قازىرگى تاڭدا ازاماتتارعا زيانىن تيگىزەتىن الاياقتىق قىلمىس جيىلەپ كەتتى. سونىڭ ءبىرى – امانگۇل ەسىمدى ءانشى قۇرعان قارجىلىق پيراميدانىڭ ۇستىنەن قىلمىستىق ءىس قوزعالۋدا.
استانا قالاسى پوليتسيا دەپارتامەنتىنىڭ تەرگەۋ باسقارماسىندا قر قىلمىستىق كودەكسى-ءنىڭ 190-بابى بويىنشا قىلمىستىق ءىس تەرگەپ-تەكسەرىلۋدە. بەلگىلى ءانشى 2018 جىلدىڭ شىلدە ايىندا ءال-اۋقاتى تومەن وتباسىلارعا, مۇگەدەكتەرگە, جالعىزباستى انالارعا جانە اقشاسى جوق مۇقتاج جاندارعا ماتەريالدىق تۇرعىدان كومەك بەرگىسى كەلەتىنىن ايتىپ, «اقجايناق» دەپ اتالاتىن قارجىلىق ۇيىم قۇرعان. ۇيىمعا ءار قاتىسۋشى شاماسىنا قاراي 20 000 تەڭگەدەن قاراجات سالعان. 5-10 كۇننىڭ ىشىندە ءوز اتىنان تاعى ەكى ادام الىپ كەلگەن جاعدايدا سالعان اقشاسى ەكى ەسەلەنىپ, 40 000 تەڭگەگە ءوسىپ وتىرعان. ەگەر تاعى دا ەكى ادام تارتسا, باستاپقى سالعان 20 000 تەڭگەسىن ەش قيىندىقسىز الىپ وتىرعان ەكەن. وسىلايشا اتالعان ۇيىم 2018 جىلدىڭ تامىز ايىنا دەيىن جالعاسىپ, ناتيجەسىندە بىرنەشە ادامعا ماتەريالدىق شىعىن كەلتىرگەن.
الدىن الا تەرگەۋ بارىسىندا انىقتالعانداي, 2018 جىلدىڭ شىلدە ايىنىڭ 18-نە دەيىن اقشا سالعان ادامدار ءوز قارجىلارىن ەكى ەسەلەپ العان, ال كەيىننەن قوسىلعانداردىڭ بارلىعى بەتتەرىن سيپاپ قالدى.
مۇنداي دەرەكتەردىڭ جيىلەۋى حالىقتىڭ ساناسىندا بۇل ءىس-ارەكەتتەردىڭ اقىرى جالعان, الاياقتىق ەكەندىكتەرىن بىلە تۇرا, جەڭىل جولمەن ءوز اقشالارىن ەسەلەپ الۋ ماقساتىندا ماتەريالدىق تۇرعىدان كەلەتىن قاۋىپكە بارۋى بولىپ وتىر.
استانا قالاسىنىڭ پوليتسيا دەپارتامەنتى الاياقتىقتىڭ قۇربانى بولماس ءۇشىن تەلەفون ارقىلى بەلگىسىز تۇلعالاردىڭ ءارتۇرلى ۇسىنىستارىنا سەنبەۋگە, ادامداردىڭ جانە ۇيىمنىڭ زاڭدى قۇجاتتارىنا كوز جەكىزبەي, مەملەكەتتىك ۇيىمداردان زاڭدىلىعىن تەكسەرمەي جاتىپ, ەشقانداي اقشا جانە قۇندى زاتتارىن ۇسىنباۋدى ەسكەرتەدى.
