قالالىق اكىمدىكتە «استانا – بولاشاق قالاسى» اتتى ۆيرتۋالدى كىتاپتىڭ تۇساۋى كەسىلدى.
ەلباسىنىڭ «رۋحاني جاڭعىرۋ – بولاشاققا باعدار» ماقالاسىنا وراي تۇتاس ەل اۋماعىندا كەشەندى جۇمىستار اتقارىلىپ جاتىر. ماسەلەن, ەلوردادا «مەملەكەتتىك ءتىلدى لاتىن الىپبيىنە كوشىرۋ», «تۋعان جەر», «قازاقستاننىڭ كيەلى كارتاسى», «قازاقستانداعى ءجۇز جاڭا ەسىم», «جاھاندىق الەمدەگى زاماناۋي قازاقستاندىق مادەنيەت» ارنايى جوبالارى قارقىندى جۇزەگە اسىرىلۋدا.
ۆيرتۋالدى كىتاپ ارقىلى وقىرمان ەلىمىزدىڭ ەلورداسىندا قولدانىلاتىن جانە بولاشاقتا قولدانىسقا ەنەتىن بارلىق جاڭا جوبالارمەن جانە تەحنولوگيالارمەن تانىسا الادى. كىتاپتى قولدانۋ ءۇشىن الدىمەن سمارتفونىڭىزعا Smart Astana VR book ءموبيلدى قوسىمشاسىن تەگىن جۇكتەپ الۋىڭىز كەرەك.
جوبا جەتەكشىسى, «Big Dream» كومپانياسىنىڭ وكىلى ايگەرىم مۇقاشەۆانىڭ ايتۋىنشا, كىتاپقا ەنگەن جوبالار Smart Astana باعدارلاماسىنان الىنعان ەكەن. «ماسەلەن, وقىرمان استانا ماڭىندا ورتالىق ازياداعى ەڭ ۇلكەن كۇن ستانساسى قالاي سالىنىپ جاتقانىن وقي الادى. سونداي-اق, ۆيرتۋالدى كىتاپ بولوتوۆ جەل تۋربيناسى, «اقىلدى» ءۇي, جىلى ايالدامالار جانە وزگە دە نوۋ-حاۋ جاڭالىقتارىنان حاباردار ەتەدى» دەيدى ول.
كىتاپتىڭ تۇساۋكەسەرىنە قالامىزدىڭ ەڭ ۇزدىك وقۋشىلارى, حالىقارالىق, رەسپۋبليكالىق وليمپيادا جەڭىمپازدارى شاقىرىلدى. جيىن بارىسىندا ءار وقۋشىعا قالالىق ىشكى ساياسات باسقارماسىنىڭ باسشىسى ەرلان قاناليموۆ كىتاپتى سىيعا بەردى. «استانا – بولاشاق قالاسى» ۆيرتۋالدى كىتابى 3800-دەن استام استانالىق دارىندى جاستىڭ قولىنا تيەدى. جالپى, كىتاپتىڭ تارالىمى – بەس مىڭ دانا.
گۇلدانا تالعاتقىزى
