ەلورداداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا قالالىق تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن قازاقتىڭ اسىل تۇلعالارىنىڭ بىرەگەيى – احمەت بايتۇرسىنۇلىنىڭ شىعارماشىلىعىنا ارنالعان «الاشتىڭ احاڭى» اتتى تاعىلىمعا تولى كەش ءوتتى.
جاقسىلار مەن جايساڭدار جينالعان كەشتە ۇلت قايراتكەرى, تۇركىتانۋشى, ءتىل سالاسىنىڭ بىلگىرى, ءبىر باسىنا سان ءتۇرلى ونەر توعىسقان احمەت اتامىز تۋرالى پاراساتتى سوزدەر كوپ ايتىلدى. فيلولوگيا عىلىمدارىنىڭ دوكتورى, اكادەميك ديحان قامزابەكۇلى احاڭنىڭ ءوز زامانىندا تۋعان حالقى ءۇشىن موينىنا جۇكتەلگەن مىندەتتى تولىعىمەن ورىنداعانىن ايتا كەلىپ, ونىڭ ۇلتتىڭ مۇراتى جولىنداعى ەرلىگى مەن ەڭبەگى تۋرالى عيبراتتى وي ءوربىتتى.
قاللەكي تەاترىنىڭ ارتىستەرى الاش ارداقتىسىنىڭ ءومىر جولىنان سىر شەرتەتىن «ۇلت قايراتكەرى» اتتى قويىلىمدى ۇسىندى. «احمەت بايتۇرسىنۇلىنىڭ عۇمىرناماسى» دەپ اتالعان بەينەسيۋجەت كورسەتىلدى.
احمەت بايتۇرسىنۇلى اتىنداعى ەۋرازيالىق ءبىلىم جانە عىلىمدى دامىتۋ قوعامدىق قورىنىڭ اتقارۋشى ديرەكتورى, تەكتىنىڭ ۇرپاعى ازامات نۇرلانۇلى: «ماعان احمەتتىڭ ۇرپاعى دەگەن ءسوز ماقتانىش بولعانمەن, ول ۇلكەن جاۋاپكەرشىلىك جۇكتەيدى. سوندىقتان ارداقتى ەسىمگە كىر كەلتىرمەي, اتام سەكىلدى ۇلتقا قىزمەت ەتۋدى ماقسات سانايمىن» دەدى ول.
تاعىلىمعا تولى كەشتە مەكتەپ وقۋشىلارى احمەت اتامىزدىڭ ولەڭدەرىن مانەرلەپ وقىدى. دارىندى ءانشى رامازان ستامعازيەۆ حالىق اندەرىن تامىلجىتا شىرقادى. جاس ءداستۇرلى ءانشى امانگەلدى سەيىتحان اقىن حاميتبەك مۇساباەۆتىڭ «قانشەڭگەل» پوەماسىنداعى احاڭنىڭ فايزوللا دوسىنا جازعان مونولوگىن شىرايىن كىرگىزىپ ورىندادى. كۇيشى ايبەك بەكبوسىن «الاش» كۇيىن كۇمبىرلەتتى. قىسقاسى, كەشكە جينالعاندار احمەت بايتۇرسىنۇلىنىڭ باي مۇراسىنان وي ءتۇيىپ, رۋحتانىپ قايتتى.
