استانادا وسىدان تۋرا ون جىل بۇرىن, ناقتى ايتساق 2007 جىلدىڭ 12 جەلتوقسانىندا «الاش» اۆتونومياسى مەن ۇكىمەتىنىڭ قۇرىلعانىنا 90 جىل تولۋ قۇرمەتىنە بۇرىنعى سوفيەۆ تاسجولىنا الاش تاسجولى اتاۋى بەرىلدى. ش.جيەنقۇلوۆا كوشەسىنەن باستالىپ, اقجول, جولىمبەت كوشەلەرىمەن قيىلىساتىن بۇل تاسجولدىڭ ۇزىندىعى – 14717,3 م. قالالىق ءماسليحات دەپۋتاتى زاۋرە ءجۇسىپوۆانىڭ پىكىرىنشە, نيەت دۇرىس بولسا دا, شەشىم دۇرىس شىعارىلماعان. الاش اتىنا باس قالانىڭ ورتالىعىنداعى داڭعىلدى بەرۋ كەرەك ەدى. ال بۇگىندەرى اتالمىش تاسجول قالانىڭ شەتىندە قالىپ قويعان.
«الاش» – ءبارىمىز ءۇشىن قاسيەتتى ۇعىم. ارعى جاعىنداعى تاريحتى ايتپاعاندا, بەرگىدە, حح عاسىر باسىندا قۇرىلعان «الاش» پارتياسىنىڭ ازاتتىق اڭسارىن ۇلگى ەتۋىمىز كەرەك. ءاليحان بوكەيحان, احمەت بايتۇرسىنۇلى, مىرجاقىپ دۋلاتۇلى, ماعجان جۇماباەۆ, وزگە دە الاش قايراتكەرلەرى قازاق ءۇشىن بارىن سالدى. ءتاۋەلسىزدىگىمىزدىڭ العىشارتىن دا سولار جاسادى. ال ەندى ارداقتىلارىمىزعا قاتىستى اتاۋدى قالايشا شەت ايماققا اپارىپ قويدىق؟» دەيدى زاۋرە عيناياتقىزى.
جالپى, دەپۋتاتتىڭ ۇسىنىسى ورىندى. وسى كۇنى ەلوردادا الاش قايراتكەرلەرىنىڭ اتىنا 1 داڭعىل, 26 كوشە جانە جوعارىدا اتالعان الاش تاسجولى بولسا, سولاردىڭ باسىم كوپشىلىگى ەلەۋسىز جەرلەردە ورنالاسقان. بۇل كوشەلەردىڭ ۇزىندىعى دا كوڭىل كونشىتپەيدى. مىسالى, مۇستافا شوقاي كوشەسى پرومىشلەننىي تۇرعىن الابىندا تۇر. ءبىرىمجانوۆتار كوشەسى, اقمولا وبلىستىق «الاش» كوميتەتىنىڭ توراعاسى بولعان ايدارحان تۇرلىباەۆ, جاھانشا سەيدالين, كۇن كوسەم ۆلاديمير لەنينمەن ساعاتتاپ داۋلاسىپ, قازاق جەرىن قورعاپ قالعان ءالىمحان ەرمەكوۆ اتىنا بەرىلگەن كوشەلەر ۇزىندىعى 1 مىڭ مەترگە دە جەتپەيدى. وسى جاعى ءالى دە ويلانارلىق.
امانعالي قالجانوۆ
