«قازاقستان» ورتالىق كونتسەرت زالىندا قالالىق اكىمدىكتىڭ مەملەكەتتىك اكادەميالىق فيلارمونياسىنىڭ ۇيىمداستىرۋىمەن قازاقتىڭ ءان ونەرىندەگى الىپ تۇلعالارىنىڭ ءبىرى, اقىن, كومپوزيتور ءبىرجان سالدىڭ شىعارماشىلىعىنا ارنالعان «ايبوزىم» اتتى كونتسەرت ءوتتى.
ارقانىڭ انشىلىك مەكتەبىنىڭ باسىندا ءبىرجان سال بابامىز تۇرادى. داۋىسى تۇنىق كۇنى جەتى قىردان اساتىن تالانتتى تۇلعانىڭ اقىندىعى مەن كومپوزيتورلىعى دا ەرەن. كوزى تىرىسىندە ەلدىڭ شىنايى ىقىلاسىنا بولەنگەن انشىگە حالىق «سال» دەپ اتاق بەرگەن. ونىڭ شىعارمالارى ۇلتتىق ونەردىڭ ءىنجۋ-مارجانى سانالادى. ءبىرجاننىڭ انشىلىك مەكتەبى دە قازاق مۋزىكاسىن بيىك بەلەسكە كوتەردى. ودان ءنار العان قانشاما تالانتتار تۇلەپ ۇشتى.
بىلتىر جىل سوڭىنا تامان ەلباسىنىڭ جارلىعىمەن اقمولا وبلىسىنىڭ ەڭبەكشىلدەر اۋدانى ءبىرجان سال اۋدانى بولىپ وزگەردى. بۇل جاعىمدى جاڭالىق ءبىرتۋار ونەرپاز تۋعان ەلدىڭ ەڭسەسىن ءبىر كوتەرىپ تاستادى.
كەش شىمىلدىعىن جاقسىگەلدى ماياساروۆ «ايتبايمەن» اشتى. دارىندى ءانشى سالدىڭ عاشىعىنا ارناعان نازىن ناقىشىنا كەلتىرىپ شىرقادى. ودان كەيىن ساحناعا قالالىق فيلارمونيانىڭ كامەرالىق حور مۇشەلەرى شىقتى. حور قۇرامىندا 38 ادام بار. ونىڭ كوركەمدىك جەتەكشىسى جانە ديريجەرى – قر مادەنيەت قايراتكەرى گۇلميرا قۇتتىباداموۆا. جاندى داۋىستا حور مۇشەلەرى ايگىلى ءانشىنىڭ «كوكەك», «القاراكوك», «بۋرىلتاي», «عاشىعىم», «ءلايلىم شىراق», «اق جورعاجان» اندەرىن ورىندادى. ءبىرجاننىڭ شىعارمالارىن دومبىرادا عانا ەمەس, زاماناۋي وڭدەلگەن نۇسقادا تىڭداۋ – ءبىر عانيبەت. حور مۇشەلەرىنىڭ ءبىر لەپپەن باستالعان ىڭىلى بىرتە-بىرتە ءاننىڭ ىرعاعىمەن جوعارى كوتەرىلىپ, مىڭ ءتۇرلى اۋەزگە بولەندى. قۇددى جازعى باقتاعى نەشە ءتۇرلى قۇستاردىڭ داۋىسىنا ۇقسادى. ادامدى ءبىر سيقىرلى كۇشپەن تارتا جونەلەدى. وسى رەتتە شىعارماعا وزگەشە لەپ بەرىپ, حورعا وڭدەگەن گ.احمەتوۆا, د.ماتسۋرين, گ.بەكبوسىنوۆا, ك.بورانباەۆا, س.بايتەرەكوۆ جانە ب.دەمەۋوۆتەردىڭ ەڭبەگىن ايتا كەتكەن ءجون.
كونتسەرت بارىسىندا «قورقىت» ءداستۇرلى ساز توبى ونەر كورسەتتى. قر ەڭبەك سىڭىرگەن ءارتىسى قاپاش قۇلىشەۆا ءبىرجان سال مەن ۇكىلى ىبىرايدىڭ اندەرىن شىرقاپ, تىڭدارمانداردىڭ قۇلاق قۇرىشىن قاندىردى.
حالىقارالىق بايقاۋلاردىڭ لاۋرەاتى دانيار مۇقان دا اتاقتى كومپوزيتوردىڭ ەكى-ءۇش ءانىن شىرقادى. سونداي-اق, جاياۋ مۇسا, اقان سەرى, ساكەن سەيفۋليننىڭ تۋىندىلارى ورىندالدى.
كورنەكتى عالىم احمەت جۇبانوۆ «ءبىرجاننىڭ اندەرى – بۇل ونىڭ ءومىرىنىڭ شەجىرەسى, ياعني ومىرىندەگى وقيعالارى مەن كەزدەسۋلەرى اندەرىنىڭ پايدا بولۋىنا سەبەپ بولعان» دەپ جازادى. شىندىعىندا سولاي. كەش سوڭىندا حور مۇشەلەرىنىڭ دانيار مۇقانمەن بىرگە ورىنداعان بىرەگەي ءانشىنىڭ ءوزى ومىرىنەن سىر شەرتكەن فيلوسوفيالىق «تەمىرتاس» ءانى جانىمىزدى مۇڭلى كۇيگە بولەپ, جانارىمىزعا جاس ءۇيىردى. ءبىر سوزبەن ايتقاندا, ارقانىڭ ارقالى پەرزەنتى ءبىرجان سالدىڭ شىعارمالارى ەلوردا تورىندە سالتانات قۇردى.
ازامات قۇسايىن
