعىرى بولعان كونستيتۋتسيانىڭ كىرىسپەسىن جاتتاپ الىپتى.
كونستيتۋتسيا كۇنى قارساڭىندا وتكەن ءىس-شارادا ۆۋندەركيند احمەت-مىرزا كونستيتۋتسيانىڭ ءمان-ماڭىزىن ايتىپ, پرەزيدەنتتىڭ انتىن جاتقا ايتىپ بەردى.
تالاپتى بالاعا مەكتەپ-ليتسەيدىڭ ديرەكتورى زاۋرە سادىكوۆا اقجول ءتىلىپ, الىپپە مەن ابايدىڭ ولەڭدەرى كىتابىن سىيعا بەردى.
ۆەلوساياحاتشى ەرنات قاشقىنوۆ تورعاي وڭىرىنەن جولعا شىعىپ, احمەت بايتۇرسىنۇلى اتىنداعى كوشەلەر مەن ەسكەرتكىشى بار قالالارعا ارنايى بارىپ, ستانبۇل قالاسىندا اياقتايدى. «اباي ارقىلى اعىلشىنشا ۇيرەن», «عىلىم تاپ», «تولىق ادام جانە ءتورت دامۋ» جوبالارىنىڭ اۆتورى رەتىندە بەلگىلى جۋرناليست وسىلايشا احمەت بايتۇرسىنۇلىنىڭ 150 جىلدىق مەرەيتويى ۇلەس قوسپاق.
– بۇگىنگى ءىس-شارانىڭ ماقساتى – تاريحي تۇلعالاردىڭ تاعىلىمىن دارىپتەپ, ۇرپاقتار ساباقتاستىعىن جاڭعىرتۋ جانە جاستارعا ءبىلىمدى, بىلىكتى, بەلسەندى بولۋدىڭ پارقىن ءتۇسىندىرۋ, – دەدى قالالىق ارداگەرلەر كەڭەسىنىڭ جاۋاپتى حاتشىسى سالتانات مەڭلىباەۆا.
نۇرلات بايگەنجە
