– رەڭدى جىگىتسىز. بويجەتكەندەر تەلەفون شالىپ, ءجيى مازالايتىن شىعار؟
سامال, مۇعالىم
– ءجيى حابارلاسادى دەپ ايتا المايمىن. اندا-ساندا ءنومىرىن جاسىرىپ, حابارلاساتىندار بولىپ قالادى. كوبىنەسە الەۋمەتتىك جەلىلەر ارقىلى لەبىزدەرىن ءبىلدىرىپ جاتادى.
– دەنىڭىزگە ساۋلىق, ەڭبەگىڭىزگە تابىس تىلەيمىن. اكتەر ءان ايتا دا ءبىلۋ كەرەك ەكەن. ونىڭ ۇستىنە ءسىزدىڭ داۋىس ىرعاعىڭىز وتە ادەمى. ءانشى بولۋعا قالايسىز؟
دينارا
– كوپ راحمەت! ون ءبىرىنشى سىنىپ وقىپ جۇرگەنىمدە گيتارادا ويناۋدى ۇيرەندىم. ونىڭ ۇستىنە ت.جۇرگەنوۆ اتىنداعى ونەر اكادەمياسىنا ءان ايتىپ تۇسكەم. كەيىن وقۋ ورنىندا كەرەمەت داۋىسى بار قىز-جىگىتتەردى كورىپ, باسىلىپ قالعان بولاتىنبىز. ارينە, ءان ايتپايتىن اكتەر بولمايدى. سپەكتاكل مەن كينو كورىنىستەرى بارىسىندا ايتىپ تۇرامىن. وزىمە ۇنايتىن اندەرىم بار, كوڭىل حوشۋاقتانعان ساتتەردە سولاردى ايتىپ جۇرەمىن. «ءاۋ» دەمەيتىن قازاق جوق قوي. بىراق ءانشى بولۋدى ارماندامايمىن. قازاقتا «تورعاي سويسا دا, قاساپشى سويسىن» دەگەن ماقال بار. مەن اكتەرلىگىمدى دامىتۋ جولىندا جۇمىس ىستەيمىن.
– ءادىل, «قارا شاڭىراق» تەلەحيكاياسىندا باستى رولدەردىڭ ءبىرىن سومدايسىز. ءوز ءرولىڭىزدى جاقسى الىپ شىعىپسىز. ونىڭ ۇستىنە, اقان ساتاەۆپەن جۇمىس ىستەۋ ءاربىر جاس اكتەردىڭ ارمانى عوي. بۇل رولگە قالاي بەكىتىلدىڭىز؟
عازيزا, قالا تۇرعىنى
– راحمەت, عازيزا! تەلەحيكاياعا, ارينە, كاستينگ ارقىلى بەكىتىلدىم. «ساتايفيلمنەن» حابارلاسىپ, بىرنەشە اكتەردى شاقىرتتى. بارعان سوڭ, كەيىپكەرىم داۋلەتتىڭ ءبىر-ەكى سيۋجەتتىك بەينەسىن جاساپ كورسەتتىم. ناتيجەسىندە وسى رولگە مەنى لايىق دەپ تاۋىپتى. بۇل تەلەحيكايادا اعايىندى ءۇش جىگىتتىڭ تاعدىرى باياندالادى. ءۇيدىڭ ۇلكەنى الىشەر – كاسىپكەر, ورتانشىسى داۋلەت – سپورتشى, كەنجەسى ءمادي اۋىلدا تۇرادى. وزىندىك جولى, ماقساتى بار اعايىندى ۇشەۋدىڭ تاعدىرى قاسيەتتى قارا شاڭىراقتا تابىسادى. تۋىندىدان ءاربىر قازاق ءوزىن كورەدى دەپ ويلايمىن. وندا قازىرگى جاعدايلار, قيىندىقتار, ساتقىندىق, اتا-انانى سىيلاماۋ, سونداي-اق, بۇگىنگى نەسيە, كازينو سىندى ماسەلەلەر بار. وعان قوسا, تۋىپ-وسكەن قارا شاڭىراقتى قاستەرلەۋ, اعايىن اراسىنداعى تاتۋلىقتى دامىتۋ, وتباسىلىق قۇندىلىقتاردى ساقتاۋ – وسىنىڭ ءبارىن فيلمنەن كورۋگە بولادى.
– اشىربەك سىعاي: «ءانشى-اكتەردىڭ دەنى تويدا ءجۇر. ماساڭ ورتادا جىلتىڭداپ جۇرگەن ءارتىس ساحنادا دا سۇرىنەدى. بىزدە توي جاعالاماي, ءوزىن-ءوزى ساقتايتىن جىگىتتەر از… ءادىل احمەتوۆ – سول ازدىڭ وكىلى» دەپ باعا بەرگەن ەكەن. ءسىز شىنىمەن توي باسقارۋعا بارمايسىز با؟
پەريزات
– استاناعا كەلگەن جىلدارى جاتاقحانادا تۇردىق. سول كەزدە تويعا شىققان كەزىمىز بولدى. قازىر بارلىق تويلارعا ەمەس, كونتسەرتتىك باعدارلاما رەتىندە وتەتىن ۇلكەن شارالارعا جۇرگىزۋشى رەتىندە بارىپ تۇرامىن. ءبىر جاعىنان تويعا شىعاتىن اكتەرلەردى دە تۇسىنۋگە بولادى. بارلىعى كۇنكورىستىڭ قامى عوي.
