الاشتىڭ عاسىرلىق تاريحى قالاي دارىپتەلىپ ءجۇر دەگەندە, ويىمىزعا بىلتىر وتكەن شارالار تۇسەدى. الاشتىڭ 100 جىلدىعىندا زەرتتەۋشى عالىمداردىڭ تىڭ ەڭبەكتەرىمەن تانىسىپ, ولاردىڭ ءتۇرلى مىنبەرلەردەن ايتىلعان ويلارى كوزى قاراقتى دەگەننىڭ كوكىرەگىنە ساۋلە بولىپ قۇيىلعانداي بولدى. اردا تۋعان ازاماتتاردىڭ يدەيالارى جۇرەگىمىزگە جەتىپ, رۋحاني قايناردان سۋسىنداعانداي اسەر الدىق.
جاسىراتىنى جوق, الاشتىڭ مەرەيتويى تۇسىندا كوڭىلگە قاياۋ تۇسىرگەن جايتتار دا بولدى. مۇنىڭ سەبەبى, بيلىك, ۇكىمەت الاش تويىنا, مەرەكەسىنە قاتىستى شارالاردى ءبىر ىزگە سالىپ, ءبىر قولعا جيناماۋىنان ورىن الدى-اۋ دەگەن ويدامىز.
ناتيجەسىندە, ساياسي پارتيا, قازاقشا سايت, ينستيتۋت سياقتى ءارتۇرلى ۇيىمدار الاشوردا ۇكىمەتى مەن الاش اۆتونومياسىنىڭ 100 جىلدىعى قۇرمەتىنە ارنايى ەستەلىك مەدالدار شىعارىپ, ءبىرشاما تاريحشى مەن قوعام قايراتكەرلەرىنە تابىستاپ جاتتى. مۇنداي مەرەكەلىك مەدالدى مەملەكەتتىك ورگاندار شىعارىپ تاپسىرسا, الاشتىڭ مارتەبەسى اسقاقتاي تۇسپەس پە ەدى؟!
ارىستارىمىزدىڭ رۋحىن كوتەردىك, ونىڭ مۇراسىنا ەڭبەگىن سىڭىرگەن عالىمدار ۇلىقتالدى. ءبارى دۇرىس. دەگەنمەن, الداعى ۋاقىتتا الاش مۇراسىن ءوز دارەجەسىندە دارىپتەپ, سالماعىنا ساي ماراپاتتاۋدى دا قاداعالايتىن ارنايى كوميسسيا كەرەك. ايتپەسە, بۇل ءۇردىس قانىمىزدا بار ناۋقانشىلدىقپەن استاسىپ كەتۋى ابدەن مۇمكىن.
شىعىس وڭىرىندە ءبىر پاتريوت مەحانيزاتور الاش كوسەمىنە ءوز قاراجاتىنا ەسكەرتكىش قويىپتى دەپ ەستىدىك. اۋىل ىرگەسىندە رۇقساتسىز, كوركەمدىك كەڭەسسىز قويىلعان ەسكەرتكىش الاش ارىستارىنا ۇرپاق قۇرمەتىن كورسەتە الا ما, ماسەلە سوندا عوي. قوعام قايراتكەرى ايدوس سارىم فەيسبۋك پاراقشاسىنداعى ءوز پوستىندا: «مەنىڭ ويىمشا, قازاققا ورتاق, قاسيەتتى «الاش» اتاۋىن ساياسي پارتيالارعا, بيزنەسكە بەرۋگە تىيىم بولۋى كەرەك سياقتى. ءبىز دەۆالۆاتسيالانباعان, لاس تانباعان ۇعىمدى ساقتاپ قالايىقشى. ەكى حان ءتاڭىرى شىڭى جوق. ەكى الاش پارتياسى دا بولا المايدى» دەپ جازىپتى. بۇل وي كۇنى كەشە اشىلعان «الاش» حالىقتىق سوتسيال-دەموكراتيالىق پارتياسى جايىندا بولسا كەرەك. ءيا, اتى زور قوعامدىق ۇيىم ساياسي كۇرەستە بابالار اماناتىنا, مۇراسىنا ادال بولا الا ما, ماسەلە سوندا عوي…
ايگۇل ۋايسوۆا
