الاياقتىعى انىقتالدى
ەلىمىزدە, اسىرەسە, باس قالادا باسپاناعا زارۋلىك جىلدان-جىلعا ارتىپ وتىرعانى بەلگىلى. وسى تۇرعىدا جىمىسقى مۇددەسىن كوزدەپ, قىلمىستىق جولمەن پايدا تاپقىسى كەلەتىندەر دە تابىلىپ قالۋدا. ماسەلەن, جاقىندا ەلورداداعى «ال باراكات كومپاني» جشس مەن «تولەندى» تۇرعىن ءۇي قۇرىلىس كومپانياسىنا قاتىستى الاياقتىق فاكتىلەرى بويىنشا قالالىق ىشكى ىستەر دەپارتامەنتى قىلمىستىق ءىس قوزعادى.
راسى كەرەك, وسىنداي كەلەڭسىز جاعدايلارعا كوبىنە ادامدار مۇقتاجدىقتان ۇرىنادى. سونىڭ ىشىندە, الاياقتاردىڭ تورىنا جەكە باسپاناعا يە بولۋعا ۇمتىلعان جاس وتباسىلاردىڭ ءجيى تۇسەتىندىگى دە بايقالادى. سوندىقتان, اركىم باسپانا ساتىپ الاردا اۋەلى ساقتىق تانىتىپ, بارلىعىن سارالاپ, سودان كەيىن عانا شەشىم قابىلداعانى ءجون. ەڭ ءبىرىنشى, باسپانا ساتىپ الۋشىلار كوپ قاباتتى تۇرعىن ءۇي سالۋشىلاردىڭ مىناداي قۇجاتتارى: جەر تەلىمىن تاڭداۋ جانە كەلىسۋ اكتىسى, جوبالاۋعا رۇقسات ەتەتىن قاۋلىسى, ساۋلەت-جوسپارلاۋ تاپسىرماسى, استانا قالاسىنىڭ باس ارحيتەكتورى بەكىتكەن سىزبا جوباسى, ينجەنەرلىك جەلىلەرى بار جۇمىس جوباسىنىڭ مەملەكەتتىك ساراپتاماسى جانە قۇرىلىس جۇرگىزۋ جونىندەگى قاۋلىسى بار-جوقتىعىن تەكسەرىپ العاندارى ءجون.
سونىمەن قاتار, قۇرىلىسى اياقتالماعان نىسانداردان تۇرعىن الاڭدارىن ساتۋ ءۇشىن قۇرىلىسشى مەكەمەنىڭ جوعارىدا كورسەتىلگەن قۇجاتتاردان باسقا ۇلەسكەرلەر قارجىسىن تارتۋعا رۇقساتى بولۋى كەرەك.
استانا قالاسى اكىمى اپپاراتى باسپاسوز قىزمەتىنىڭ مالىمەتىنشە, اپتا سايىنعى باق سارالاۋى استانادا قۇرىلىسى اياقتالماعان نىسانداردا شارشى مەترلەردى ساتاتىن كومپانيالاردىڭ بار ەكەندىگىن كورسەتتى (تۇرعىن ءۇيدى ساتۋ بويىنشا باق-تا كومپانيالاردىڭ جارناما ورنالاستىرۋ جونىندەگى رۇقسات قاعازىنىڭ بولۋى تۋرالى اقپاراتتى رەسمي بەتتەن قاراڭىز). بۇل «قر تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭىنا قايشى كەلەدى.
جوعارىدا ايتىلعانداي, زاڭسىز ارەكەتتەردىڭ الدىن الۋ ماقساتىندا تۇرعىن ءۇي قۇرىلىسىنا ۇلەستىك قاتىسۋ جونىندەگى ۆەدومستۆوارالىق كوميسسيانىڭ قورىتىندىلارى اپتا سايىن باق-تا جاريالاناتىن بولادى.
جىلجىمايتىن مۇلىك ساتاتىن سالۋشىلاردىڭ رۇقسات قۇجاتتارىنىڭ بولۋى تۋرالى اقپارات
ساعي ورال