– ءسىزدى ەندى قانداي كينودان كورەمىز؟
نۇرگۇل, ستۋدەنت
– رەجيسcەر اقان ساتاەۆتىڭ «رەكەتير» ءفيلمىنىڭ ەكىنشى ءبولىمى ءتۇسىرىلىپ جاتىر. سول كينونىڭ ءبىر ەپيزودىندا اقتوبەلىك ميكو دەگەن ءبانديتتىڭ ءرولىن سومدايمىن. بۇل شاعىن ءرول ەكەن دەپ باس تارتقان جوقپىن. «ءرولدىڭ ۇلكەن-كىشىسى بولمايدى» دەگەندەي, ءار كەيىپكەردىڭ بەلگىلى ءبىر بەرەرى بولادى. ارقايسىسىنىڭ جاۋاپكەرشىلىگى بار.
ونەرگە جانىن بەرگەن, تاريحتا اتى قالاتىن ناعىز اكتەردىڭ بولمىسى, ءومىر سالتى قانداي بولۋى كەرەك, سىزدىڭشە؟
راحات, مەدبيكە
– باسقا ءىسىنىڭ ءبارىن تاستاپ, تەك ونەرگە بەرىلىپ كەتەتىندەر بولادى. بۇل – سيرەك كەزدەسەتىن جايت. ءاربىر ادام جانۇياسىن ءبىرىنشى ورىنعا قوياتىن شىعار. ودان كەيىن – ونەر. ءبىر نارسەگە قاتتى بەرىلۋدىڭ ءوزى دۇرىس ەمەس قوي. بىراق, ارينە, ۇستانىمىم – ءبىر كاسىپتىڭ ۇڭعىل-شۇڭعىلىنا دەيىن يگەرۋگە تىرىسۋ. اكتەرلىگىمدى دامىتۋ جولىندا جۇمىس ىستەيمىن. سول ءۇشىن ىزدەنۋدەن تالمايمىن.
– ءادىل, ءسىز «اقىماق» كەزىڭىزدە ۇيلەنىپ الدىڭىز. ول كەزدە ءسىزدى ەشكىم تانىمايتىن. ال, قازىر كوپشىلىككە تانىمالسىز. جان-جاعىڭىزدان قاۋمالاپ جۇرگەن قىز-قىرقىنعا قاراپ, ەرتە ۇيلەنگەنىڭىزگە وكىنبەيسىز بە؟
جانار, ستۋدەنت
– وكىنبەيمىن. 24 جاسىمدا ت.جۇرگەنوۆ اتىنداعى ونەر اكادەمياسىن بىتىرگەن سوڭ, ەكى جىلدان كەيىن ۇيلەندىم. جولداسىم ەكەۋمىز ءبىر وقۋ ورنىندا وقىدىق. مەنىڭ ولجام – ءوزىڭىز ايتقانداي, ەشكىم تانىمايتىن كەزىمدە وتاۋ قۇرعانىم. كەرىسىنشە, سول «اقىماق» كەزىمدە ۇيلەنىپ العانىما قۋانامىن. جولداسىم ەكەۋمىزدە ەشقانداي ەسەپ بولعان جوق. ءجاي عانا ستۋدەنت ادىلگە عاشىق قىزعا ۇيلەندىم. قۇدايعا شۇكىر, سودان بەرى بىرگە كەلە جاتىرمىز.
– ءادىل, قازىرگى كەزدە ءبىزدىڭ قوعامدا نەسيەسى جوق ادام كەمدە-كەم. ءسىز بانككە قارىز ەمەسسىز بە؟
دانا, بانك قىزمەتكەرى
– ءدال قازىر قارىز ەمەسپىن. وسى جازدا نەسيەگە تەحنيكالىق قۇرال-جابدىق الىپ, ارتىنان قارىزدى قايتاردىق.
– ساحنادا تۇرىپ, وقىس وقيعاعا تاپ بولعان كەزىڭىز بولدى ما؟
تيمۋر
– قىزىقتى وقيعالار كوپ بولىپ جاتادى. بىردە استانانىڭ ماڭىنداعى «كوكتال» ىقشام اۋدانىنا باردىق. سول جەردىڭ مادەنيەت ۇيىندە «ديليافرۋزدىڭ ءتورت كۇيەۋى» سپەكتاكلىن قويىپ جاتقانبىز. ءدال ورتاسىنا كەلگەندە جارىق ءوشىپ قالدى. كومەديا وتە قىزۋ, جاقسى ءوتىپ جاتتى. سونىڭ اسەرى شىعار, بارلىق كورەرمەن ۇيالى تەلەفوندارىنىڭ فوناريكتەرىن قوسىپ, ساحناعا جارىق ءتۇسىرىپ وتىردى. ونىڭ ۇستىنە سول كۇنى دالادا جاڭبىر قۇيىپ تۇردى. جاڭبىردىڭ دا داۋىسى ىشكە ەستىلىپ تۇردى. ءدال سول كەزدە سپەكتاكلدەگى توعايدىڭ ءىشىن كورسەتەتىن جەرىنە كەلگەن بولاتىنبىز. ەشتەڭەگە قاراماستان, بىرەۋىمىز قولشاتىر, كەلەسىمىز فوناريك الىپ شىعىپ قويىلىمدى ءارى قاراي جالعاستىرىپ كەتتىك. ساحنادا وسىنداي نەشە ءتۇرلى كۇتپەگەن وقيعالار ورىن الىپ جاتادى.
– بىرنەشە فيلمدە باستى رولدەردى وينايسىز. بۇل ءۇشىن قاراجات تولەيسىز بە؟
دامەتكەن
– و نە دەگەنىڭىز؟!(كۇلىپ). مەن دە بارلىق ۇمىتكەرلەر سەكىلدى ارنايى سىناقتان ءوتىپ, رەجيسسەرلەردىڭ شەشىمى بويىنشا عانا رولگە بەكىتىلەمىن. كەرىسىنشە, كينوعا تۇسكەنىمىز ءۇشىن ولار بىزگە تولەيدى.