سەيسەنبى كۇنى ەلوردادا بولعان قايعىلى وقيعا قوعامدى ءدۇر سىلكىندىردى. كۇندىزگى 14.30 شاماسىندا №40 اۆتوبۋستىڭ جۇرگىزۋشىسى كورسەتىلمەگەن جەردەن جولدى قيىپ ءوتىپ بارا جاتقان 15 جاسار قىزدى قاعىپ ءولتىردى. استاناداعى ساۋدا-ەكونوميكالىق كوللەدجىنىڭ ستۋدەنتى جاياۋ جۇرگىنشىلەر وتكەلىنەن نەبارى 80 مەتردەن جولدى قيىپتى. ال جول-كولىك وقيعاسى بولعان كەزدە اۆتوبۋس 53 كم/ساعات جىلدامدىقپەن جۇيتكىپ كەلە جاتقان. رۇقسات ەتىلگەن جىلدامدىق كولەمى – 50 كم/ساعات.
قوعامدىق كولىكتە 9 جىل ەڭبەك ءوتىلى بەر جۇرگىزۋشى بۇعان دەيىن ەشقانداي جول ءجۇرۋ ەرەجەلەرىن بۇزباعان, باسشىلىعىنان دا ەسكەرتۋ الماعان. «تەرگەۋ جۇرگىزۋگە بايلانىستى اۆتوبۋستىڭ جۇرگىزۋشىسى جۇمىسىنان بوساتىلدى. جول-كولىك وقيعالارىنا سەبەپشى بولعان اۆتوبۋستاردىڭ جۇرگىزۋشىلەرى جەدەل جۇمىستان قۋىلىپ, «قارا تىزىمگە» ەنگىزىلەدى. دەمەك, ولار قوعامدىق كولىكتە جۇمىس ىستەي المايدى» دەپ مالىمدەدى بريفينگتە «استانا LRT» جشس باسقارما توراعاسىنىڭ ورىنباسارى بەيبىت ەسجانوۆ. كومپانيا باسشىلىعى قايعىلى جاعدايدان قازا تاپقان قىزدىڭ تۋعان-تۋىستارىنا كوڭىل ايتتى.
قايعىلى جاعدايدان ەشكىم قورعالماعان. دەسەك تە, اۆتوبۋس تىزگىندەگەن جانداردىڭ ادامنىڭ ومىرىنە شىبىن قۇرلى قارامايتىنى قىنجىلتادى. ەلىمىزدەگى ءاربىر ەكىنشى جول-كولىك وقيعاسى – جاياۋ ادامدى باسىپ كەتكەن جۇرگىزۋشىلەرگە تيەسىلى. جۋىردا ءىىم-ءنىڭ اكىمشىلىك پوليتسياسى كوميتەتىنىڭ رەسمي وكىلى يرينا لۋكيانينا جىل باسىنان بەرى ەلىمىزدە 540 ادامدى كولىك قاعۋ وقيعالارى تىركەلگەنىن حابارلادى. جاياۋ جۇرگىنشىلەردىڭ كىناسىنەن بولعان قايعىلى جاعدايلاردا 115 ادام كوز جۇمىپ, 450 ادام ءارتۇرلى جاراقات العان. اۋا رايىنىڭ قولايسىزدىعى كەزىندە كورسەتىلمەگەن جەردەن جولدى قيىپ ءوتۋ اسا قاۋىپتى. مۇنى بالالار مەن جاسوسپىرىمدەرگە كۇندە ەسكەرتۋىمىز كەرەك.
بۇل جەردە جەلىككەن جۇرگىزۋشىلەردى دە سۇتتەن اق, سۋدان تازا دەي المايمىز. قازىر استانادا «قارا تىزىمگە» ەنگەن 143 جۇرگىزۋشى مەن 85 كوندۋكتور بار ەكەن. ايتپاقشى, 1 قازاننان باستاپ ەلوردالىق جۇرگىزۋشىلەرگە ايىپپۇل تولەۋ جۇيەسى ەنگىزىلدى. سول ۋاقىتتان بەرى 600-دەن اسا جۇرگىزۋشى ەرەجە بۇزىپ, ايىپپۇل تولەپتى. 18-20 قازان ارالىعىندا باس قالادا «اۆتوبۋس» اتتى جەدەل الدىن الۋ ءىس-شارالارى وتكىزىلگەن. جاعا ۇستاتارلىعى, وسى شارانىڭ ءبىر كۇنىندە عانا جول ءجۇرۋ ەرەجەلەرىنىڭ 160-تان اسا بۇزىلعانى انىقتالعان. ال ەندەشە! 16 جۇرگىزۋشى اۋانى لاستايتىن اۆتوكولىكتەر مەن جىلجىمالى قۇرالداردى پايدالانعان, 14-ءى اۆتوبۋس رولىندە وتىرىپ ۇيالى تەلەفونمەن سويلەسىپتى, 12-ءسى مانەۆر جاساۋ ەرەجەسىن بۇزعان, 10-ى تەحنيكالىق تەكسەرىستەن وتپەگەن اۆتوبۋستاردى پايدالانعان, 10-عا جۋىعى جىلدامدىقتى اسىرعان.
