سوڭعى ۋاقىتتا تەلەفون الاياقتارى ەلدىڭ اقشاسىن الداپ الۋ ءۇشىن كۋرەرلەردى پايدالاناتىن جاعدايلار جيىلەپ كەتتى, دەپ حابارلايدى astana-akshamy.kz
ماسەلەن, ولار ءارتۇرلى سايتتارعا كۋرەرلىك جۇمىس ۇسىنىپ, بەلگىلى ءبىر اقىعا قىلمىستىق جولمەن الىنعان قاراجاتتى اۋدارۋ تۋرالى جارنامالاردى جاريالاپ وتىرعان.
سونداي وقيعانىڭ بىرىندە استانادا ءبىر الاياق تەلەفون ارقىلى جابىرلەنۋشىگە حابارلاسقان. ونى «قىزىڭىز ادام قاعىپ كەتتى, ول كىسى قايتىس بولدى, ءىستى وڭ شەشۋ ءۇشىن اقشا قاجەت» دەپ الداعان ەكەن.
وسىنداي سحەما بويىنشا 2 جابىرلەنۋشىنى الداپ, 1 ملن تەڭگەدەن استام قاراجاتتى يەمدەنىپ كەتكەن.
ال كۋرەر رەتىندە ەلوردانىڭ 27 جاستاعى تۇرعىنىن جالداعان. ناقتىراق, ول ءوزى Telegram-ارناسى ارقىلى حابارلاندىرۋدى تاۋىپ حابارلاسقان, وسىلايشا قىلمىستىق توپتىڭ سىبايلاسى بولعان.
ول اقشانى الىپ, وزىنە سونىڭ 10%-ىن قالدىرىپ, قالعان سومانى بەيمالىم ادامداردىڭ شوتىنا جىبەرىپ وتىرعان.
سوت ۇكىمىمەن سوتتالۋشىدان جابىرلەنۋشىلەردىڭ پايداسىنا ماتەريالدىق شىعىن ءوندىرىلدى.
ۇكىم زاڭدى كۇشىنە ەندى.
قىلمىستىق توپتىڭ قالعان مۇشەلەرىن جاۋاپكەرشىلىككە تارتۋ ءۇشىن بارلىق شارالار جاسالىپ جاتىر.
