9-11 قىركۇيەك كۇندەرى ارالىعىندا استانا قالاسىندا الماتى وبلىسىنىڭ كۇندەرى بولىپ ءوتتى. «قۋاتتى ايماق – قۋاتتى قازاقستان» باعدارلاماسى اياسىندا ءار اپتا سايىن ءوتىپ جاتقان جارمەڭكەلەر ەل تاۋەلسىزدىگىنىڭ 25 جىلدىعىنا ارنالىپ وتىر.
بىرنەشە كۇنگە سوزىلعان كولەمدى شارا الماتى وبلىسىنىڭ اكىمى اماندىق باتالوۆتىڭ قازاق حالقىنىڭ ۇلى اقىنى, جىر جامپوزى جامبىل جاباەۆتىڭ ەسكەرتكىشىنە گۇل شوقتارىن قويۋ شاراسىمەن باستاۋ الدى. وسىدان كەيىن مادەني شارا باۋىرجان مومىشۇلى كوشەسى بويىنداعى وقۋشىلار سارايىنىڭ جانىنداعى الاڭدا الماتى وبلىسىندا تاۋار وندىرۋشىلەردىڭ اۋىلشارۋاشىلىق جارمەڭكەسىنە ۇلاستى. الماتى وبلىسى اۋىل شارۋاشىلىعى باسقارماسىنىڭ باسشىسى سەكسەنباي بەكىشەۆتىڭ ايتۋىنشا, وبلىستىڭ 16 اۋدانى جانە 3 قالاسىنان كەلگەن شارۋالار جارمەڭكەگە كەلگەن جۇرتقا 160 ملن تەڭگەنىڭ 370 توننادان استام ازىق-تۇلىك ونىمدەرىن ۇسىندى.
«استانا تۇرعىندارى مەن قالا قوناقتارىنا جالپى كولەمى 340 توننا اۋىل شارۋاشىلىعى ونىمدەرىنىڭ 40-قا جۋىق ءتۇرىن الىپ كەلىپ وتىرمىز. ونىڭ ىشىندە: جىلقى ەتى – 1,8 توننا, قۇس ەتى – 7,0 توننا, بالىق ونىمدەرى – 11,8 توننا, كوكونىس – 100,2 توننا, الما, جەمىس-جيدەك – 30,5 توننا, كارتوپ – 47,0 توننا, ءسۇت ونىمدەرى – 13,8 توننا, شۇبات پەن قىمىز – 2,9 توننا, كۇرىش – 16,5 توننا, ۇن – 5,8 توننا, قانت – 6,0 توننا, بال – 3,9 توننا, جۇمىرتقا – 16,0 مىڭ دانا, باكالەيا ونىمدەرى – 2,4 توننا جانە باسقا ءونىم تۇرلەرى 106,9 توننا. تاۋارلار قالاداعى بولشەك ساۋدا باعالارىنان 15-20 پايىزعا ارزانعا ساتىلىپ جاتىر. الماتى وبلىسىنان جەتكىزىلگەن تاۋارلاردىڭ جالپى قۇنى 160 ملن تەڭگەنى قۇرايدى» دەيدى سەكسەنباي بەكىشەۆ. ساپاسى جانە باعاسى جاعىنان استانالىقتاردىڭ كوڭىلىنەن شىققان جارمەڭكەنى استانا قالاسىنىڭ اكىمى اسەت يسەكەشەۆ پەن الماتى وبلىسىنىڭ اكىمى اماندىق باتالوۆ ارالادى.
ەل تاۋەلسىزدىگىنىڭ 25 جىلدىعىنا ارنالعان ماڭىزى زور شارا بولعاندىقتان, ۇيىمداستىرۋشىلار ارزان ازىق-تۇلىك ساۋداسى عانا ەمەس, مادەني شارالارعا دا قاتتى كوڭىل ءبولىپ كەلگەنى بايقالدى. شارا بارىسىندا ءبىلىم قازىناسى – كىتاپ پەن ساندىك-قولدانبالى ونەر كورمەلەرى, ءوڭىر ارتىستەرىنىڭ قاتىسۋىمەن مەرەكەلىك كونتسەرتتەر وتكىزىلدى. جارمەڭكە اۋىلىنىڭ ىشىندە ەكى جەردە شەبەرلەر اۋىلى بوي تۇزەپ, تالعامى زور استانالىقتارعا ۇلتتىق قۇندىلىقتار مەن اتا-بابا داستۇرىنەن سىر شەرتەتىن دۇنيەلەر ۇسىنىپ جاتتى.
بۇركىت نۇراسىل
